Shimbi 26 - Mukanda Wa Zambi 1970

Milambu ya mbuto

¹ “Muze hinwatambula chifuchi chize Mwene Zambi, Zambi yenu, ananwehe, ni muze hinwatwama mo,

² mutu mweswe akasa mu mutonga mbuto yitangu ya mu munda wenyi ni kuya nayo homa hamuwika haze Mwene Zambi makatongola.

³ Ukaya kuli mwata wa mahako ha matangwa waze nikwamba ngwe: ‘Haliabwila ngunashindakenya kuli Mwene Zambi, Zambi yami, hinanjila mu chifuchi chize alakenyene tushakulu twetu ha kwahacho.’

⁴ “Mwe hako atambule mutonga uze uli nawo autumbike kulutwe lia chilumbilo cha Mwene Zambi, Zambi ye.

⁵ Mba kwe ku meso ja Mwene Zambi muhanjika maliji wano ngwe: ‘Kashakulu kami kabwile Kaaramea, mukwa kwendangana ni chilambala, yatwala akwa jiko lienyi ha kutwama mu chifuchi cha Egiptu. Muze ayile ko te achili mbunga yikepe, alioze yiwookesa kuhiana ni yiwaapwisa vungu lia tachi.

⁶ Akwa Egiptu yaatumwesa lamba, yaatushinjika ni kutupwisa ndungo.

⁷ Mba yitukololoka kuli Mwene Zambi, Zambi ya tushakulu twetu, ha kutukwasa. Neye yatubanjika, yamona lamba lietu, ni kuhondangana chetu, ni luyinda wetu.

⁸ Yatutuhwisa mu Egiptu ni ndundo jenyi, yalinga yilayi ni yikomokeso ni yuma yeka ni yeka yakola mwongo.

⁹ Yatuneha kuno, yatwaha chifuchi chino cha chinuno.

¹⁰ Kashika haliabwila hinaneha kuli Mwene Zambi Chihanda cha mbuto yize hangwaha.’ “Mba munangika mutonga hashi ku meso ja Mwene Zambi ni kuwayila.

¹¹ Wahilila ni yuma yeswe yize Mwene Zambi, Zambi ye, hakwaha yena ni akwa jiko lie. Alevi ni yilambala waze atwama mukachi kenu akawahilila hamwe ni yenu.

¹² “Ha mwaka weswe wa muchitatu lambulenu chakumi cha ku mbuto yenu kuli Alevi, ni yilambala, ni shiwa, ni mapwo waze haanafwisa malunga, hanga mu Chikungulwila cheswe maakabwa ni yakulia yinji. Muze hiwalinga chino,

¹³ hanjika kuli Mwene Zambi ngwe: ‘Chakumi nichimwe chasala mu zuwo liami. Hinayihana kuli Alevi, ni yilambala, ni shiwa, ni mapwo waze haanafwisa malunga, ngwe chize wanguhele Shimbi. Chakolemene chibwe chavulamine yimwe ya ku Shimbi ye hakutwala ku chakumi.

¹⁴ Chalile ko niyimwe muze nabwile ha tanda, chatuhwishile niyimwe mu zuwo liami muze nabwile mukwa luchisa. Chahanyine milambu niyimwe kuli afu. Aa Mwene Zambi, hingunakwononokena, hinalinga yuma yeswe nikulita ni Shimbi ya mulambu wa chakumi.

¹⁵ Aa Mwene Zambi mwilu mwalinanga, tala hashi, wahisa atu je Aisraele, wahisa nawa chifuchi cha chinuno chize hiunatwehe, ngwe chize walakenyene tushakulu twetu.’ ”

Aisraele atu ja Zambi

¹⁶ “Musono Mwene Zambi, Zambi yenu, hanwaha Shimbi ha kujononokena jeswe. Kashika jononokenenu kanawa ni mbunge jenu jeswe.

¹⁷ Musono hinwatayiza ngwenu: ‘Mwene Zambi kali Zambi yetu’. Hinwalakenya ha kumwononokena, ni kufunga Shimbi jenyi jeswe, ni kulinga yeswe yize ananwambe.

¹⁸ Musono Mwene Zambi hanutayiza kubwa lume atu jenyi ngwe chize anulakenyene; hanwamba ha kwononokena Shimbi jenyi jeswe.

¹⁹ Manupwisa anene kuhiana mavungu akwo waze atangile, ni yenu munukalemesa ni kufumanyisa jina lienyi. Munubwa lume atu jenyi, ngwe chize alakenyene.”