Shimbi 2 - Mukanda Wa Zambi 1970

¹ Mba yitutewuluka, yituya mu puya mu jila ya kuya ku kalunga lwiji Akaba, ngwe chize Mwene Zambi atwambile, yitujingujoka matangwa anji ku milundu ya Edome.

² “Mba Mwene Zambi yangwamba

³ ngwenyi: Hinwajingujoka matangwa anji ku milundu, haliabwila yeenu ku norde.

⁴ Yangulweza ha kunwaha Shimbi jino ngwenyi: ‘Nunambe kuya ku milundu ya Edome, chifuchi cha usoko wenu vungu lia Esau. Kumaakanuvwila woma,

⁵ alioze kuchatambile kwasa no jita, mumu chichi kunwaha chimwe Chipinji cha chifuchi cho. Chifuchi cha Edome hingunachihana kuli vungu lia Esau.

⁶ Chanutamba kulanda kuli ayo yakulia ni meya.’

⁷ “Iwulukenu ngwe chize Mwene Zambi hananuwahisa mu milimo yeswe ya moko jenu. Hananufungu mu kwendangana chenu ndusu mu puya yino yinene. Hanabu hamwe ni yenu ha miaka yino yeswe makumi awana, kunwahonene nichimwe.

⁸ “Chenacho twabalikile usoko wetu vungu lia Esau, waze te atwama mu chifuchi cha Edome. Yituhichika jila yize yinakatuka ku limbo lia Elate ni Eziongebere ni kuya ku chitende cha Kufwa. Yitutewuluka ku norde ni ku chivumbuko ku kanda ya Moabe.

⁹ Mwene Zambi yangwamba ngwenyi: ‘Kanda nubinjisa akwa Moabe, vungu lia Lote, chibwe kwasa no jita. Mumu hingunaahe limbo lia Are; chichi kunwaha chimwe Chihanda cha ku chifuchi cho.’ ”

¹⁰ (Aemime te vungu lia atu ataluka hatangu te mu Are atwama. Kusuhwa cho ngwe Aanake, vungu likwo lia atu ataluka.

¹¹ Aemime ni Aanake eswe aali kaakwavuluka ngwo Arefaime. Alioze Amoabe te kaakwavuluka ngwo: Aemime

¹² Ahore hatangu te kaatwama mu chifuchi cha Edome, alioze vungu lia Esau yaahanga, yoonona vungu lio, yaatwama mo ayo, ngwe chize te Aisraele ahangile akwa kole jo mu chifuchi chize Mwene Zambi aahele.)

¹³ “Mba yituzauka lwiji Zerede ngwe chize Mwene Zambi atulwezele.

¹⁴ Chino chabwile ha mwaka wa makumi atatu ni nake chize haze twakatukile ku Kadeshe Barnea. Te tujita eswe a tachi a Chisemuko chize haafwafwa, ngwe chize Mwene Zambi aliangile kwalweza.

¹⁵ Mwene Zambi yalimika no ndoo yoonona eswe.

¹⁶ “Muze te haafwafwa,

¹⁷ Mwene Zambi yatwamba ngwenyi:

¹⁸ ‘Musono munubalika mu chifuchi cha Moabe ku jila ya kuya ku limbo lia Are.

¹⁹ Mba munubwa hehi ni chifuchi cha Aamone vungu lia Lote. Kanda nwabinjisa hanji kwasa no jita, mumu chichi kunwaha nichimwe Chihanda cha ku chifuchi cho chize hingunaahe.’ ”

²⁰ (Chifuchi chino te kaakuchivuluka ngwo: chifuchi cha akwa Arefaime, jina lia atu waze te atwama ko hatangu, Aamone kaakwavuluka ngwo; Azamzumime.

²¹ Atu waze te kaataluka ngwe Aanake. Ayo abwile vungu linene lia tachi. Alioze Mwene Zambi yoonona, mba Aamone yaatambula chifuchi cho, yaatwama mo.

²² Mwene Zambi yakwasa nawa chizechene Aedome vungu lia Esau, waze te atwama ku milundu ya Edome. Yoonona Ahore, mba Aedome yaatambula chifuchi cho, mwe atwama ndoo ni musono.

²³ Ku mbumbulu ya kalunga lwiji Mediterane te kwatwama atu waze akatukile ku hongo lia Krete. Ayo yoonona Aavime, waze te atwama ko hatangu, yaatambula chifuchi cho cheswe ku sali lia sude ndoo ku limbo lia Gaza.)

²⁴ “Muze hitwabalika ndusu mu chifuchi cha Moabe, Mwene Zambi yatwamba ngwenyi: ‘Haliabwila hilukenu nuzauke Arnone. Kutala! Hinakunjika Sihone mwanangana wa Aamore, wa ku Heshbone, mu moko jenu ni che chifuchi chenyi. Nukase nenyi jita, nuzuke chifuchi chenyi.

²⁵ Chize musono, atu eswe a ku yifuchi yeswe mungwevwisa woma mumu hali yenu. Eswe kumaakachikima ni woma ha kwivwa jina lienu.’ ”

Aisraele yaakumba mwanangana Sihone

²⁶ “Mu puya ya Kedemote yingutuma tunganda kuli mwanangana Sihone wa ku Heshbone ni maliji a vumbi ngwami:

²⁷ ‘Tutayizenu mwane, tubalike mu chifuchi chenu. Mutubalika kwetu pundu, kutuchi kuhambuluka mu jila yinene chibwe ku chindume hanji ku chimeso.

²⁸ Yakulia ni meya mutulanda ya kulanda. Yino yeswe mutulinga mumu tunazange kubalikila mu chifuchi chenu,

²⁹ ndoo ni muze hitwazauka Yordau nikunjila mu chifuchi chize Mwene Zambi, Zambi yetu, anatwehe. Vungu lia Esau waze atwama mu Edome, ni Amoabe, waze atwama mu Are, haanatutayiza kubalikila mu chifuchi cho.’

³⁰ “Alioze mwanangana Sihone katutayijile ko kubalika mu chifuchi chenyi. Mumu Mwene Zambi, Zambi yenu, yamukalisa mbunge, hanga tumukumbe ha kumutambula chifuchi, chize tuli nacho ndoo ni musono.

³¹ “Mba Mwene Zambi yangwamba ngwenyi: ‘Kutala! Hinakunjika mwanangana Sihone ni chifuchi chenyi mu moko jenu; chitambulenu.’

³² Hohene Sihone yatuhuka hamwe ni atu jenyi eswe, ha kwasa jita ni yetu hehi ni chihunda cha Jahaze.

³³ Alioze Mwene Zambi, Zambi yetu, yamukunjika mu moko jetu, yitumushiha, ni e ana jenyi a malunga, ni e malunga eswe.

³⁴ Ha shimbu lizeliene yitutambula chifuchi, yitwonona membo eswe, yitushiha atu eswe, malunga ni mapwo ni ana. Kutwahichikile ko niumwe ni mwono.

³⁵ Yitwanda ngombe, yitububa yihunda yo.

³⁶ Mwene Zambi, Zambi yetu, yatutayiza kutambula membo eswe chize ku Aroere, hehi ni chikulo cha Arnone ni limbo lia mukachi ka chikulo, ndoo ku Gileade. Limbo nilimwe liabwile ni chipanga chize kutwahashile kububa.

³⁷ Alioze ku chifuchi cha Aamone kutwakundamine ko, chibwe ku mbumbulu lia lwiji Jaboke, hanji ku membo a ku milundu, hanji kumwe kuma kukwo kuze Mwene Zambi, Zambi yetu, atukanjishile.”