Shimbi 32 - Mukanda Wa Zambi 1970

¹ “Hashi ni lilu, banjikenu maliji jami, banjikenu kanawa yize ngunambe.

² Longeso liami mulikabwa ngwe chize akunoka vula, mulikalumbama hashi ngwe mume. Maliji jami maakabwa ngwe vula ha mashinde aha, ngwe chize vula akuwayangila ha sepe.

³ Munguhalisa jina lia Mwene Zambi, ni atu jenyi maambujola unene wenyi.

⁴ “Mwene Zambi kali liwe, ndako jenyi jili jingunu ni ja ululi. Zambi yenu kali mukwa kushishika ni wa umwenemwene, kakulinga yuma ya ululi ni yize yinalite.

⁵ Alioze yenu nuli yihulia, kunwatelele kubwa atu jenyi, vungu lia shili ni lia kwonga.

⁶ Yenu yihepuke akwa ngwaza, kuma chenacho nwakulinga kuli Zambi, nyi? Kali tatenu, tangi yenu, hananupwisa vungu.

⁷ “Iwulukenu yize yabalikile ha miaka yikulu; hulenu atatenu anulweze yize yabwile ko, hulenu tushinakaji hanga anwambulwile yuma yikulu.

⁸ Zambi Mwilu Mwahiana hanatetela mavungu yifuchi yo; hanalulikila atu kuze chaatamba kutwama. Yaafunjikila njiza ja mavungu, yaaha vungu ni vungu mukwa mwilu wenyi.

⁹ Alioze yalitongwela vungu lia Yakoba kubwa lume nienyi.

¹⁰ “Yaawana te kaanendangana mu puya, mu puya yamokomoko ni ya fuji yinji, Yaalela, yaafunga ngwe chize mutu akufunga liso lienyi.

¹¹ Ngwe chize tela akulongesa ana jenyi kuhumuka, ni kwazundula kanawa ha mapulwa jenyi, chenacho Mwene Zambi akufunga Aisraele, kuchina maalimbuka

¹² Mwene Zambi wika yasongwela atu jenyi, hi ni kukwasa ko cha zambi ya yilambala.

¹³ “Yatayiza kutwama ha milundu, no yaalia yize yakutatuka mu minda. Yaawana wuchi wa mu yambu mu mawe. Mitondo yo ya olive yiima kanawa ha mavu a mawe.

¹⁴ Ngombe jo ni pembe jo yaabwa ni yamwa yinji; yaabwa ni mapanga, ni pembe, ni ngombe abema kuhiana, ni tiriku ni vinyu yibema yihiana.

¹⁵ “Atu ja Mwene Zambi yaabwa pichi, alioze yaabwa yihulia. Yaatohwa mumu ha kulia chinji. Yeehuka Zambi tangi yo, yaalituna chilamwina cho mukwa ndundo.

¹⁶ Zambi yevwa ukwa mumu ha mahamba jo, yevwa ufwatulo mumu ha yibi yo.

¹⁷ Aisraele yaalambula milambu kuli mazambi amokomoko, mazambi aha waze tushakulu two kaanyigikine ko, mazambi waze Aisraele koononokenene ko nichimwe.

¹⁸ Yaavulama Zambi yo, Chilamwina cho mukwa ndundo, yoze waahele mwono.

¹⁹ “Muze Mwene Zambi hachimona, yevwa ufwatulo, yalituna ana jenyi a malunga ni a mapwo.

²⁰ Yamba ngwenyi: ‘Chichi kwakwasa nawa. Mutumona chize maalinga, akwa pami kanda yihulia.

²¹ Yaanguvwisa ufwatulo ni mahamba jo, yaanguvwisa ukwa ni waze akuvuluka ngwo, mazambi, alioze hi mazambi amwenemwene ko. Kashika mungukatambika amwe atu, hi vungu liamwenemwene ko, ha kwevwisa ufwatulo; mungukeevwisa ukwa ni limwe vungu lia yihepuke.

²² Ufwatulo wami muubwa ngwe kahia kaze mukakocha yuma yeswe hashi. Mukocha hashi ndoo mu chifuchi cha afu ni kunongesa milundu kushi.

²³ “ ‘Mungukaamwesa lamba liahiana mungukaasa mivwi yami yeswe.

²⁴ Kumaakafwa ni zala ni kachiki. Maakafwa ni misongo yikalu. Mungukaatumina tushitu asasu ha kwaseleka, ni tupela a ulembe ha kwasuma.

²⁵ Jita muyikaneha kufwa mu majila. Atu maakahongonoka ni mwongo mu mazuwo jo. Akweze a malunga ni a mapwo, ni ana akemba, ni tushinakaji, kumaakafwa.

²⁶ Nambile kwaashiha eswe lukombo, hanga niumwe kechi keewuluka.

²⁷ Alioze chatayijile akwa kole jo kulisamba ngwo, hitwaakumba, mumu hingunoonona yami mwene.’

²⁸ “Aisraele kaali vungu lize keeshi mana, keeshi malinjekela ni hakepe.

²⁹ Nyi te kaali akwa mana kachi maanyingika, mumu yika haanonga, kachi maamona kama songo lio.

³⁰ Mumu yika mutu umuwika akumbile atu kanunu, ni atu aali tununu kumi? Mumu Mwene Zambi, Zambi yo, haanehuka; Zambi yo, mukwa ndundo, hanoombu nyima.

³¹ Akwa kole jo kaananyingika ngwo, mazambi jo ene keeshi tachi, keeshi ndundo ngwe Zambi ya Aisraele.

³² Akwa kole jo kaali akwa uhenge ngwe Sodome ni Gomora, kaali ngwe mitondo ya vinyu yize yili ni mihuko yisasu ni ya ulembe,

³³ ngwe vinyu yakulinga ni ulembe wa tupela.

³⁴ “Mwene Zambi kaneuluka chize akwa kole jo alingile Aisraele; kakushimbwila tangwa lize linalite ha kwamwesa lamba.

³⁵ Mwene Zambi makaakala, ni kumwesa akwa kole lamba. Tangwa muukeza lize maakalimbuka; tangwa lia lamba lio hiliakundama.

³⁶ Mwene Zambi makalamwina atu jenyi muze makamona ngwenyi, tachi jo hijahwa. Makevwila keke waze akumulingila, muze makamona ngwenyi, keeshi tachi.

³⁷ Mba Mwene Zambi makahula atu jenyi ngwenyi: ‘Mazambi jenu a tachi hali waze nwashachilile kuli ali?

³⁸ Nwaalishile maji a milambu yenu, nwaanwishine vinyu ya milambu ya kunwa. Matumone nyi kumeeza ha kunukwasa; Azomboke hanga anulamwine.

³⁹ “ ‘Yami wika nguli Zambi. Kukushi zambi mukwo wamwenemwene. Nakushiha, nakupwisa ni mwono; nakulemeka, nakuwuka. Kukushi niumwe yoze malamwina mutu ku kwoko liami.

⁴⁰ Ngunolola kwoko liami nikulishinga ngwami, ni mwe yami mwene, ngwami:

⁴¹ Munguhela mukwale wami wa kwambuka, mungulinga nikulita ni ululi. Mungulikala kuli akwa kole jami ni kumwesa lamba waze akunguvutwokela.

⁴² Mivwi yami muyisotoka ni manyinga jo, mukwale wami muushiha eswe waze akulimika ni yami. Chichi kwecha niumwe yoze wakulitachika ni yami, chibwe akwa yilonda ni funge kumaakafwa.’

⁴³ “Yenu mavungu, chichimiekenu atu ja Mwene Zambi. Zambi kakumwesa lamba eswe waze akushiha atu jenyi. Kaakwakala kuli akwa kole jo, Kaakukonekena atu jenyi milonga yo.”

⁴⁴ Mose ni Yoshua mwana wa Nune yaahanjika mwaso uno, hanga Aisraele awivwe.

Longeso liakusula lia Mose

⁴⁵ Muze Moze hamanununa kulongesa atu maliji wano,

⁴⁶ yamba ngwenyi: “Kanyamenu ha kufunga Shimbi jino jeswe jize hinanulongesa musono. Nukajilongese ana jenu, hanga no akajifunge kanawa.

⁴⁷ Shimbi jino hi jamokomoko ko; jili mwono wenu. Jifungenu, mba munukabwa ni mwono matangwa anji mu chifuchi cha musali lia Yordau chize nunayi ni kuzuka.”

⁴⁸ Ha tangwa lizeliene Mwene Zambi yambila Mose ngwenyi:

⁴⁹ “Yako ku milundu ya Abarime mu chifuchi cha Moabe talanganyi ni limbo lia Yeriku, kanduka ha mulundu wa Nebo ni kutala mu chifuchi cha Kanana chize ngunambe kuhana kuli Aisraele.

⁵⁰ Yena muufwila ha mulundu uze ngwe chize afwile yayenu Arone ha mulundu wa Hore,

⁵¹ mumu yenu eswe aali kunwabwile ko akwa kushishika kuli yami ku meso ja Aisraele. Muze nwabwile ku meya ja Meriba, hehi ni Kadeshe mu puya ya Zine, yinungulelesa ku meso ja atu.

⁵² Chifuchi muuchimwena kusuku, alioze kuuchi kunjila mu chifuchi chize ngunahana kuli Aisraele.”