Shimbi 21 - Mukanda Wa Zambi 1970

Shimbi hakutwala ku ungalwe uze kunwayingikine

¹ “Nyi ngwe umwe mutu makawana mutu mu yambu, te ha mushiha kulu mu chifuchi chize Mwene Zambi, Zambi yenu, ananwehe, alioze kunwanyingikine yoze wamushihanga,

² miata ni ngaji jenu chatamba kuya ni kweseka Chipinji chize kuli mufu ndoo ni ku membo eswe waze ali hakamwihi.

³ Mba e miata ja limbo lize lili hakamwihi likwete mutu yoze unakafwa, akwate chimbembe wa chihwo yoze kanda chilinga nenyi milimo.

⁴ Amupalumwise hamwe homa hehi ni chitwetwe chize kuchishi kuma, homa haze kanda achilima hanji kutumba ho mbuto, henaho chatamba kumumakwina kota yenyi.

⁵ Mahako ja Alevi no chaatamba kuya ko nawa, mumu ayo chaatamba kubatula mulonga weswe wa ungalwe. Mwene Zambi, Zambi yenu, hanaatongola kumulingila ni kuwahisa Aisraele mu jina lienyi.

⁶ Mba miata eswe a mu limbo lize lili hakamwihi ni homa haze ashihile le mutu, chaatamba kusanyina moko jo hali mwe ngombe,

⁷ nikwamba ngwo: ‘Hi yetu ko twashiha mutu yono, kutwanyingikine yoze wamushiha.

⁸ Mwene Zambi konekena atu je Aisraele, waze watuhwishile mu Egiptu. Tukonekene, kanda ututwika mulonga uno wa kufwa cha mukwa kusamba.’

⁹ Chenacho, ha kulinga chize Mwene Zambi anazange, kunuchi kubwa ni mulonga ha ungalwe uze.”

Shimbi hakutwala kuli mapwo funge

¹⁰ “Muze Mwene Zambi, Zambi yenu, makanukwasa kukumba mu jita ni hi nwakwata funge,

¹¹ tangwa likwo munukamona mapwo abema waze munuzanga kumbata.

¹² Mutwale ku zuwo lie, kwenako makatewila kambu jenyi, ni kutenda yala yenyi,

¹³ ni kuzala mahina eka. Akatwama ku zuwo lie ni kulila yisemi jenyi kakweji wa muwundu. Muukabwamuze muuhasa kumumbata.

¹⁴ Ha kusula, nyi ngwe kuwamuzangile, muuhasa kumwecha aye kwenyi. Mumu hiwamulelesa kulu muze hiwalimona nenyi, kanda umutenga ngwe ndungo ha kumulanjisa.”

Shimbi hakutwala ku chihinga cha ana atangu a malunga

¹⁵ “Nyi umwe lunga, mukwa luhali, mapwo jenyi eswe aali haasema nenyi ana a malunga, alioze mwana mutangu hi wa pwo yoze akuzanga kuhaina ko,

¹⁶ muze mwe lunga matetela ana jenyi yikumba, kanda abwa ni katonde ha kuhana yitundo yaali kuli mwana wa pwo yoze akuzanga kuhiana.

¹⁷ Chamutamba kuhana yitundo yaali kuli mwana mutangu, chibwe keshi mwana wa pwo yoze akuzanga kuhiana. Mwe lunga chamutamba kutayiza mwanenyi mutangu wa lunga ni kumwaha chitundo chize chinalite.”

Shimbi hakutwala kuli mwana wa lunga yoze chihulia

¹⁸ “Nyi ngwe umwe mutu hanaseme mwana wa lunga chihulia, keshi kwononokena yisemi jenyi chibwe amumwese lamba,

¹⁹ yisemi jenyi amutwale kuli miata a mu limbo muze atwama, amuse mukachi amusopese.

²⁰ Yisemi akalweze miata ngwo: ‘Mwanetu yono kali chihulia, keshi kutwononokena. Kali mukwa lwahu ni chizenge.’

²¹ Mba malunga a mu limbo amushihe ni mawe. Chenacho munuchiza chibi chize mukachi kenu. Aisraele eswe maachivwa, meevwa woma.”

Shimbi jeka ni jeka

²² “Nyi mutu hamusukika mumu ha mulonga wenyi,

²³ kanda asala ha mutondo ufuku weswe. Chatamba kumufunda tangwa lizeliene, mumu mujimba wa kusukika ha mutondo kuwakuneha Shingo lia Zambi mu chifuchi. Fundenu mutu yoze hanga kunuchi kubihisa chi fuchi chize Mwene Zambi, Zambi yenu, hananwehe.