Shimbi 3 - Mukanda Wa Zambi 1970

Aisraele yaakumba mwanangana Oge

¹ “Hohene yitutewuluka, yituya ku norde ku chifuchi cha Bashane. Mba Oge, mwanangana wa ku Bashane, yatuhuka ni kutubatwiza hamwe ni tujita twenyi eswe, ha kwasa jita ni yetu ku limbo lia Edrei.

² Alioze Mwene Zambi yangwamba ngwenyi: ‘Kanda numwivwa woma. Mungumukunjika mu moko jenu, hamwe ni tujita twenyi, ni che chifuchi chenyi cheswe. Mulingenu ngwe chize nunakalinga Sihone mwanangana wa Aamore yoze te wakuyula mu Heshbone.’

³ “Chenacho nawa Mwene Zambi akunjikile Oge ni e atu jenyi mu moko jetu, yitwanongesa eswe, niumwe kasalile ko ni mwono.

⁴ Ha shimbu lizeliene yitutambula membo jenyi eswe, limbo nilimwe kuliasalile ko lize twasele kenu. Membo eswe makumi asambano yitwaatambula mu chifuchi cheswe cha Argobe, muze te akuyula mwangana Oge wa ku Bashane.

⁵ Membo wano eswe abwile akukoleka ni yipanga yisuku, ni yajilo ni mitondo ya kuyikashila nayo. Yitutambula nawa yihunda yikwo yinji yize kuyishi yipanga.

⁶ Yituwa membo eswe ni yitushiha malunga, ni mapwo, ni ana, eswe ngwe chize twalingile nawa mwanangana Sihone wa ku Heshbone.

⁷ Yitububa ngombe eswe ni yikumba yeswe ya mu membo.

⁸ “Ha matangwa waze yitukumba mianangana aali ja Aamore ku sali lia chivumbuko cha Yordau, chize ku lwiji Arnone ndoo ku mulundu wa Hermone.

⁹ (Akwa Sidone te kaakuvuluka mulundu wa Hermone ngwo; Sirione; Aamone ngwo; Senire.)

¹⁰ Yitutambula chifuchi cheswe cha mwanangana Oge wa ku Bashane: membo ja ku tunda, ni Yifuchi ya Gileade ni Bashane, ndoo ku membo ja Saleka ni Edrei ku chivumbuko.”

¹¹ (Mwanangana Oge mwe wakusula wa kuli akwa Refaime. Kusuhwa cha muhela wenyi, metro jiwana, wakulinga ni utale, kutohwa chawo hehi ni metro jaali nikulita ni yeseko yize akwesekela nayo ha matangwa waze. Muhela wenyi kuuli mu Raba limbo lia Aamone, ndoo ni musono.)

Mavungu a ku chivumbuko cha Yordau

¹² “Muze te hitwatambula chifuchi, mavungu ja Rubene ni Gade yingwatetela chifuchi cha ku norde cha limbo lia Aroere hehi ni lwiji Arnone ni Chihanda cha ku milundu ya Gileade ni e membo jako.

¹³ Chipinji cha vungu lia Manase yiingwaha Chihanda chize chasalile ko ni Chihanda cheswe cha Bashane, kuze te akuyula Oge, kafwa ngwe chifuchi cheswe cha Argobe.” (Bashane kaakuchivuluka ngwo: chifuchi cha Refaime.

¹⁴ Jaire, wa ku vungu lia Manase, yatambula chifuchi cheswe cha Argobe, kafwa ngwe Bashane, ndoo ku njiza ya Geshure ni Maka. Yihunda yikwo yaayiluka majina a iye mwene. Ndoo ni musono kaakuyivuluka ngwo yihunda ya Jaire.)

¹⁵ “Yinguhana Gileade ku jimo lia Makire wa ku vungu lia Manase.

¹⁶ Ku mavungu ja Rubene ni Gade yingwaaha chifuchi cheswe, chize ku Gileade ndoo ku lwiji Arnone. Mukachi ka lwiji yoze mwe mwabwile njiza ya ku sude; njiza ya ku norde te lwiji Jaboke. Chihanda cha lwiji Jaboke chabwile nawa njiza ya Amone.

¹⁷ Njiza ya ku chitokelo yiiheta ndoo ku lwiji Yordau, chize ku chitende cha Galilea ku norde ndoo ku chitende cha kufwa ku sude; ni ndoo ku mulundu wa Pisga ku chivumbuko.

¹⁸ “Ha matangwa waze, yingwaaha Shimbi ngwami: ‘Mwene Zambi, Zambi yetu, haananwehe chifuchi chino cha ku chivumbuko cha Yordau nuchizuke. Haliabwila tujita twenu a tachi alipakate, nwatume hanga azauke Yordau kulutwe lia mavungu akwo ja Israele, akwase ha kuzuka che chifuchi.

¹⁹ Alioze mapwo, ni ana, ni ngombe jenu (mumu ngunanyingika nuli ni ngombe anji) kumaakasala mu membo jenu waze nanuhele.

²⁰ Kwasenu usoko wenu Aisraele ha kuzuka chifuchi chize Mwene Zambi anaahe ku chitokelo cha Yordau, ndoo ni muze Mwene Zambi makaaha uhwimino, ngwe chize hanwaha yenu. Munukabwamuze munukahiluka mu chifuchi chino nanuhele.’

²¹ “Mba yingulongesa Yoshua ngwami: ‘Hiwamona yeswe yize Mwene Zambi, Zambi ye, halinga kuli mianangana waze aali, Sihone ni Oge. Chenacho makalinga nawa kuli mianangana eswe muze munukazauka.

²² Kanda nwevila woma, mumu Mwene Zambi, Zambi yenu, makanwashila jita.’ ”

Mwene Zambi katayijile ko Mose kunjila mu Kanana

²³ “Ha matangwa waze yinguliumba ni mbunge yeswe ngwami:

²⁴ ‘Mwene Zambi, hiunabutuka kulweza unene we ni ndundo je kuli yami kavumbi ke. Zambi mukwo uliko hano hashi yoze mahasa kulinga yuma yinene ngwe yize hiwalinga yena, nyi?

²⁵ Mwene Zambi, ngutayize kama nguzauke Yordau, hanga ngumone chifuchi cha chinuno cha musali, ni ubeme wa mikandu yamo ni wa milundu ya Libano.’

²⁶ “Alioze Mwene Zambi hikangubanjikile ko, yangutenukina mumu hali yenu, yangwamba ngwenyi: ‘Hikwahwa! Kanda wambamo nawa!

²⁷ Kanduka ha mulundu wa Pisga, utale ku norde ni ku sude ni ku chivumbuko ni ku chitokelo. Ushishika kanawa yize muumona, mumu kuuchi kuzauka Yordau nichimwe.

²⁸ Longesa Yoshua, mukolese, atakame, mumu iye mwe makasongwela atu ha kuzauka ni kuzuka chifuchi chize muumona.’

²⁹ “Chenacho twatwamine mu chikulo hatalanganyi ni limbo lia Betpeor.”