Shimbi 7 - Mukanda Wa Zambi 1970

Atu ja Mwene Zambi

¹ “Mwene Zambi, Zambi yenu, kumakanutwala ku chifuchi chize nunayi ha kuchizuka, makahanga mo mavungu anji. Makahuma mavungu shimbiali anene ni a tachi anuhiana yenu: Ahite, ni Agirgashe, ni Aamore, ni Akanana, ni Aperize, ni Ahive, ni Ajebuse.

² Muze Mwene Zambi, Zambi yenu, haanukunjika atu wano, ni muze hinwaakumba, chatamba kwaashiha eswe. Kanda nukolesa no Usendo hanji kwevwila keke.

³ Kanda nulimbachila no.

⁴ Nyi ka, kumaakapiangula ana jenu kuli Mwene Zambi ha kuwayila mazambi eka. Nyi nwachilinga, Mwene Zambi makanutenukina, makanunongesa ha chisuho chimuwika.

⁵ Kashika nukabuzula yilumbilo yo ni mahamba jo a mawe ni kwafwenwona, nukabuzula mahamba ja zambi yo wa pwo Ashera, nukoocha.

⁶ Lingenu chino mumu nuli a mbala a Mwene Zambi, Zambi yenu. Yanutongola hakachi ka atu eswe hano hashi ha kubwa lume atu jenyi.

⁷ “Mwene Zambi kanuzangile ko hanji kanutongwele ko mumu nuli anji kuhiana atu akwo; nwabwile vungu likepe kuhiana hano hashi.

⁸ Alioze Mwene Zambi yanuzanga, yazanga nawa kufunga chilakenyo chize alakenyene kuli tushakulu twenu. Mba yanulamwina ni ndundo jenyi, yanutusula mu undungo kuli mwanangana wa Egiptu.

⁹ Kashika iwulukenu ngwenu, Mwene Zambi, Zambi yenu, kali Zambi wika, kali mukwa kushishika. Kumakafunga Usendo wenyi uze akolesele ni Aisraele ni kulweza zango lienyi kuli tununu twa yisemuko a kuli waze akumuzanga ni akufunga Shimbi jenyi.

¹⁰ Alioze kechi kashimbula ha kumwesa lamba atu waze keeshi kumwononokena.

¹¹ Kashika fungenu Shimbi ni yiyulo yeswe yize hinanulongesa musono.”

Yiwape mumu ha kwononoka

¹² “Nyi nwabanjika ku Shimbi jino ni kujifunga kanawa, mba Mwene Zambi, Zambi yenu, makafunga Usendo uze akolesele ni yenu ni kunulweza zango lienyi hahiana, ngwe chize alakenyene tushakulu twenu.

¹³ Makunuzanga ni kunuwahisa, hanga nukoke ni kubwa ni ana anji. Makawahisa mihuko yenu ya mu minda hanga nukabwe ni mbuto, ni vinyu, ni maji a olive. Makanuwahisa ha kunwaha ngombe ni mapanga anji. Makanwaha yiwape yino yeswe mu chifuchi chize hanalakenya kuli tushakulu twenu.

¹⁴ Zambi kechi kuwahisa vungu nilimwe hano hashi ngwe yenu. Niumwe wa kuli yenu, chibwe kuli ngombe jenu, makabwa mumba.

¹⁵ Mwene Zambi makanufunga ku misongo yeswe; kechi kanwaha yimwe misongo yize nwabwile nayo mu chifuchi cha Egiptu, alioze makayihana kuli akwa kole jenu eswe.

¹⁶ Nukanongesa mavungu eswe waze Mwene Zambi, Zambi yenu, makakunjika kuli yenu, kanda nukevwila keke. Kanda nukawayila mazambi jo, nyi ka, maakabwa muheto kuli yenu.

¹⁷ “Kanda nulihanjikisa ngwenu, atu wano ahiana naye kwoka, kutwahashile kwahanga.

¹⁸ Kanda nwevwila woma, iwulukenu chize Mwene Zambi, Zambi yenu alingile kuli mwanangana wa Egiptu ni kuli atu jenyi eswe.

¹⁹ Iwulukenu misongo yibi ya akwa Egiptu, ni yilayi, ni yikomokeso, ni ndundo ja Mwene Zambi, Zambi yenu, jize anutuhwishile najo. Ngwe chize anongesele akwa Egiptu, Chenacho nawa makanongesa atu wano nunevwila woma musono.

²⁰ Makatuma mboji hakachi ko akamanunune waze haasala ni haaswama.

²¹ Kashika kanda nuvwila atu wano woma. Mwene Zambi, Zambi yenu, kali hamwe ni yenu, kali Zambi munene, kola woma.

²² Makahanga mavungu wano ku meso jenu hakepe hakepe. Kuchatambile kwanongesa eswe chisuho chimuwika, nyi ka, tushitu a yilianyi maakoka kuhiana.

²³ Alioze Mwene Zambi makakunjika akwa kole jenu kuli yenu nikwabinjisa ndoo eswe maakanonga.

²⁴ Makakunjika mianangana kuli yenu; mba munukaashiha, munukaakuwisa. Niumwe kechi kanukwika, munukaanongesa eswe.

²⁵ Nukocha mahamba jo, ni prata ni oru yize alingile nayo mahamba, kanda nukayivwila chihilulu. Nyi ka, muyikabwa muheto kuli yenu, mumu Mwene Zambi, Zambi yenu, kakuvutwokela mahamba.

²⁶ Kanda nwanda niumwe wa kuli mahamba jo ni kuya no ku mazuwo jenu. Nyi ka, Shingo lize liabwile hali ayo mulikabwa hali yenu. Chatamba kwavutwokela ni kwalelesa, mumu Zambi hanaashingi.”