Shimbi 6 - Mukanda Wa Zambi 1970

Shimbi yinene

¹ “Jino jeswe jili Shimbi jize Mwene Zambi, Zambi yenu, angwambile ha kunulongesa jo. Nukajifunge mu chifuchi chize nunambe kunjila ni kuchizuka.

² Ha matangwa eswe a mwono wenu, yenu ni vungu lienu chanutamba kulemesa Mwene Zambi, Zambi yenu, ni kufunga Shimbi jenyi jeswe jize ngunanulongesa, hanga nukatwame miaka yinji mu chifuchi chize.

³ Yenu Aisraele banjikenu, fungenu Shimbi jino! Mba munukawaha, munukabwa vungu lia tachi, nukatwame ni mwono mu chifuchi cha chinuno ngwe chize Mwene Zambi, Zambi ya tushakulu twetu, hanalakenya.

⁴ “Yenu Aisraele, ivwenu, Mwene Zambi, Zambi yetu, kali Zambi wika.

⁵ Zanga Mwene Zambi, Zambi ye, ni mbunge ye yeswe, ni mwono we weswe, ni tachi je jeswe.

⁶ Kanda uvulama nichimwe Shimbi jize ngunakulongesa musono.

⁷ Jilongese ana je. Ujitenge pande muze unatwama mu zuwo lie, hanji kweswako uli, muze muhwima hanji muze muulinga milimo.

⁸ Ujikashile ha moko je ni ha huma lie ha kujiwuluka.

⁹ Ujisoneke ha yikolo ya zuwo lie ni ha yajilo ya chipanga che.”

Mose yakanjisa Aisraele ha kukolema Shimbi

¹⁰ “Mwene Zambi, Zambi yenu, makanwaha chifuchi chize chili ni membo anene ni a lufuma waze kunwatungile ko, ngwe chize alakenyene tushakulu twenu, Abrahama, ni Isake, ni Yakoba.

¹¹ Munukawana haazala ni yuma yibema yize kunwasele mo, munukawana mashima waze kunwafulile ko ni minda ya vinyu ni ya olive yize kunwalimine ko. Muze Mwene Zambi makanunjisa mu chifuchi chize, nyi hinwabwa ni yeswe yize nunazange kulia,

¹² nukanyama kuchina munukavulama Mwene Zambi yoze wanutuhwishile mu Egiptu, kuze nwabwile ndungo.

¹³ Vwilenu Mwene Zambi, Zambi yenu, woma, muwayilenu iye wika, nulishinge ni jina lienyi wika.

¹⁴ Kanda nuwayila mazambi akwo, mazambi ja atu waze ananujingilika.

¹⁵ Nyi nwawayila mazambi eka, Mwene Zambi manutenukina kuhiana, manunongesa liakulu mumu Mwene Zambi, Zambi yenu, yoze uli hamwe ni yenu, kali Zambi ya ukwa.

¹⁶ “Kanda nweseka Mwene Zambi, Zambi yenu, ngwe chize nwamwesekele ku Masa.

¹⁷ Fungenu kanawa Shimbi ni yiyulo yeswe yize anuhele.

¹⁸ Lingenu yize Mwene Zambi anambe, yize yinalite ni yinabeme, mba munukawaha. Munukazuka chifuchi cha chinuno chize Mwene Zambi alakenyene tushakulu twenu,

¹⁹ munukahuma akwa kole jenu ngwe chize hanalakenya.

²⁰ “Ku miaka ya kulutwe ana jenu kumaakanuhula ngwo: ‘Mumu yika Mwene Zambi, Zambi yetu, atwambile ha kufunga Shimbi jino jeswe?’

²¹ Mba alwezenu ngwenu: ‘Twabwile ndungo ja mwanangana wa Egiptu alioze Mwene Zambi yatutuhwisa mo ni ndundo jenyi kuhiana.

²² Ni meso jetu yitumona yilayi ni yikomokeso yize alingile hali akwa Egiptu ni hali mwanangana wo, ni milopo jenyi.

²³ Yatuhwisa mu Egiptu ni kutuneha kuno ngwe chize azangile, nikutwaha chifuchi chino nikulita ni chize alakenyene tushakulu twetu.

²⁴ Mba Mwene Zambi, Zambi yetu, yatwamba ha kufunga Shimbi jino jeswe ni kumuvwila woma. Nyi twachilinga, mba makasongwela vungu lietu ku miaka yeswe ni kutufunga ni kutubichisa.

²⁵ Nyi ngwe twafunga Shimbi jeswe kanawa jize Mwene Zambi, Zambi yetu, hatwaha, mba mawahilila ni yetu.’ ”