Shimbi 34 - Mukanda Wa Zambi 1970

Kufwa cha Mose

¹ Mose yakatuka ku yana ya Moabe, yakanduka ha mulundu wa Nebo, ha mulundu wa Pisga ku chivumbuko cha Yeriku. Kwenako Mwene Zambi amulwezele chifuchi cheswe: chifuchi cha Gileade ndoo ku limbo lia Dane ku norde;

² ni chifuchi cheswe cha Naftali; ni yifuchi ya Efraime ni Manase; ni chifuchi cha Yuda ndoo ku kalunga lwiji Mediterane ku chitokelo;

³ ni chifuchi cha ku sude cha Yuda; ni chana chize ku Zoare ndoo ku Yeriku, limbo lia mingaji.

⁴ Mba Mwene Zambi yambila Mose ngwenyi: “Chino che chifuchi chize nalakenyene Abrahama, ni Isake, ni Yakoba ngwami, mungukachihana ku vungu lio. Hinakulweza cho chitale, alioze chichi kukutayiza kunjila mo.”

⁵ Chenacho Mose, kavumbi ka Mwene Zambi, yafwila mu chifuchi cha Moabe, ngwe chize ambile Mwene Zambi.

⁶ Mba Mwene Zambi yamufunda mu chikulo cha Moabe, talanganyi ni limbo lia Betepeore, alioze ndoo ni musono niumwe wanyingika fuka lienyi.

⁷ Mose, muze afwile, te habwa ni miaka kulakaji ni makumi aali. Yabwa mukwa tachi kuhiana, kahongele ko ku meso.

⁸ Aisraele yaamulila matangwa makumi atatu mu yana ya Moabe.

⁹ Yoshua mwana wa Nune yabwa ni mana anji, mumu Mose hamushindakenya ha kubwa swana yenyi. Aisraele yoononokena Yoshua, yaafunga Shimbi ja Mwene Zambi jize aahele Mose.

¹⁰ Kukwabwile mukwa munanyi niumwe mu Israele ngwe Mose. Mwene Zambi te kakuhanjika nenyi meso ni meso.

¹¹ Wakuhi mukwa munanyi niumwe walingile yilayi ni yikomokeso ngwe yize alingile Mwene Zambi ni moko ja Mose muze amutumine ha kulimika ni mwanangana wa Egiptu, ni akwa kuyula ni chifuchi cheswe.

¹² Wakuhi mukwa munanyi niumwe walingile yuma yinene ni yikomokeso ngwe yize alingile Mose ku meso ja Aisraele eswe.