Shimbi 28 - Mukanda Wa Zambi 1970

Yiwape ya kwononoka

¹ “Nyi munwononokena Mwene Zambi, Zambi yenu, ni kufunga Shimbi jenyi jeswe jize ngunanulongesa musono, makanupwisa anene kuhiana mavungu akwo a hano hashi.

² Ononokenenu Mwene Zambi, Zambi yenu, mba yiwape yino yeswe muyibwa niyenu.

³ “Mwene Zambi makawahisa membo jenu ni minda yenu.

⁴ “Mwene Zambi makanuwahisa nikunwaha ana anji, ni mbuto yakulumbama, hamwe ni ngombe ni mapanga anji.

⁵ “Mwene Zambi makawahisa mbuto jenu ni ye yakulia yize munukalulieka.

⁶ “Mwene Zambi makawahisa yuma yeswe yize munulinga.

⁷ “Mwene Zambi makakumba akwa kole jenu waze ananukatukila. Maakanuseleka sali limwe, alioze maakachinyina kuli yenu sali lieswe.

⁸ “Mwene Zambi, Zambi yenu, makawahisa milimo yenu, makazalisa machila jenu ni mbuto. Makanuwahisa mu chifuchi chize ananwehe.

⁹ “Nyi nwononoka kuli Mwene Zambi, Zambi yenu, nikulinga yeswe yize ananwambe, makanupwisa lume atu jenyi ngwe chize alakenyene.

¹⁰ Mba akwa hashi eswe maakanyingika ngwo, kuma Mwene Zambi wanutongwele ha kubwa lume atu jenyi: no maakanuvwila woma.

¹¹ Mwene Zambi makanwaha ana anji, ni ngombe anji, ni mbuto ya kulumbama mu chifuchi chize alakenyene tushakulu twenu.

¹² Makanokesa vula ha matangwa jenyi, makalumbamisa ubite wa mwilu mu machila jenu ni kuwahisa milimo yenu yeswe. Mba munukasondamisa yuma kuli mavungu anji, alioze yenu kunuchi kasondama nichimwe.

¹³ Mwene Zambi, Zambi yenu, makanupwisa akwa lutwe mukachi ka mavungu, kunuchi kasauka Matangwa eswe munukabwa ni Shimbi jenyi jeswe jize ngunanulongesa musono, kunuchi kakokoloka nichimwe.

¹⁴ Alioze kanda nukakolema nichimwe ha kuwayila ni kulingila mazambi eka.”

Lamba mumu ha uhulia

¹⁵ “Alioze nyi nwakolema Mwene Zambi, Zambi yenu, kunusolo kufunga Shimbi jenyi jeswe ni yiyulo yenyi yize ngunanulongesa musono, munukamona lamba lino lieswe:

¹⁶ “Mwene Zambi makashinga membo jenu ni minda yenu.

¹⁷ “Mwene Zambi makashinga mbuto jenu ni yakulia yize munukalulieka ni ye mbuto.

¹⁸ “Mwene Zambi makanushinga ha kunwaha ana akepe hi anji ko ni mbuto yikepe, ni ngombe ni mapanga akepe wika.

¹⁹ “Mwene Zambi makashinga yeswe yize munukalinga.

²⁰ “Nyi ngwe nwalinga chibi ni kwehuka Mwene Zambi, makanutumina misongo, ni kubinda, ni lamba mu yeswe yize munukalinga, ndoo makanunongesa liakulu.

²¹ Makanutumina misongo yeka ni yeka yize muyikanumanununa liakulu mu chifuchi chize hananutayiza kuchizuka.

²² Mwene Zambi makanutumina misongo ya kusambuluka ni yijimbo, ni kachiki. Makatuma changa chinene, ni fuji ya chivukuminya ha kushiha mbuto yenu, Munukamona lamba lino ndoo ku kufwa chenu.

²³ Vula kechi kanoka nichimwe, ni chifuchi chenu muchikoma chau ngwe utale.

²⁴ Mwene Zambi kechi katuma vula, alioze makanutumina fuji ya fufuta ni masekeseke, ndoo yenu eswe munukanonga.

²⁵ “Mwene Zambi makakwasa akwa kole jenu ha kunukumba. Munukaaseleka sali limwe, alioze yenu munukachinyina kuli ayo sali heswe. Atu eswe a hashi maakabwa ni woma muze maakamona lamba lize hilianuwana.

²⁶ Muze munukafwa, tujila ni tushitu maakeza ni kunulia, kukuchi kabwa niumwe yoze makaahuma.

²⁷ Mwene Zambi makatuma hali yenu yivunda, ngwe chize alingile hali akwa Egiptu. Munukabwa ni mbongola. Munukazununyoka. Munukabwa ni ukuli, keechi kahasa kuyiwuka.

²⁸ Mwene Zambi makanupwisa akwa kuzaluka. Makanupwisa tupuputa, munukayambashana.

²⁹ Munukapuputa tangwa ha muchima ngwe kapuputa, kunuchi kahasa kumona muze nunayi. Kunuchi kafumbula nichimwe ku yize munukalinga. Akwa kole maakabwa ni kunumwesa lamba ni kwiya yuma yenu, kukuchi kabwa niumwe yoze makanukwasa.

³⁰ “Munukatenda mwana pwo, alioze maakamumbata kuli lunga weka. Munukatunga zuwo, alioze mutu weka makatwama mo. Munukalima munda wa vinyu, alioze kunuchi kalia vinyu yawo nichimwe.

³¹ Ngombe jenu maakaashihila kwe ku meso jenu, alioze kunuchi kalia yifwo yo nichimwe. Maakachiza yimbulu jenu ni yenuwene nunachimono, keechi kanuhilwishilo nawa. Maakahana mapanga jenu kuli akwa kole jenu, kukuchi kabwa niumwe ha kunukwasa.

³² Ana jenu a malunga ni a mapwo maakaatwala mu undungo kuli yilambala ni yenwene nunatale. Tangwa ha tangwa munukatala zaa, ni kunyonga kuhiluka cha ana jenu, alioze nichimwe.

³³ Limwe vungu lia yilambala maakambata mbuto jenu jeswe jize nwahondanganyine hanga yitatuke, alioze kunuchi katambula ko Chuma nichimwe. Makanumwesa lamba ni kunulinga chibi kuhiana.

³⁴ Munukazaluka mumu ha lamba lienu.

³⁵ Mwene Zambi makanwaha yikola ya mbongola ha molu jenu jize kunwahashile kuwuka; munukabwa ni yivunda chize ku molu ndoo ku mutwe.

³⁶ “Mwene Zambi makanutwala hamwe ni mwe mwanangana wenu ku chifuchi cha yilambala, kuze yenu hanji tushakulu twenu kanda achitwama ko kama nilimwe tangwa. Kwenako munukalingila mahamba a mitondo ni a mawe.

³⁷ Mu yifuchi yize Mwene Zambi makanumwangina, atu maakalishimwoka hakutwala ku yize muyikanuwana. Kumaakanuyingila ni kunuseha.

³⁸ “Munukalima mbuto yinji, alioze munukahela yikepe, mumu makumbi maakalia mbuto yenu.

³⁹ Munukalima minda ya vinyu ni kuyifunga, alioze kunuchi kahela mo vinyu chibwe kuyinwa mumu tututu maakayilia.

⁴⁰ Mitondo olive muyikatatuka mu chifuchi cheswe, alioze kunuchi kabwa ni maji jayo, mumu olive kumuyikalukumuka.

⁴¹ Munukasema ana a malunga ni a mapwo, alioze munukaatokesa, mumu kumaakaatwala funge mu jita.

⁴² Mitondo yenu yeswe ni ye mbuto kumaakayilia kuli tututu.

⁴³ “Yilambala waze atwama mukachi kenu kumaakaliwezela tachi nawa ni nawa, alioze tachi jenu mujikakehuluka.

⁴⁴ Maakabwa ni ubite wa kunusondamisa, alioze yenu kunuchi kabwa nichimwe chize cha kwasondamisa. Hakusula kumaakabwa akwa kunuyula.

⁴⁵ “Munukamona lamba lize heswe, ni munukabwa nalio ndoo munukanonga, mumu kunwononokenene ko Mwene Zambi, Zambi yenu, ni kufunga Shimbi jeswe jize anuhele.

⁴⁶ Lamba lize mulikabwa chilayi cha ubatwilo wa Zambi hali yenu ni ha vungu lienu ndoo ku miaka yeswe.

⁴⁷ Mwene Zambi hananuwahisa mu yuma yeswe kuhiana, alioze yenu kunwazangile kumulingila ni chiseke ni mbunge ya uwahililo.

⁴⁸ Kashika, munukalingila akwa kole jenu waze Mwene Zambi makatuma ha kulimika ni yenu. Munukabwa ni zala, ni pwila, ni uvu, ni munukahona yuma yeswe. Mwene Zambi makanubinjisa ni lamba linji ndoo munukanonga.

⁴⁹ Mwene Zambi makaneha limwe vungu lia ku songo lia hashi ha kulimika ni yenu, vungu lize kunwanyingikine liji lio. Maakabwila hali yenu ngwe tela.

⁵⁰ Mulikabwa vungu likalu, keechi kevwila niumwe keke, chibwe akweze hanji makulwana.

⁵¹ Kumaakalia ngombe jenu ni mbuto yenu, ndoo munukafwa ni zala. Keechi kahichika mbuto niyimwe, chibwe vinyu, hanji maji a olive, chibwe ngombe, hanji mapanga; ni yenu nawa munukafwa.

⁵² Maakaseleka membo jenu eswe mu chifuchi chize Mwene Zambi, Zambi yenu, ananwehe. Yipanga yisuku, yakukoleka, yize nwakujikijila, muyikalimbuka.

⁵³ “Muze akwa kole jenu maakabuzula membo jenu, munukafwa zala, kumunukalia chibwe ana jenu, waze Mwene Zambi, Zambi yenu, hananwehe.

^54-55 Chibwe umwe lunga mulemu, mukwa ngenye, makalia ana waze asemene iye mwene, mumu keshi ni yakulia yikwo. Kechi kuhana nichimwe kuli mwanakwo, chibwe kuli pwo lienyi yoze azanga, hanji kuli umwe wa kuli ana jenyi waze haasala ho.

^56-57 Chibwe umwe pwo mulemu, mukwa ngenye, yoze keshi kuliata homa habi, kumakendela ku tenga. Muze akwa kole maakabinjisa limbo lienyi, muze makahona yakulia, makalia mwe mwana ni chingoji cha mwanenyi ku tenga, muze hasema. Kechi kachiteta ni lunga lineyi yoze azanga, chibwe ni ana jenyi.

⁵⁸ “Nyi kunusolo kufunga kanawa Shimbi jeswe jize Mwene Zambi asonekene mu mukanda uno, nawa nyi kunwalemesene jina lilemu lia Mwene Zambi, Zambi yenu,

⁵⁹ makatuma hali yenu ni ha vungu lienu misongo yize niumwe kahashile kuyiwuka ni lamba lize kuliahashile kuhwa.

⁶⁰ Makanunehena nawa misongo yize nwevwilile woma mu Egiptu, kunuchi kahinduka.

⁶¹ Makatuma nawa misongo yeswe ni lamba Heswe lize kuliasonewene mu mukanda uno wa Shimbi ja Zambi, ndoo munukanonga.

⁶² Chibwe hinunabu anji ngwe matongonoshi a mwilu, hindu akepe a kuli yenu maakasala ni mwono, mumu kunwononokenene ko Mwene Zambi, Zambi yenu.

⁶³ Ngwe chize Mwene Zambi awahililile ha kunuwahisa ni kunwokesa, Chenacho makawahilila nawa ha kununongesa ni kunumwesa lamba. Makanwonona mu chifuchi chize nunayi ni kuzuka.

⁶⁴ “Mwene Zambi makanumwangina mukachi ka mavungu eswe, chize ku mbango yimwe ya hashi ndoo ku mbango yikwo. Kwenako munukalingila mahamba eka a mitondo ni mawe, waze chibwe yenu, chibwe tushakulu twenu, kunwakombelele ko hatangu.

⁶⁵ Kunuchi kawana uhwimino nichimwe, kwakwihi kuze munukavuluka ngwenu, ku chihunda chetu. Mwene Zambi makanuvwisa mwongo, ni kuhonga ku meso, ni mulekeleke.

⁶⁶ Matangwa eswe munukabwa mu utoji. Munukevwa mwongo mwalwa ni ufuku. Matangwa eswe munukabwa ni woma wa kufwa.

⁶⁷ Mbunge jenu mujikachikima ni woma ha yuma yeswe yize munukamona. Ha mwalwa weswe munukanyonga ngwenu, kachi ufuku; ha ufuku weswe nawa ngwenu, kachi mwalwa.

⁶⁸ Mwene Zambi makanuhilwisa nawa mu Egiptu mu maulungu, chibwe kanambe ngwenyi, kunuchi kahiluka ko nawa nichimwe. Kwenako munukeseka kulilanjisa yenwene mu undungo kuli akwa kole jenu, alioze niumwe wakuhi yoze makazanga kunulanda.”