Shimbi 31 - Mukanda Wa Zambi 1970

Yoshua yahinga Mose

¹ Mose yaweza ha maliji wano kuli Aisraele,

² ngwenyi: “Hinabwa kulu ni miaka kulakaji ni makumi aali, hi chichi kubwa nawa kasongo kenu. Mwene Zambi hangwamba ngwenyi: ‘Kuuchi kazauka Yordau.’

³ Mwene Zambi, Zambi yenu, mwe manutetekela ni kwonona mavungu waze atwama ko, mba nukahase kuzuka chifuchi cho. Yoshua mwe makabwa kasongo kenu, ngwe chize ambile Mwene Zambi.

⁴ Mwene Zambi makonona atu waze ngwe chize onwene Sihone ni Oge, mianangana ja Aamore, ni chifuchi cho.

⁵ Mwene Zambi makanukwasa ha kwakumba, ni yenu chatamba kwalinga ngwe chize hinanulweza musono.

⁶ Takamenu nujikize. Kanda nwivwa woma. Mwene Zambi, Zambi yenu, iye mwene makabwa hamwe ni yenu. Kechi kanuhichika hanji ku numba nyima.”

⁷ Mba Mose yatambika Yoshua, yamwamba ku meso ja Aisraele eswe, ngwenyi: “Takama, jikiza. Yena mwe muubwa kasongo ka atu wano ha kuzuka chifuchi chize Mwene Zambi alakenyene tushakulu two.

⁸ Mwene Zambi mwe makakusongwela, makabwa hamwe ni yena. Kechi kakuhichika hanji kukwehuka, kashika kanda ulekumuka kanda wivwa woma.”

Je Shimbi chatamba kutanga ha mwaka weswe wa muchishimbiali

⁹ Mose yasoneka Shimbi ja Zambi, yajihana kuli miata ja Aisraele, ni mahako, ana ja Alevi a malunga, waze te akufunga mushete wa Usendo wa Mwene Zambi ni atu.

¹⁰ Yaaha Shimbi ngwenyi: “Ku songo lia mwaka weswe wa muchishimbiali, muze mwaka wa kutusuka hiwakundama, Shimbi jino jitangenu ku meso ja atu eswe ha chiwanyino cha Yikulika.

¹¹ Jitangenu kuli Aisraele eswe muze aneza ni kuwayila Mwene Zambi, Zambi yenu, homa hamuwika haze makatongola ha kuwayila.

¹² Kungululenu atu eswe, malunga, ni mapwo, ni ana, ni yilambala waze atwama mu membo jenu, hanga mutu mweswe alivwile jo, alilongese kulemesa Mwene Zambi, Zambi yenu, ni kufunga Shimbi jenyi kanawa.

¹³ Ha chino ana jenu waze kanda evwa kama Shimbi ja Mwene Zambi, Zambi yenu, maakajivwa. No maakalilongesa ha kumwononokena matangwa eswe waze munukatwama mu chifuchi chize nunayi ni kuzuka musali lia Yordau.”

Longeso lia Mwene Zambi liakusula kuli Mose

¹⁴ Mba Mwene Zambi yambila Mose ngwenyi: “Matangwa a kufwa che haakunduma. Tambika Yoshua uye nenyi ku zuwo lia Zambi, hanga nguhase kumulongesa.” Mose ni Yoshua yaaya ku zuwo lia Zambi.

¹⁵ Mwene Zambi yaasolokela ko mu lelwa lialifwa ngwe nguji lize liamanyine ku chikolo cha zuwo lia Zambi.

¹⁶ Mwene Zambi yambila Mose ngwenyi: “Kwasala hakepe ufwe. Muze hiwafwa atu wano kumaakashiha Usendo uze nakolesele no. Kumaakangwehuka ni kuwayila mazambi ja mavungu a mu chifuchi chize anambe kunjila.

¹⁷ Muze yuma yino muyikabwa, mungukeevwila ufwatulo. Mungukeehuka ni mungukoonona. Lamba linji maakamona, mba maakanyingika ngwo: ‘Yino yeswe yatuwana mumu Mwene Zambi hatwehuka.’

¹⁸ Mungukalituna ha kwakwasa, mumu haanalingi chibi ha kuwayila mazambi eka.

¹⁹ “Haliabwila, Soneka mwaso uno. Uulongese Aisraele, hanga ukabwe chinyingi cha kwakumika.

²⁰ Mungwahetesa mu chifuchi chino cha chinuno, ngwe chize nalakenyene tushakulu two. Kwenako maakabwa ni yakulia yeswe yize anazange, maakatwama kanawa. Alioze kumaakatewuluka ni kuwayila mazambi eka. Kumaakangwehuka ni kushiha Usendo wami.

²¹ Lamba linji maakamona. Alioze mwaso uno maakawimbamba. Muukabwa chinyingi cha kwakumika. Chibwe haliabwila, shimbu kanda nguchahetesa mu chifuchi chize naalakenyene, ngunanyingika manyonga jo.”

²² Tangwa lizeliene Mose yasoneka we mwaso, yaulongesa Aisraele.

²³ Mba Mwene Zambi yambila Yoshua mwana wa Nune ngwenyi: “Takama, hamuka, yena muukahetesa Aisraele mu chifuchi chize naalakenyene. Mungukabwa hamwe ni yena.”

²⁴ Muze Mose hamanununa kusoneka maliji eswe a Shimbi mu mukanda,

²⁵ yaambila mahako Alevi, waze te akufunga mushete wa Usendo wa Mwene Zambi ni atu, ngwenyi:

²⁶ “Anda mukanda uno wa Shimbi ja Mwene Zambi ni kuusa ku sali lia mushete wa Usendo wa Mwene Zambi, Zambi yenu, hanga ukabwe chela ha kunukumika.

²⁷ Ngunanyingika pami jo ni kukolema cho. Haanalimika ni Mwene Zambi ha matangwa eswe a mwono wami, kumaakalimika nenyi kuhiana muze hinafwa.

²⁸ Kungululenu miata ni akwa kuyula jenu eswe ku meso jami, hanga nguhase kuhanjika no yuma yino. Mungutambika lilu ni hashi ha kubwa yela jami ha kwakumika.

²⁹ Ngunanyingika ngwami, muze hinafwa, atu kumaakabwa yingulungulu, maakalituna longeso liami. Kulutwe, maakamona lamba, mumu maakasangumuna ufwatulo wa Mwene Zambi ha kulinga yize aakanjishile.”

Mwaso wa Mose

³⁰ Mba Mose yahanjika maliji a mwaso muze te Aisraele eswe anabanjika, ngwenyi: