Shimbi 5 - Mukanda Wa Zambi 1970

Shimbi kumi

¹ Mose yakungulula Aisraele eswe, yaamba ngwenyi: “Yenu Aisraele, banjikenu ku Shimbi jeswe jize ngunanulongesa musono. Lilongesenu jo; kanyamenu nujifunge kanawa.

² Ha mulundu wa Sinai Mwene Zambi. Zambi yetu, yakolesa Usendo,

³ hi ni atata wika ko, alioze ni yetu eswe nawa waze tuli ni mwono ndoo ni musono.

⁴ Mu kahia ha mulundu Mwene Zambi yahanjika ni yenu meso ni meso.

⁵ Yami yingumana hakachi kenu ni Mwene Zambi ha matangwa waze ha kunulongesa maliji jenyi, mumu yenu nwevwile woma wa kahia, kashika kunwakandukile ko ha mulundu. “Mwene Zambi ngwenyi:

⁶ ‘Yami nguli Mwene Zambi, Zambi ye, yoze wakutuhwishile mu chifuchi cha Egiptu, kuze wabwile ndungo.

⁷ “ ‘Kanda ungukatukila ha kutayiza mazambi akwo.

⁸ “ ‘Kanda ulisongela hamba walifwa ni chimwe Chuma cha mwilu hanji cha hano hashi, chibwe cha mu meya mushi lia hashi.

⁹ Kanda wafukamina chibwe kwakombelela mumu yami Mwene Zambi, Zambi ye, nguli Zambi ya ukwa. Atu waze akunguvutwokela mungukaamwesa lamba, ni ajikulu jo, ni tukwatambuli two.

¹⁰ Alioze tununu twa yisemuko ya waze akunguzanga ni akufunga Shimbi jami, mungubwa ni kwalweza utu.

¹¹ “ ‘Kanda uvuluka jina lia yami Mwene Zambi, Zambi ye, ni kaleleso, mumu chichi kasambisa yoze malelesa jina liami.

¹² “ ‘Lemesa tangwa lia kuhwima, ulipwise lia chijila, ngwe chize yami Mwene Zambi, Zambi ye, hingunakwehe Shimbi.

¹³ Ulinga milimo ye yeswe ha matangwa asambano,

¹⁴ alioze tangwa lia muchishimbiali lili tangwa lia kuhwima, tangwa lia yami Mwene Zambi, Zambi ye. Kanda Ulinga ho mulimo, chibwe yena, hanji ana je, chibwe ndungo je, hanji yimuna ye, chibwe yilambala waze atwama mu chifuchi che. Ndungo je chaatamba kuhwima ngwe yena mwene.

¹⁵ Iwuluka chize wabwile ndungo mu Egiptu, ni chize yami, Mwene Zambi ye, nakutuhwishile mo ni ndundo jami. Kashika ngunakwehe Shimbi ya kulemesa tangwa lia kuhwima.

¹⁶ “ ‘Lemesa tatenu ni noko, ngwe chize yami, Mwene Zambi, Zambi ye, ngunakwehe Shimbi, mba hanga yuma yeswe yiwahe kuli yena ni hanga ubwe ni mwono matangwa anji, mu chifuchi chize ngunakwehe.

¹⁷ “ ‘Kanda ushiha mutu.

¹⁸ “ ‘Kanda Ulinga utanji.

¹⁹ “ ‘Kanda wiya.

²⁰ “ ‘Kanda ulamikiza mutu niumwe.

²¹ “ ‘Kanda uvwila chipululu pwo lia mukwenu, chibwe zuwo lienyi, hanji munda wenyi, chibwe ndungo yenyi, hanji ngombe yenyi, chibwe chimbulu chenyi, hanji Chuma chikwo chize ali nacho.’

²² “Jino je Shimbi anuhele Mwene Zambi muze nwakungulukile ku mulundu. Muze ahanjikile ni liji lia tachi mu kahia ni mu malelwa a ndama, yanwaha shina Shimbi jino hi jikwo ko, mba yajisoneka ha mawe aali a luhanda, yangwaha jo.”

Atu yeevwa woma

²³ “Muze mulundu weswe wakakumukine kahia nwevwile liji linatuhuka mu milima, mba akwa lutwe jenu ni miata ja mavungu jenu yeeza kuli yami,

²⁴ yaamba ngwo: ‘Mwene Zambi, Zambi yetu, hatulweza unene wenyi ni uhenya wenyi muze twamuvwile ni kuhanjika mu kahia! Musono hitwamona ngwetu, mutu mahasa kubwa ni mwono, chibwe Zambi mahanjika nenyi.

²⁵ Alioze yika mutufwila? Kahia kaze ka tachi mukatwonona. Nyi twevwa nawa liji lia Mwene Zambi, Zambi yetu, kumutufwa.

²⁶ Kuli umwe mutu yoze hevwa liji lia Zambi linatuhuka mu kahia, hindu uchili ni mwono, nyi?

²⁷ Mose, yako hanga ubanjike yuma yeswe yize Mwene Zambi, Zambi yetu, mahanjika mba uhiluke hanga utwambulwile yize makulweza. Kumutubanjika ni kumwononokena.’

²⁸ “Muze Mwene Zambi hevwa chino, yangwamba ngwenyi: ‘Hinevwa yize atu wano haamba, yili yamwenemwene.

²⁹ Nyi matangwa eswe maalinga kama ngwe chino nikufunga Shimbi jami jeswe, kachi ayo ni vungu lio, kumaakawaha ku miaka yeswe.

³⁰ Yako waalweze ahiluke ku mazuwo jo,

³¹ Alioze yena Mose, sala hano ni yami, hanga ngukwehe Shimbi ni yiyulo yami yeswe. Yilongese kuli atu, hanga ayifunge mu chifuchi chize ngunaahe.’

³² “Yenu Aisraele, fungenu kanawa yuma yeswe yize Mwene Zambi, Zambi yenu, haanwamba. Kanda nukolema Shimbi niyimwe.

³³ Jifungenu jeswe, mba hanga nuwahe nikutwama matangwa anji mu chifuchi chize nunayi ni kuchizuka.”