Shimbi 30 - Mukanda Wa Zambi 1970

Kuhiluka kuli Mwene Zambi

¹ “Haliabwila tongolenu chize nunazange, yiwape hanji Shingo. Muze yuma yino yeswe muyikanuwana, nyi hinwatwama kulu mu yifuchi kuze Mwene Zambi yenu hananumwangina, munukewuluka kutongola chize hinanwamba.

² Nyi yenu ni vungu lienu munutewuluka kuli Mwene Zambi ni mbunge jenu jeswe ha kwononoka ku yiyulo yenyi yize ngunanulongesa musono,

³ kachi Mwene Zambi, Zambi yenu, makanuvwila keke. Makanuchiza ku mavungu kuze anumwanginyine, mba makanuwahisa nawa.

⁴ Chibwe hananumwangina ku masongo a hashi, hindu Mwene Zambi, Zambi yenu, makanukunga nawa ni kunuhilwisa.

⁵ Mba munukatambula nawa chifuchi chize atwamine tushakulu twenu hatangu. Makanuwahisa nawa, makanwokesa kuhiana tushakulu twenu.

⁶ Yenu ni vungu lienu Mwene Zambi makanwaha mbunge ja kwononoka, hanga nukamuzange ni mbunge jenu jeswe, nukanyongonone mu chifuchi chize.

⁷ Makashinga akwa kole jenu waze anubinjishile ni mashingo waze anushingile no yenu.

⁸ Munukamwononokena nawa ni kufunga Shimbi jenyi jeswe jize ngunanulongesa musono.

⁹ Mwene Zambi, Zambi yenu, makanuwahisa mu yeswe yize munukalinga. Munukabwa ni ana anji ni ngombe anji. Minda yenu muyikema mbuto ja kulumbama. Makevwa kuwaha ha kunuwahisa ngwe chize awahishile tushakulu twenu,

¹⁰ alioze yenu chanutamba kumwononokena ni kufunga Shimbi jenyi jeswe jize jinasonewa mu mukanda uno wa longeso lienyi. Chanutamba kutewuluka kuli iye ni mbunge jenu jeswe.

¹¹ “Shimbi yino ngunanulongesa musono hi yikalu ko ha kuyifunga.

¹² Kuyishi mwilu, mba hanga nuhule ngwenu: ‘Iya mahasa kuzezuka kama ni kutuhulumwina yo, mba hanga tuhase kuyivwa ni kuyononokena?’

¹³ Kuyishi musali lia kalunga lwiji, mba hanga nuhule ngwenu: ‘Iya mazauka kama kalunga lwiji atunehene yo, hanga tuhase kuyivwa ni kuyononokena?’

¹⁴ Ka, yili hanohene. Nunayinyingika, munuhasa kuyihanjika, hiyilingenu.

¹⁵ “Musono kashika tongolenu chize nunazange, chibema hanji chibi, mwono hanji kufwa.

¹⁶ Nyi munufunga Shimbi ja Mwene Zambi, Zambi yenu, jize ngunanulongesa musono, nyi munumuzanga, ni kumwononokena, mba munukawaha, munukabwa vungu linene, Mwene Zambi, Zambi yenu, makanuwahisa mu chifuchi chize nunayi ni kuzuka.

¹⁷ Alioze nyi munukolema Shimbi, kujibanjika ka, munupianguka ni kuwayila mazambi eka,

¹⁸ makanwonona. Ngunanukanyamisa shimbu linoliene. Kunuchi katwama mo matangwa anji mu chifuchi chize nunambe kuzuka musali lia Yordau.

¹⁹ Haliabwila tongolenu chize nunazange, mwono hanji kufwa, yiwape hanji Shingo. Ngunatambika lilu ni hashi ha kushindakenya chize munutongola. Ngwami, tongolenu mwono.

²⁰ Zangenu Mwene Zambi, Zambi yenu, ni kumwononokena. Bwenu akwa kushishika, mba yenu ni ana jenu munutwama miaka yinji mu chifuchi chize hanalakenya kuhana kuli tushakulu twenu, Abrahama, ni Isake, ni Yakoba.”