Shimbi 18 - Mukanda Wa Zambi 1970

Chitundo cha mahako

¹ “Vungu lia mahako Alevi, kaahashile kutambula chimwe chifuchi mu Israele, kulia cho shina milambu yize atu akulambula kuli Mwene Zambi.

² Keeshi kwo ni chifuchi cha ayo ene ngwe mavungu akwo. Chitundo cho chili milimo ya uhako nikulita ni chilakenyo cha Mwene Zambi.

³ “Mweswe ngombe hanji panga yoze hinwalambula, mahako chatamba kwaaha chilama, ni mbangachi, ni lufu.

⁴ Chaatamba kubwa atangu kutambula Chihanda cha mbuto, ni vinyu, ni maji a olive, ni ngona ja mapanga.

⁵ Ku mavungu jenu eswe, Mwene Zambi hatongola vungu lia Alevi ha kumulingila milimo ya uhako ku miaka yeswe.

⁶ “Nyi umwe Kalevi mu Israele kanazange kukatuka mu chimwe chihunda ni kuya homa hamuwika ha kuwayila haze Zambi matongola,

⁷ mahasa kulingila ko milimo ya uhako, ngwe chize akulinga Alevi akwo.

⁸ Neye chamutamba kutambula yakulia ngwe mahako akwo. Mahasa nawa kufunga yeswayo akwa jiko lienyi anamutumina.”

Kukanyamisa hakutwala ku ndako ja mavungu akwo

⁹ “Muze munuheta mu chifuchi chize Mwene Zambi, Zambi yenu, ananwehe, kanda nwimbulula ndako ja kuzelwokesa ja mavungu waze alimo.

^10-11 Kanda nulambula ana jenu mu kahia ha yilumbilo yenu. Kanda nutayiza atu jenu kubwa tahi, hanji akwa kupanda, hanji akwa kutuhwisa mahamba.

¹² Mwene Zambi. Zambi yenu, kakuvutwokela waze akulinga yuma yino ya kuzelwokesa. Ha chikuma chino anahumina mavungu waze ali kulutwe lienu.

¹³ Lingilenu Mwene Zambi ni mbunge jeswe.”

Mwene Zambi yalakenya ha kutuma umwe mukwa munanyi

¹⁴ Mba Mose yamba ngwenyi: “Mu chifuchi chize munuzuka, atu jamo kaakubanjika kuli tahi, alioze Mwene Zambi kazangile yenu nulinge Chenacho.

¹⁵ Alioze Mwene Zambi, Zambi yenu, makanutumina umwe mukwa munanyi wa mukachi ka atu jenu, chanutamba kumwononokena.

¹⁶ “Ha tangwa lize nwakungulukile ku mulundu wa Sinai, nwambile ngwenu: ‘Kanda twivwa nawa liji lia Mwene Zambi yetu, chibwe kutala nawa ku milengi yenyi ya kahia yize yinalekwoka, nyi ka, kumutufwa.’

¹⁷ Mba Mwene Zambi yangwamba ngwenyi: ‘Kaamba kanawa,

¹⁸ Mungukaatumina umwe mukwa munanyi ngwe yena wa mukachi ko. Mungukamulweza chize chatamba kwamba, hanga akalweze atu yeswe yize mungwamba.

¹⁹ Makahanjika mu jina liami, ni mungukamwesa lamba mweswawo kechi kamwononokena.

²⁰ Alioze nyi umwe mukwa munanyi meseka kuhanjika maliji mu jina liami waze chamwambile, chamutamba kufwa. Chimuwika nawa mukwa munanyi yoze mahanjika mu jina lia mazambi akwo.’

²¹ “Tangwa likwo munulihula ngwenu: ‘Ngwe kuchi mutunyingika nyi maliji a mukwa munanyi kaali a kuli Mwene Zambi?’

²² Nyi umwe mukwa munanyi mahanjika mu jina lia Mwene Zambi, alioze nyi yize mahanjika kuyamanunukine, mba mununyingika ngwenu, hi maliji a Mwene Zambi ko. Mukwa munanyi yoze hahanjika mu chiuyulo chenyi mwene, kanda numuvwila woma.”