Shimbi 29 - Mukanda Wa Zambi 1970

Usendo wa Zambi ni Aisraele mu chifuchi cha Moabe

¹ Jino je Shimbi ja Usendo uze Mwene Zambi alwezele Mose ha kuukolesa ni Aisraele mu chifuchi cha Moabe. Yaweza yino yeswe ku Usendo uze Mwene Zambi akolesele hamwe no ha mulundu wa Sinai.

² Mose yakungulula Aisraele eswe, yaamba ngwenyi: “Yenwene hinunamono yize Mwene Zambi alingile kuli mwanangana wa Egiptu, ni akwa kuyula, ni mu chifuchi chenyi cheswe.

³ Nwamwene yeseko yahiana, ni yilayi, ni yuma yinene ya kukomwesa yize alingile Mwene Zambi.

⁴ Alioze ndoo ni musono kanutayijile ko kunyingika yize yeswe ni kuyisa chinyingi.

⁵ Mwene Zambi yanutwala mu puya ha miaka makumi awana. Mahina jenu ni sapato jenu kujaatanwokene ko.

⁶ Kunwalile ko mbolo hanji vinyu hanji Chuma chisasu, alioze Mwene Zambi yanwaha yeswe yize nwahonene ha kunulongesa hanga nunyingike ngwenu, kali Mwene Zambi, Zambi yenu.

⁷ Ni muze twejile kuma kuno, mwanangana Sihone wa ku limbo lia Heshbone ni mwanangana Oge wa ku chifuchi cha Bashane yaatuhuka ha kulimika ni yetu. Alioze yitwakumba,

⁸ yitutambula chifuchi cho, yituchiteta mukachi ka mavungu a Rubene ni Gade, ni Chipinji cha vungu lia Manase.

⁹ Kashika ononokenu ku maliji eswe a Usendo uno, mba hanga nukawahe kanawa ku yize yeswe munukalinga.

¹⁰ “Musono hinwamana ku meso ja Mwene Zambi, Zambi yenu, eswe a kuli yenu, miata jenu hamwe ni akwa kuyula, ni malunga,

¹¹ ni mapwo, ni ana jenu, ni yilambala waze atwama mukachi kenu waze akunuchayila kunyi ni kunutahila meya.

¹² Musono nuli hano ha kutayiza Usendo uno ni Shimbi jawo jize Mwene Zambi, Zambi yenu, hanakolesa ni yenu,

¹³ hanga ahase kunutakamisa ha kubwa atu jenyi, neye abwe Zambi yenu, ngwe chize alakenyene kuli tushakulu twenu Abrahama, ni Isake, ni Yakoba.

¹⁴ Hi yenu wika ko Mwene Zambi hakolesa nenu Usendo uno ni Shimbi jawo.

¹⁵ Kaukolesa nawa hamwe ni eswe waze anamana kuno ku meso jenyi musono ni kuli vungu lietu waze kanda achisemuka.

¹⁶ “Iwulukenu ngwe chize twabwile mu Egiptu ni chize twendele mu chifuchi cha mavungu akwo.

¹⁷ Nwamwene mahamba jo a yizelwokeso akulinga ni mitondo, ni mawe, ni prata, ni oru.

¹⁸ Kanyamenu hanga chibwe lunga hanji pwo, chibwe jiko hanji vungu, waze anamana hano musono, moomba Mwene Zambi, Zambi yetu, nyima ni kuwayila mazambi a mavungu eka. Nyi ka, muka chi kenu mumubwa muji uze muutatuka ni kubwa usasu ni wa ulembe.

¹⁹ Kanyamenu musono kanda kubwa umwe hano, yoze hevwa maliji wano ni maliwahisa iye mwene ngwenyi, yeswe muyibwa kanawa, chibwe menda ni kukala cha mbunge yenyi. Muchihasa kwonona eswe a kuli yenu, ni abema ni abi.

²⁰ Mwene Zambi kechi kakonekena mutu ngwe yoze, alioze makamuvwila ufwatulo kuhiana. Mashingo eswe waze hasonewa mu mukanda uno makamushata, ndoo ni muze Mwene Zambi makamwonona liakulu.

²¹ Mwene Zambi makamupwisa chilweza ku meso ja mavungu eswe ja Aisraele, ni kumumwesa lamba nikulita ni mashingo a mu Usendo wa ku mukanda uno wa longeso lia Mwene Zambi.

²² “Mu yisemuko ya kulutwe vungu lienu ni yilambala a mu yifuchi yikwo ya kusuku kumaakamona misongo ni lamba yize Mwene Zambi makaneha mu chifuchi chenu.

²³ Minda yenu muyikabwa ni mbwemena, ni fundanga, ni mungwa. Atu keechi katumba nichimwe, chibwe yambu yamokomoko kuyichi kasoka. Chifuchi chenu muchikabwa ngwe membo ja Sodome ni Gomora, ni Adma, ni Zeboime, waze Mwene Zambi onwene mu ufwatulo wenyi.

²⁴ Mba akwa hashi eswe maakahula ngwo: ‘Mumu yika Mwene Zambi halinga chino mu chifuchi cho? Ufwatulo wenyi waka?’

²⁵ Kumbululo mulikabwa ngwo: ‘Mumu atu je Mwene Zambi hashiha Usendo uze akolesele ni tushakulu two, muze aatuhwishile mu chifuchi cha Egiptu.

²⁶ Yaalingila mazambi eka, waze te kanda achiwayila kama nilimwe tangwa, mazambi waze Mwene Zambi akanjishile ha kwawayila.

²⁷ Kashika Mwene Zambi hevwila atu jenyi ufwatulo ni haneha lamba lino heswe ha chifuchi cho lize linasonewa mu mukanda uno.

²⁸ Mwene Zambi hevwa ufwatulo. Mu ufwatulo wenyi unene haachiza mu chifuchi cho, haakonga mu chifuchi cha yilambala, kwenako ali ndoo ni musono.’

²⁹ “Kuli yimwe yuma yize Mwene Zambi anasweke; alioze hanasolola Shimbi jenyi, hanga yetu ni vungu lietu tujononokene ndoo ku miaka yeswe.”