Shimbi 24 - Mukanda Wa Zambi 1970

Kushiha ulo ni kulihilukila

¹ “Twambenu, umwe lunga hambata pwo. Mabwamuze te kamuzangile, mumu hamona Chuma cha sonyi muli iye. Hohene yamusonekena mukanda wa kumulakula, yamukatwisa mu zuwo lienyi.

² Mba lunga weka yamumbata.

³ Neye nawa kamuzangile, yamusonekena mukanda wa kumulakula, yamukatwisa mu zuwo lienyi. Mba lunga yoze wa muchaali yafwa kwenyi.

⁴ Pwo ngwe yoze, lunga lienyi mutangu kanda amuhilukila nawa, mumu habwa wa luchisa. Nyi ngwe wamuhilukila nawa, muchibwa chibi ku meso ja Mwene Zambi. Kuchatambile kuvulumuna mulonga Wahiana ngwe uno mu chifuchi chize Mwene Zambi, Zambi yenu, ananwehe.”

Shimbi jeka ni jeka

⁵ “Nyi umwe lunga hambata pwo, kanda aya ku jita, chibwe ku milimo yeswawo ya mbunga. Chamutamba kwita lisesa wa mwaka umuwika, ha kutwama ku mahienyi ni kuwahilila ni pwo lienyi.

⁶ “Kanda nutambula chinu hanji mwishi ngwe chifungo mumu, nyi nwachilinga, nwatambula mwono wa mutu.

⁷ “Mweswawo meya usoko wenyi Kaisraele ni kumupwisa ndungo yenyi hanji kumulanjisa, mutu yoze chatamba kumushiha. Chenacho munukachiza chibi chize mukachi kenu.

⁸ “Muze munuyiza musongo ukalu wa ha chikowa, nukanyama ha kulinga yize ananwambe kuli mahako ja Alevi. Nwononokena Shimbi jize ananwehe.

⁹ “Iwulukenu chize Mwene Zambi, Zambi yenu, alingile mu jila kuli Miriame muze nwakatukile ku Egiptu.

¹⁰ “Muze munusondamisa mutu Chuma, kanda nunjila mu zuwo lienyi ni kulianjila hina ngwe chifungo, chibema anwehe cho iye mwene ni cheseke.

¹¹ Shimbwilenu haze anwanjile cho iye mwene.

¹² Nyi ngwe kali chiswale, hina lienyi kanda nulifunga ndoo chichamene.

¹³ Ha chingoloshi tangwa ha tangwa nukabwa ni kumuhilwishila lio, hanga alifuke ha ufuku. Mba makanuwahisa, ni Mwene Zambi, Zambi yenu, makawahilila nenu.

¹⁴ “Kanda numwesa chiswale lamba hanji mukwa milimo yoze unahono, chibwe kali usoko we Kaisraele, hanji chilambala yoze watwama mu limbo lia ku membo jenu.

¹⁵ Chatamba kumufweta tangwa ha tangwa mumu ha milimo yenyi, shimbu tangwa kanda litoka, mumu kanahono mbongo, kanase ko mbunge ha kujitambula. Nyi ngwe kunwamufwetele, malinyenga ku meso ja Mwene Zambi, mba yenu munubwa ni mulonga.

¹⁶ “Kuchatambile kushiha yisemi mumu ha milonga ya ana, ni ana kanda nwashiha mumu ha milonga ya yisemi. Chatamba kushiha mutu ha mulonga wenyi mwene.

¹⁷ “Kanda nuhengesa ubatwilo wa yilambala ni wa shiwa. Kanda nukanda hina ngwe chifungo kuli pwo yoze haanafwisa lunga.

¹⁸ Iwulukenu ngwe chize nwabwile ndungo mu Egiptu ni chize Mwene Zambi, Zambi yenu, anukulile. Kashika nanuhele Shimbi yino.

¹⁹ “Muze munubatula mbuto jenu nyi nwavulama chimwe chichita, kanda nuchihilukila. Chisale mumu hali yilambala, ni shiwa, ni mapwo waze haanafwisa malunga, hanga Mwene Zambi, Zambi yenu, anuwahise ku yize yeswe munulinga.

²⁰ Muze hinwahela mawundu a olive, kanda nuhiluka nawa ni kuhela waze asala ko. Yili ya yilambala, ni shiwa, ni mapwo waze haanafwisa malunga.

²¹ Muze hinwahela vinyu, kanda nuhiluka ko nawa ha kuhela chisuho cha muchaali. Yize yasala yili ya yilambala, ni shiwa, ni mapwo waze haanafwisa malunga.

²² Iwulukenu chize nwabwile ndungo mu chifuchi cha Egiptu. Ha chikuma chino nanuhele Shimbi yino.