Shimbi 4 - Mukanda Wa Zambi 1970

Mose yatakamisa Aisraele ha kwononokena Zambi

¹ Mba Mose yambila atu ngwenyi: “Ononokenu ku Shimbi jeswe jize ngunanulongesa, mba munubwa ni mwono nukazuke chifuchi chize ananwehe Mwene Zambi, Zambi ya tushakulu twenu.

² Kanda nuweza Chuma nichimwe ku yize ngunanwambe, chibwe kuchiza ko chikwo. Ononokenu ku Shimbi ja Mwene Zambi, Zambi yenu, jize hingunanulongesa.

³ Yenwene nunakamona chize Mwene Zambi anakalinga ha mulundu wa Peore. Kanakashiha atu eswe waze te akuwayila Bale,

⁴ alioze yenu waze nwononokenene Mwene Zambi, Zambi yenu, nuli ni mwono ndoo ni musono uno.

⁵ “Kutala! Nanulongesele Shimbi jeswe, ngwe chize Mwene Zambi, Zambi yami, angulwezele. Nujifunge mu chifuchi chize nunambe kunjila ni kuchizuka.

⁶ Nujifunga kanawa. Chino muchilweza mavungu akwo ngwo, nuli akwa mana. Muze meevwa Shimbi jino jeswe kumaakamba ngwo: ‘Vungu lino likwete mana ni yinyingi.’

⁷ “Vungu likwo nilimwe, chibwe linene liahiana, akwete Zambi yoze watwama hehi no muze mahona chimwe Chuma ngwe Mwene Zambi, Zambi yetu. Lieswe tangwa kaakutukumbulula muze twakumwita.

⁸ Vungu likwo nilimwe, chibwe linene liahiana, likwete Shimbi jize jinalite ngwe jize ngunanulongesa musono.

⁹ Kanyamenu! Ha matangwa eswe a mwono wenu kanda nuvulama yuma yize hinwamona ni meso jenu. Nukalweza ana jenu ni ajikulu jenu

¹⁰ hakutwala ku tangwa lize nwamanyine ku meso ja Mwene Zambi, Zambi yenu, ku mulundu wa Sinai, muze Mwene Zambi angwambilile ngwenyi: ‘Kungulula atu. Ngunazange abanjike yize ngunambe kwamba musono mba hanga ahase kungwononokena matangwa eswe a mwono wo ni hanga akalongese ana jo ha kunguvwila woma.’

¹¹ “Nukalweza ana jenu chize nwayile ni kumana ku mulundu uze afukile malelwa waze akwete ndama ya mwishi uze wafwindanganyine ni milima ni milengi ya kahia yize yalekwokele ndoo mwilu.

¹² Nukaalweza chize Mwene Zambi ahanjikile kuli yenu mu kahia, ni chize nwamuvwile ni kuhanjika alioze kunwamumwene ko chize abwa.

¹³ Yanulweza chize chanutamba kufunga Shimbi ja Usendo uze akolesele ni yenu, chanutamba kwononokena Shimbi kumi jize asonekene ha mawe aali.

¹⁴ Mwene Zambi yangwamba ha kunulongesa Shimbi jeswe jize chatamba kufunga mu chifuchi chize nunambe kunjila ni ku chizuka.”

Mose yakanjisa Aisraele kukombelela mahamba

¹⁵ “Muze Mwene Zambi ahanjikile ni yenu ku mulundu wa Sinai mu kahia, kunwamumwene ko chize abwa. Kashika nukanyama,

¹⁶ nyi ka munuvulumuna ha kulisongela hamba hanji chimwe Chuma chize chalifwa ni lunga hanji ni pwo,

¹⁷ chibwe ni kashitu hanji ni kajila,

¹⁸ chibwe ni Chuma chize chakukalala hanji ni yishi.

¹⁹ Kanda akanweseka ha kuwayila Chuma chize nunamono mwilu: tangwa hanji kakweji, hanji matongonoshi. Mumu Mwene Zambi, Zambi yenu, hanahana yino yuma yeswe kuli mavungu akwo ha kuyiwayila.

²⁰ Alioze yenu nuli atu waze Mwene Zambi alamwinyine mu chifuchi cha Egiptu ku lutengo wa kahia. Yanutuhwisa ha kunupwisa atu jenyi mwene, ngwe chize nuli musono.

²¹ Mwene Zambi, Zambi yenu, hanangutenukina mumu hali yenu, yalishinga ngwenyi, yena Mose kuuchi kanjila mu chifuchi cha chinuno chize hananwehe.

²² Yami mungufwila mu chifuchi chino, chichi kazauka mwe lwiji; alioze yenu munukazauka nikuzuka che chifuchi cha chinuno.

²³ Nukanyama kuchina munuvulama Usendo wa Mwene Zambi, Zambi yenu, uze akolesele ni yenu. Nukafunga Shimbi jenyi, kanda nulisongela umwe hamba,

²⁴ mumu Mwene Zambi, Zambi yenu, kali ngwe mulengi wa kahia uze unalekwoka; kali Zambi ya ukwa.

²⁵ “Chibwe hinwatwama kulu mu chifuchi miaka yinji, hinwabwa ni ana ni ajikulu, kanda nukavulumuna ha kulisongela mahamba a mulali weswawo. Chili chibi ku meso ja Mwene Zambi, muchikamuvwisa ufwatulo.

²⁶ Lilu ni hashi yili yela jami musono ha kulimika ni yenu. Nyi kunwafungile Shimbi jami, akwa kole maakanuhanga nikawashi mu chifuchi. Kunuchi katwama miaka yinji mu chifuchi chize nunambe kuzuka musali lia Yordau, mumu makanwonona liakulu.

²⁷ Mwene Zambi makanumwangina mukachi ka mavungu akwo, akepe mukachi kenu makasala ho ni mwono.

²⁸ Kwenako munukawayila mazambi a mitondo ni a mawe waze akulinga ni moko, mazambi waze kaahashile kumona chibwe kwivwa, hanji kulia chibwe kuhumbika.

²⁹ Kwenako munukafupa Mwene Zambi, Zambi yenu. Nyi ngwe munukamufupa ni mbunge jeswe, kachi munukamuwana.

³⁰ Muze munukamona lamba, ni yuma yino yeswe muyikanuwana munukahiluka kuli Mwene Zambi ni kumwononokena.

³¹ Kali Zambi ya keke. Kechi kunwehuka hanji kunwonona. Kechi kavulama usendo uze akolesele ni tushakulu twenu.

³² “Achinyongenu ha yuma yikulu, ha miaka yize te kanda nuchisemuka muze Mukulu Zambi atangile atu, Hengulenu hashi heswe. Hikunabu kama chimwe Chuma chinene ngwe chino, nyi? Kuli umwe yoze hanevu kama Chuma ngwe chino, nyi?

³³ Kuli kama atu waze haanevu liji lia umwe zambi mulituhuka mu kahia, ngwe chize nwevwile yenu hindu wa ni mwono, nyi?

³⁴ Kwali umwe zambi yoze haneseka kama kuchiza atu mukachi ka chifuchi chikwo ni kwapwisa atu jenyi mwene, ngwe chize Mwene Zambi, Zambi yenu, anuchijile mu Egiptu, nyi? Yasolola ndundo jenyi ku meso jenu, yamwesa atu lamba ni misongo yikalu ni jita, yalinga yikomokeso, ni yilayi, ni yuma ya kuvwisa mwongo.

³⁵ Mwene Zambi hanalingi chino ha kushindakenya ngwenyi, iye mwe Zambi umuwika, kukushi Zambi mukwo.

³⁶ Hananutayiza kwivwa liji lienyi, mba hanga anulongese. Hano hashi hananutayiza kumona kahia kenyi ka chijila, yahanjika kuli yenu mukachi ka kahia.

³⁷ Hananutongola, mumu wazangile tushakulu twenu, ni ku ndundo jenyi hanaanutuhwisa mu Egiptu.

³⁸ Muze te nunende yahanga mavungu eswe anene ni a tachi anuhiana yenu ha kununjisa mu chifuchi cho ni kunwaha cho. Chifuchi chize chili nichenu ndoo ni musono.

³⁹ Kashika musono Iwulukenu, kanda nuvulama, Mwene Zambi kali Zambi ya mwilu ni hashi. Kukushi Zambi mukwo.

⁴⁰ Fungenu Shimbi jenyi jeswe jize hingunanulongesa mba yenu ni vungu lienu munukawaha. Munukanyongonona kutwama mu chifuchi chenu chize Mwene Zambi, Zambi yenu, ananwehe ndoo ku miaka yeswe.”

Membo a kuchinyina ku sali lia chivumbuko cha Yordau

⁴¹ Mba Mose yatongola membo atatu ku sali lia Yordau ku chivumbuko,

⁴² kuze mutu mahasa kuchinyina ha kubwa ni uhwinino nyi hashiha umwe mutu, hi mukwa kole yenyi ko, te kachizangile. Mahasa kuchinyina ku limwe lia membo wano, nyi ka, maamushiha.

⁴³ Mumu ha vungu lia Rubene, limbo lia Bezere, mu puya ku tunda; mumu ha vungu lia Gade, Ramote, mu chifuchi cha Gileade; mumu ha vungu lia Manase, Golane, mu chifuchi cha Bashane.

Maliji atangu muze Mose anambe kulongesa Shimbi ja Zambi

⁴⁴ Mose yalongesa Aisraele Shimbi ni yiyulo ya Zambi.

^45-46 Chino chabwile muze haanatuhuka kulu mu chifuchi cha Egiptu, te kaali mu chikulo cha lwiji Yordau ku sali lia chivumbuko, hatalanganyi ni limbo lia Betepeore, mu chifuchi cha mwanangana Sihone wa Aamore, yoze te wakuyula mu limbo lia Heshbone. Mose ni Aisraele yaamukumba muze atuhukile mu Egiptu.

⁴⁷ Yaazuka chifuchi chenyi ni chifuchi cha mwanangana Oge wa Bashane, mwanangana wa Aamore yoze te watwama mu sali lia chivumbuko cha Yordau.

⁴⁸ Chifuchi chize te chakatuka ku limbo lia Aroare ku njiza ya lwiji Arnone, yichiheta ndoo ku mulundu wa Sione ku norde, kafwa ngwe mulundu wa Hermone.

⁴⁹ Kuweza ho nawa chifuchi cheswe ku chivumbuko cha Yordau ndoo ni ku chitende cha Kufwa ku sude, ni ku mulundu wa Pisga ku chivumbuko.