Shimbi 25 - Mukanda Wa Zambi 1970

¹ “Nyi Aisraele aali haaya ni kulifunda ku chota, muze haasopa we mulonga, umuwika hasamba mukwo hahia.

² Nyi yoze wahia kanatela kumulamba, mwe ngaji amubombese hashi amulambe. Amulambe nikulita ni mulonga wenyi,

³ ndoo yisuho makumi awana, alioze hi kuhiana ko. Nyi ka, nwamulelesa ku meso ja mbunga.

⁴ “Kanda nukasa kata ku kanwa lia ngombe muze anazungula mbuto.”

Kanuke ahinge pwo lia yayo

⁵ “Nyi ngwe asongo ni mutu maatwama hamuwika, mba umwe wafwa, kahichikile ko mwana wa lunga, pwo yoze kanda aya ulo kuli lunga wa ku jiko lieka. Mwanakwo ya lunga yoze hafwa, ambate nyalienyi.

⁶ Mwana mutangu yoze masema ahinge mwe lunga yoze wafwile, hanga akwa jiko lienyi keechi katoka mu Israele.

⁷ Alioze nyi mwanakwo ya mwe mufu kazangile kumbata nyalienyi, mwe pwo aye kuli miata a mu limbo nikwamba ngwenyi: ‘Nyali kasolo kungumbata, kanalitunu ha kusemena yayo vungu mukachi ka Israele.’

⁸ Mba miata amusanyike ahanjike nenyi. Nyi kanashindakenya ha kulituna kumumbata,

⁹ nyalienyi wa pwo aye kulutwe lienyi ku meso ja miata, azule sapato yimuwika ya nyalienyi, amufwile mate ku meso jenyi, ni kwamba ngwenyi: ‘Alinge chino kuli lunga yoze unalitunu kusemena yayo vungu.’

¹⁰ Akwa jiko lienyi mu Israele maanyingika ngwo: ‘Akwa jiko lia mutu yoze hanazulu sapato jenyi.’ ”

Shimbi jikwo

¹¹ “Nyi malunga aali kaanazwele, mba pwo lia umwe maya akandunwine lunga lienyi kuli yoze unamulambe, mba pwo yoze makwata ku malambu ja lunga yoze,

¹² kanda numuvwila keke. Numuteta kwoko.

^13-14 “Kanda nweseka ni pezo hanji njongo ya mahuza.

¹⁵ Bwenu ni pezo hanji njongo yamwenemwene yize yinalite, hanga nukatwame miaka yinji mu chifuchi chize Mwene Zambi, Zambi yenu, ananwehe.

¹⁶ Mwene Zambi kakuvutwokela waze akulinga ni mahuza.”

Shimbi ya kushiha Aamaleke

¹⁷ “Iwulukenu ngwe chize anulingile Aamaleke muze nwakatukile mu chifuchi cha Egiptu.

¹⁸ Keevwilile ko Mwene Zambi woma, kashika yeeza kunyima nikushiha waze te haahanga.

¹⁹ Ha chino, muze Mwene Zambi, Zambi yenu, hanwaha chifuchi ni hanuhwimisa kanawa kuli akwa kole jenu eswe waze anujingilika, shihenu Aamaleke eswe, hanga niumwe keechi keewuluka nawa ndoo ku miaka yeswe. Kanda nuvulama.”