Shimbi 23 - Mukanda Wa Zambi 1970

Atu waze kaahashile kunjila mu Chikungulwila cha Mwene Zambi

¹ “Mutu yoze ukwete mbili jafwenyoka, hanji hamubatula ku mahienyi, kanda anjila mu Chikungulwila cha Mwene Zambi.

² “Mutu yoze wasemukine mu utanji, hanji umwe wa ku vungu lienyi, chibwe ndoo ku Chisemuko cha muchikumi kanda akanjila mu Chikungulwila cha Mwene Zambi.

³ “Niumwe Kaamone, hanji Kamoabe, hanji niumwe wa ku vungu lio, chibwe ndoo ku Chisemuko cha muchikumi, kanda akanjila mu Chikungulwila cha Mwene Zambi.

⁴ Kaahashile kunjila ndoo ku miaka yeswe, mumu yaalituna kunubatwiza ni yakulia ni meya mu jila muze nwakatukile mu chifuchi cha Egiptu, ni yaafweta Balame mwana wa Beore, wa ku limbo lia Petore mu Mesopotamia, ha kunushinga.

⁵ Hindu Mwene Zambi, Zambi yenu, kabanjikile ko ku maliji ja Balame. Alioze Shingo yalialumuna kuwahisa, mumu yanuzanga.

⁶ Ha matangwa eswe a mwono wenu, kanda nukwasa mavungu waze nichimwe hanji kwawahisa.

⁷ “Kanda nulelesa akwa Edome, mumu kaali usoko wenu. Kanda nulelesa akwa Egiptu, mumu nwabwile yilambala mu chifuchi cho.

⁸ Chize ku Chisemuko cha muchitatu cha vungu lio, mahasa kunjila mu Chikungulwila cha Mwene Zambi.”

Kufunga kanawa musumba wa tujita

⁹ “Muze nuli mu musumba ha matangwa a jita, kanda nukwata chimwe Chuma chize muchinupwisa akwa luchisa.

¹⁰ Nyi umwe mutu habwa mukwa luchisa mumu hamwanga ana ha ufuku, atuhuke aye haze lia musumba atwame ho.

¹¹ Ha chingoloshi chamutamba kusana meya, mba muze tangwa hilianjila mahasa kunjila mu musumba.

¹² “Chanutamba kubwa ni chimwe Chihela haze lia musumba kuze munubwa ni kuyaya muze nunazange kulihenga.

¹³ Muze nunayi ku yambu mbatenu chimwe Chuma chakufula nacho wina, ni kushikila yibi yize hinwasa mo.

¹⁴ Fungenu musumba wenu kanawa, mumu Mwene Zambi, Zambi yenu, kali hamwe ni yenu mu musumba wenu ha kunufunga ni ha kunukwasa kukumba akwa kole jenu. Kanda nulinga chimwe Chuma chize kuchalitele, chize muchivwisa Mwene Zambi kubiha ha kunumba nyima.”

Shimbi jeka ni jeka

¹⁵ “Nyi umwe ndungo hachina kako, heza kuli yenu ha kumufunga, kanda numuhilwisa.

¹⁶ Atwame mu limwe limbo lize mwene matongola, kanda numumwesa lamba.

¹⁷ “Niumwe Kaisraele, lunga hanji pwo, mahasa kubwa chitanji wa ku mazuwo ja mazambi nikulita ni ndako ya mavungu.

¹⁸ Nawa, mbongo ja utanji uze kuchatambile kujilambula mu zuwo lia Mwene Zambi, Zambi yenu, ha kumanununa chimwe chilakenyo. Mwene Zambi kakuvutwokela yitanji waze akulinga nikulita ni ndako ya mavungu.

¹⁹ “Muze munusondamisa usoko wenu Kaisraele mbongo hanji yakulia hanji cheswe Chuma, kanda numwita mbwezo.

²⁰ Munuhasa kwita mbwezo kuli chilambala yoze unasondamisa, alioze hi kuli Kaisraele ko. Fungenu Shimbi yino, mba Mwene Zambi, Zambi yenu, manuwahisa mu yeswe yize munulinga mu chifuchi chize munuzuka.

²¹ “Muze munulakenya chimwe chilakenyo kuli Mwene Zambi, Zambi yenu, kanda nulaluka ha kuchimanununa, mumu Mwene Zambi makachihula. Nyi kunwachihanyine munuvulumuna.

²² Alioze nyi kunwalakenyene kunushi ni mulonga.

²³ Alioze nyi hinwalakenya ni kuzanga cha yenwene, chatamba kuchimanununa.

²⁴ “Muze munwendangana mu munda wa vinyu wa mbala, munuhasa kulia ye mihuko ngwe chize nunazange, alioze kanda numbata yimwe mu yikashi yenu.

²⁵ Muze munwendangana mu munda wa mbuto wa mbala, munuhasa kulia ngwe chize nunazange ni kuhuhujola ni moko jenu, alioze kanda nubatula niyimwe ni poko.”