Shimbi 22 - Mukanda Wa Zambi 1970

¹ “Nyi wamona ngombe hanji panga wa usoko we Kaisraele kanatoko, kanda umuhichika, muhilwishile ye.

² Alioze nyi mwenyayo kusuku atwama ni yena, hanji kuwamunyingikine, acho hiyako ni che chimuna ku zuwo lie. Muze mwenyayo meza ni kumufupa, mweheye.

³ Linga nawa chizechene nyi wawana chimbulu, hanji mahina, chibwe chimwe Chuma chikwo cha usoko we Kaisraele chize hatokesa.

⁴ “Nyi umwe chimbulu hanji ngombe wa usoko we Kaisraele halimbuka hashi, kanda umuhichika, mukatwise.

⁵ “Mapwo kuchatambile kuzala mahina ja malunga; ni malunga kanda azala mahina ja mapwo. Mwene Zambi, Zambi yenu, kakuvutwokela waze akulinga yuma ngwe yino.

⁶ “Nyi ngwe nwatuhukila chaswa cha kajila ku mutondo hanji hashi, mwe naye kanautamina monda hanji ana, kanda nukwata mwe naye.

⁷ Munuhasa kwanda e ana, alioze naye mwechenu aye kwenyi, mba munukatwama matangwa anji ni mwono Ubema.

⁸ “Muze nunatungu zuwo haha, nukanyama ha kujingilika chipanga ha fulumba. Mba kunuchi kubwa ni mulonga nyi umwe makaholoka hanji makafwa.

⁹ “Kanda nukakuwa yimwe mbuto yikwo mu minda yenu ya vinyu. Nyi nwachilinga, kunuchi kuhasa kulia ye vinyu hanji ye mbuto.

¹⁰ “Kanda nukajichika ngombe ni chimbulu hamuwika ha kulima munda.

¹¹ “Kanda nukazala mahina akutunga ni Wanda wa ngona ja mapanga ni Wanda wa lefuna.

¹² “Nukatunga sapo ku masongo awana a mahina jenu.”

Shimbi hakutwala kuliendela cha mwana wa lunga ni mwana wa pwo

¹³ “Nyi ngwe umwe lunga makambata mwana pwo, alioze kulutwe kechi kumuzanga,

¹⁴ mba makamuliongela yuma ya mahuza, nikwamba ngwenyi: ‘Hanalimono kulu ni lunga weka muze kanda nguchimumbata.’

¹⁵ “Ha mulonga uno, yisemi ja mwe pwo asolole kuli ngaji a mu limbo lize chinyingi cha manyinga ha kulweza ngwo, kanda chilimona ni lunga, ndoo ha tangwa lia umbachiso.

¹⁶ Tato ya mwana pwo mamba ngwenyi: ‘Nahangishile mwanami kuli lunga yono, alioze haliabwila kamuzangile.

¹⁷ Kanamusumu mulonga wamokomoko nikwamba ngwenyi: Hanalimono kulu ni lunga mukwo muze kanda nguchimumbata. Alioze talenu chinyingi chino, mwanami kanda alimona ni lunga mukwo!’

¹⁸ Ha chino miata ja limbo akwate mwe mukweze amulambe.

¹⁹ Akamufwetesa nawa kulakaji ja mbongo ja prata ni kujihana kuli tato ya mwe mwana pwo, mumu lunga yono haneha lufuma mubi hali mwana pwo Kaisraele. Mwe lunga akambate, pwo yoze kanda akamulakula ndoo ku kufwa chenyi.

²⁰ “Alioze nyi kusuma chili chamwenemwene, ni chinyingi chakuhi chakulweza ngwo, kalimwene ko ni lunga weka,

²¹ acho hi amutuhwise mu zuwo lia tato. Kwenako malunga ja mu limbo chatamba kumushiha ni mawe. Mumu halinga Chuma cha sonyi mukachi ka atu jetu ha kulinga utanji shimbu kanda achimumbata, muze te uchili mu zuwo lia tato. Chenacho munukachiza chibi chize mukachi kenu.

²² “Nyi ngwe umwe lunga makalinga utanji ni pwo lia mutu weka, eswe aali chaatamba kwashiha. Chenacho munukachiza chibi chize mukachi kenu.

²³ “Nyi ngwe umwe lunga mu limbo makalimona ni mwana pwo yoze te haamutenda kuli lunga weka,

²⁴ chanutamba kwaatuhwisa mu limbo ni kwashiha ni mawe. Mwe mwana pwo akafwe mumu katetele ha kulilamwina, chibwe te kali mu limbo kuze atu maahasa kumwivwa. Ni lunga neye akafwe mumu halimona ni pwo yoze haamutenda kulu. Chenacho munukachiza chibi chize mukachi kenu.

²⁵ “Nyi ngwe umwe lunga makalimona ni mwana pwo, yoze haatenda kulu, ni tachi mu yambu, chatamba kushiha lunga wika.

²⁶ Kanda nukalinga Chuma nichimwe kuli mwana pwo, mumu kalingile nichimwe cha kutela kufwa. Mulonga uno uli chimuwika ni wa lunga yoze makatukila mukwo ni kumushiha,

²⁷ mumu lunga yoze hakwata mwana pwo mu yambu ni tachi, yoze te haatenda. Chibwe yakololoka ha kumukwasa, alioze kukwabwile niumwe.

²⁸ “Nyi ngwe umwe lunga makalimona ni mwana pwo yoze kanda achimutenda,

²⁹ afwete tato ya mwe mwana pwo ndando ya makumi atano a mbongo ja prata, abwe lume pwo lienyi, mumu habomba nenyi ku tachi. Kanda amulakula nichimwe ndoo ku kufwa chenyi.

³⁰ “Lunga kanda evwisa tato sonyi ha kulimona ni umwe wa kuli mapwo jenyi.”