Shimbi 20 - Mukanda Wa Zambi 1970

Shimbi hakutwala ku jita

¹ “Muze munukatuhuka ha kuya ni kwasa jita ni akwa kole jenu, muze munukamona matemba ni tuvwalu ni tujita anji kuhiana yenu, kanda nwevwila woma. Mumu Mwene Zambi, Zambi yenu, yoze wanutuhwishile mu chifuchi cha Egiptu makabwa hamwe ni yenu.

² Shimbu kanda nubutuka kwasa jita, umwe hako meza kulutwe lienu, mambila tujita ngwenyi:

³ ‘Yenu malunga ja Aisraele, banjikenu! Musono nunayi mu jita. Kanda nuvwila akwa kole jenu woma hanji mwongo, kanda nulekumuka.

⁴ Mwene Zambi, Zambi yenu, kumaya hamwe ni yenu, makanukwasa kukumba.’

⁵ “Mba miata ja tujita maakahula malunga ngwo: ‘Kuli umwe lunga yoze unakatunga zuwo, alioze kanda achilikunjika kuli Zambi, nyi? Nyi kwali, ahiluke ku mahienyi. Mumu, nyi wafwa mu jita, hi mukwo weka makalikunjika.

⁶ Kuli umwe lunga yoze unakalima munda wa vinyu, alioze kanda achihela mo mihuko yawo, nyi? Nyi kwali, ahiluke ku mahienyi. Mumu, nyi wafwa mu jita, hi mutu weka makawahilila ni vinyu yize.

⁷ Kuli umwe lunga yoze hambisa pwo, nyi? Nyi kwali, ahiluke ku mahienyi. Mumu, nyi wafwa mu jita, mutu weka makamumbata.’

⁸ “E miata ja tujita maakambila nawa malunga ngwo: ‘Kuli umwe lunga yoze mbunge yenyi yinalekumuka hanji Unevu woma, nyi? Nyi kwali, ahiluke ku mahienyi, mumu makalekumuna akwo.’

⁹ Muze e miata haamanununa kuhanjika ni tujita, hi atongole akwa lutwe kubwa mu yizavu yeswe.

¹⁰ “Muze nunayi nikwasa jita ni amwe akwa limbo, hatangu lwezenu atu jamo sambukila.

¹¹ Nyi maazulula yajilo ni kunulweza sambukila, ayo eswe maabwa ndungo jenu akunulimina minda.

¹² Alioze nyi akwa limbo lize kaasolo kunulweza sambukila, maatongola kwasa jita, hi aselekenu ni tujita twenu.

¹³ Mba muze Mwene Zambi, Zambi yenu, hanutayiza ha kwakumba, nukashiha malunga jamo eswe.

¹⁴ Munuhasa kulianjila mapwo, ni ana, ni ye yimuna, ni yuma yeswe yikwo yize yili mu lie limbo. Munuhasa kwanda yuma yeswe ya akwa kole jenu. Mwene Zambi hanwaha yo.

¹⁵ Chenacho munukalinga ni membo eswe a yilambala waze ali kusuku.

¹⁶ “Alioze muze munukakumba akwa membo mu chifuchi chize Mwene Zambi makanwaha, nukashiha atu eswe.

¹⁷ Nukashiha atu eswe lukombo: Ahite, ni Aamore, ni Akanana, ni Aperize, ni Ahive, ni Ajebuse, ngwe chize Mwene Zambi anwambile.

¹⁸ Ashihenu, hanga keechi kuhasa kunuvulumwisa ha kulimika ni Mwene Zambi. Nyi ka, maanulongesa ha kulinga yuma yeswe ya kuzelwokesa, yize akulinga ayo mu kuwayila mazambi jo.

¹⁹ “Muze munweseka ha kukumba akwa limbo, kanda nupakula mitondo yamo ya mawundu, chibwe munwasa no jita matangwa anji. Lienu mihuko, alioze kanda nwonona mitondo; mumu mitondo hi akwa kole jenu ko.

²⁰ Munuhasa kupakula mitondo yikwo, nukatunge nayo yipanga ndoo munukumba akwa limbo.”