Shimbi 27 - Mukanda Wa Zambi 1970

Shimbi ja Mwene Zambi jize asonekene ha mawe

¹ Mba Mose yakungulula miata ja Aisraele, yambila atu ngwenyi: “Fungenu Shimbi jeswe jize ngunanulongesa musono.

² Ha tangwa lize munuzauka Yordau ni kunjila mu chifuchi chize Mwene Zambi ananwehe, nukanda amwe mawe nukaamika ni kwashingula ni ndambo,

³ ni kusoneka ho Shimbi jino jeswe. Muze hinwanjila mu chifuchi cha chinuno chize Mwene Zambi, Zambi ya tushakulu twenu, hananulakenya,

⁴ ni muze hinwabwa musali lia Yordau, nukamika mawe wano ha mulundu wa Ebale, ni kwashingula ni ndambo ngwe chize hinanulongesa musono.

⁵ Nukatunga ko chilumbilo cha mawe a muwundu hi akubula ni utale ko,

⁶ mumu chatamba kutungila Mwene Zambi, Zambi yenu, yilumbilo ya mawe amuwundu waze keeshi kubula. Kwenako munukalambwila milambu ya kwocha.

⁷ Kwenako munukalambwila ni kulia milambu yenu ya kulivwa ni Zambi, ni kuchichimieka ku meso ja Mwene Zambi, Zambi yenu.

⁸ Ha mawe waze nwashingula ni ndambo sonekenu ho zwalala maliji eswe a Shimbi ja Zambi.”

⁹ Mba Mose yakungulula mahako ja Alevi, yambila Aisraele eswe ngwenyi: “Yenu Aisraele nungwivwa kanawa, nungubanjika. Musono hinwabwa atu ja Mwene Zambi, Zambi yenu,

¹⁰ kashika numwononokene, nufunge Shimbi jenyi jeswe jize ngunanulongesa musono.”

Mashingo ha uhulia

¹¹ Mba Mose yambila Aisraele ngwenyi:

¹² “Muze hinwazauka Yordau, mavungu wano chaatamba kumana ha mulundu wa Gerizime muze Alevi maawahisa atu: Simeone, ni Levi, ni Yuda, ni Isakare, ni Josefe, ni Benjamine.

¹³ Mavungu wano maakamana ha mulundu wa Ebale muze Alevi maashingana: Rubene, ni Gade, ni Ashere, ni Zabulone, ni Dane, ni Naftali.

¹⁴ Alevi maakakololoka ngwo:

¹⁵ “ ‘Mwene Zambi akashinge yoze malinga hamba wa mawe, hanji wa mutondo, hanji wa utale ni kumukombelela. Mwene Zambi kakuvutwokela mahamba.’ “Atu eswe maakatayiza ngwo: ‘Chibwe kama Chenacho!’

¹⁶ “ ‘Mwene Zambi akashinge yoze malelesa tato ni naye.’ “Atu eswe maakatayiza ngwo: ‘Chibwe kama Chenacho!’

¹⁷ “ ‘Mwene Zambi akashinge yoze matutulula njiza ya mwenyembo wenyi.’ “Atu eswe maakatayize ngwo: ‘Chibwe kama Chenacho!’

¹⁸ “ ‘Mwene Zambi akashinge yoze mapiangula kapuputa mu jila.’ “Atu eswe maakatayize ngwo: ‘Chibwe kama Chenacho!’

¹⁹ “ ‘Mwene Zambi akashinge yoze mahengesa ubatwilo wa yilambala, ni shiwa, ni mapwo waze haanafwisa malunga.’ “Atu eswe maakatayiza ngwo: ‘Chibwe kama Chenacho!’

²⁰ “ ‘Mwene Zambi akashinge yoze malimona ni pwo lia tato.’ “Atu eswe maakatayiza ngwo: ‘Chibwe kama Chenacho!’

²¹ “ ‘Mwene Zambi akashinge yoze mabomba ni kashitu.’ “Atu eswe maakatayiza ngwo: ‘Chibwe kama Chenacho!’

²² “ ‘Mwene Zambi akashinge yoze malimona ni ndumbwenyi wa kuli naye hanji wa kuli tato.’ “Atu eswe maakatayiza ngwo: ‘Chibwe kama Chenacho!’

²³ “ ‘Mwene Zambi akashinge yoze malimona ni nayeweno.’ “Atu eswe maakatayiza ngwo: ‘Chibwe kama Chenacho!’

²⁴ “ ‘Mwene Zambi akashinge yoze mashiha mutu ku tenga.’ “Atu eswe maakatayiza ngwo: ‘Chibwe kama Chenacho!’

²⁵ “ ‘Mwene Zambi akashinge yoze matambula ubite hanga ashihe yoze keshi mulonga.’ “Atu eswe maakatayiza ngwo: ‘Chibwe kama Chenacho!’

²⁶ “ ‘Mwene Zambi akashinge yoze keshi kwononokena Shimbi jeswe ja Zambi.’ “Atu eswe maakatayiza ngwo: ‘Chibwe kama Chenacho!’ ”