Shimbi 19 - Mukanda Wa Zambi 1970

Membo a kuchinyina

¹ “Muze Mwene Zambi, Zambi yenu, hoonona atu a mu chifuchi chize ananwehe, ni muze hinwatambula e membo jacho ni e mazuwo hinwatwama mo,

^2-3 nukateta chifuchi mu yihanda yitatu, Chihanda ni Chihanda ni limbo liacho kuze atu maahasa kuchinyina kanawa. Mba mutu yoze hashiha mukwo akahase kuchinyina ko ha kulilamwina.

⁴ Nyi umwe mutu hashiha mukwo, hi mukwa kole yenyi ko te kachizangile akachinyina ku limwe lia membo wano akalilamwine.

⁵ Kulumbunuka, nyi atu aali aya mu yambu ni kuchaya kunyi mba muze umwe wa kuli ayo manunguna mutondo, susumuku njimbu hiyasokoka hiyashiha mutu mukwo, chamutamba kuchinyina ku limwe lia membo wano atatu ha kulilamwina.

⁶ Nyi te kukuli lume limbo limuwika, lili kusuku, tangwa likwo mukwa kukala usoko wenyi makwata mwe mutu yoze ni kumushiha mu ufwatulo wenyi. Alioze katelele kufwa mumu hi mukwa kole yenyi ko.

⁷ Kashika ngunahane Shimbi ya kutunga membo atatu.

⁸ “Muze Mwene Zambi, Zambi yenu, hatohwesa chifuchi chenu, ngwe chize alakenyene tushakulu twenu, nikunwaha chifuchi cheswe ngwe chize alakenyene,

⁹ mba munukatongola membo akwo atatu. (Kumakanwaha chifuchi chino nyi nwalinga yeswe yize ngunanwambe musono nawa nyi nwazanga Mwene Zambi, Zambi yenu, ni kufunga Shimbi jenyi.)

¹⁰ Lingenu chino, hanga akwa kusamba keechi kafwa, ni hanga kunuchi kubwa ni uhiso ha kwashiha mu chifuchi chize Mwene Zambi ananwehe.

¹¹ “Nyi ngwe umwe mutu mashiha mukwa kole yenyi ni ufwatulo, mba machinyina ku limwe lia membo waze ha kulilamwina,

¹² miata a limbo lienyi amutwale kuli usoko wa mukwa kukala yoze hashiha, hanga neye amushihe.

¹³ Kanda numuvwila keke. Nukachiza chingalwe mukachi ka Aisraele, hanga nukatwame kanawa.”

Njiza jikulu

¹⁴ “Kanda nututulula njiza ya mwenyembo wenu, yize ajikile kulu mu chifuchi chize Mwene Zambi, Zambi yenu, ananwehe.”

Shimbi hakutwala kuli yela

¹⁵ “Chela umuwika katelele ha kushindakenya mutu ngwenyi, kali ni mulonga, shina amwe aali.

¹⁶ Nyi umwe mahamuka kuliongela mukwo mulonga wa mahuza keshi kwenyi chitela,

¹⁷ ayo eswe aali akaya homa hamuwika ha kuwayila haze Mwene Zambi makatongola, hanga akaabatwile kuli mahako ni ngaji waze anasopo milonga ha matangwa waze.

¹⁸ E ngaji maashishika che chikuma kanawa. Nyi ngwe umwe mutu haliongela usoko wenyi Kaisraele,

¹⁹ chatamba kumumwesa lamba lize te matambula yoze anakaliongela. Chenacho munuchiza yibi yize.

²⁰ Muze atu eswe meevwa sango jize, meevwa woma. Kulutwe mutu niumwe kechi kachilinga nawa.

²¹ Ha milonga ngwe yize, kanda nwivwa keke: mwono ni mwono, liso ni liso, lizo ni lizo, kwoko ni kwoko, kulu ni kulu.”