Shimbi 33 - Mukanda Wa Zambi 1970

Mose yawahisa mavungu ja Aisraele

¹ Mose, mutu wa Zambi, shimbu te kanda achifwa, yawahisa Aisraele.

² Mwene Zambi yakatuka ku mulundu wa Sinai, yabwa ngwe chize tangwa liakuvumbuka ha Edome nikupanguka hali Aisraele ha mulundu wa Parane. Tunganda a mwilu tununu kumi yabwa hamwe nenyi, soka lia mulengi wa kahia mu kwoko lienyi lia chindume.

³ Mwene Zambi kakuzanga atu jenyi, kakufunga waze nienyi. Kashika tuliumbenu ku molu jenyi, tufungenu Shimbi jenyi.

⁴ Tufungenu Shimbi jize atuhele Mose. Jili chihinga chinene chahiana cha vungu lietu.

⁵ Mwene Zambi hanabu mwanangana wa atu jenyi Aisraele muze mavungu jo ni miata jo akungulukile hamuwika.

⁶ Mose yahanjika hakutwala ku vungu lia Rubene ngwenyi: “Rubene, vungu lienyi kanda likuwa kama, chibwe atu jenyi kaali akepe.”

⁷ Hakutwala ku vungu lia Yuda yamba ngwenyi: “Mwene Zambi, banjika kama kukuliumba cho ha kwakwasa. Waachinge kama nawa ni mavungu akwo. Mwene Zambi, ashile kama jita, waakwase ha kulimika ni akwa kole jo.”

⁸ Hakutwala ku vungu lia Levi yamba ngwenyi: “Mwene Zambi, wakusolola chize unazange ku Urime ni Tumime ku moko ja Alevi, tuvumbi twe akwa kushishika. Weesekele ku meya a Masa, waatayijile ku meya a Meriba.

⁹ Abwile akwa kushishika kuhiana kuli yena, hi kuli yisemi jo ko, hanji anakwo, chibwe kuli ana jo. Yaafunga Shimbi je, yaalemesa Usendo we.

¹⁰ Maakalongesa ana je ha kufunga Shimbi je. Maakalambula milambu ha chilumbilo che.

¹¹ Mwene Zambi, kwasa kama vungu lio abwe ni tachi. Wahilila ni yize akulinga. Fwenya kama akwa kole jo eswe. Kanda ahinduka nawa nichimwe.”

¹² Hakutwala ku vungu lia Benjamine yamba ngwenyi: “Lino lili vungu lize Mwene Zambi akuzanga ni akufunga. Kakwafunga tangwa heswe, kakubwa mukachi ko.”

¹³ Hakutwala ku vungu lia Josefe yamba ngwenyi: “Mwene Zambi, wahisa kama chifuchi cho ni vula ni meya kushi lia mavu.

¹⁴ Chifuchi cho chiwahe ni mihuko yize yakuhia ni mwalwa, ni mihuko yibema yahiana ya tungonde eswe.

¹⁵ Milundu yo yikulu yikalumbame ni mihuko yibema.

¹⁶ Chifuchi cho chizale ni yuma yeswe yibema. Chiwahe ni utu wa Mwene Zambi, yoze wahanjikile mu chibuta cha kahia. Awahise kama vungu lia Josefe ni yiwape yino, mumu iye mwe wabwile kasongo mukachi ka ayayo.

¹⁷ Josefe yabwa ni tachi ngwe kuji a ngombe, kali ni mbinga ngwe ja kuji a mbau. Mbinga jenyi jili tununu twa Amanase ni tununu kumi twa Aefraime. Kaakushinjika najo mavungu ni kwatwala ku mambango eswe a hashi.”

¹⁸ Hakutwala ku vungu lia Zabulone ni Isakare yamba ngwenyi: “Zabulone akalibichise ha kulanda ni kulanjisa ha kalunga lwiji, Isakare akalibichise ku zuwo lienyi.

¹⁹ Kakulakenya yilambala ha milundu yo, kwenako akulambwila milambu yinalite. Kaakwanda ubite wo ku kalunga lwiji, ku masekeseke ku mbumbulu ya kalunga lwiji.”

²⁰ Hakutwala ku vungu lia Gade yamba ngwenyi: “Halisa Zambi, yoze unatohwesa chifuchi cho. Gade kakuutama ngwe tambwe yoze unahaula kwoko ni kupapulula mutwe.

²¹ Yaalitambwila Chihanda chibema chahiana cha chifuchi. Yaaha Chihanda chize chinalite ni mwata. Yaafunga Shimbi ni yiyulo ya Mwene Zambi, muze miata ja Aisraele akungulukile hamuwika.”

²² Hakutwala ku vungu lia Dane yamba ngwenyi: “Dane kali mwevu wa tambwe, kakukatuka ni kunyangumuka ku chifuchi cha Bashane.”

²³ Hakutwala ku vungu lia Naftali yamba ngwenyi: “Mwene Zambi ni utu wenyi yawahisa Naftali kuhiana. Chifuchi cho chinalitande ku sude ya chitende cha Galilea.”

²⁴ Hakutwala ku vungu lia Ashere yamba ngwenyi “Mwene Zambi yawahisa Ashere kuhiana mavungu akwo. Anakwo amuzange kama kuhiana. Chifuchi chenyi chibwe ni mitondo yinji ya olive.

²⁵ Membo jenyi aafunge kama ni yajilo ya utale, akatwame matangwa eswe ni uhwimino.”

²⁶ Yenu Aisraele, kukushi Zambi mukwo yoze walifwa ni Zambi yenu. Kakuzomboka mu uhenya kwilu, kakuzomboka mu malelwa ha kukukwasa.

²⁷ Mukulu Zambi habwa chiswamo che ku miaka yeswe, moko jenyi kaakukufunga ku miaka yeswe. Hanahange akwa kole ku meso je, yamba ngwenyi: “Ononenu eswe.”

²⁸ Chenacho vungu lia Yakoba anatwama mu uhwimino, mu chifuchi chize chinazala ni mbuto ni vinyu, kuze lilu liakumwangina mume.

²⁹ Israele, mama, cho kuwaha che! Kukushi yoze walifwa ni yena, vungu lize Zambi hanalamwina. Mwene Zambi kali lukebwe we ni mukwale we, ha kukufunga ni kukukwasa kukumba. Akwa kole je maakeza ni kukwita keke, alioze yena mukaaliachila hashi.