Shimbi 17 - Mukanda Wa Zambi 1970

¹ “Kanda nulambula kuli Mwene Zambi, Zambi yenu, ngombe hanji panga waze ali ni tupalia. Mwene Zambi kakuchivutwokela.

² “Nyi ngwe nwevwa mu limwe limbo umwe lunga hanji pwo havulumuna Mwene Zambi ni hashiha Usendo,

³ ha kuwayila ni kulingila mazambi akwo, hanji tangwa, chibwe kakweji, hanji matongonoshi, havulumuna Shimbi ya Mwene Zambi.

⁴ Nyi ngwe nwevwa sango jino, hishishikenu kanawa. Nyi chili chamwenemwene ngwo, Chuma chino kuchalingiwa mu Israele,

⁵ hituhwisenu mwe mutu mu limbo, numushihe ni mawe.

⁶ Alioze kunwahashile kumushiha shina ni shindakenyo ya yela aali hanji kuhiana. Kunwahashile kumushiha ha shindakenyo ya chela umuwika wika.

⁷ E yela aliange kumwasa mawe, mba waze asala ho, no maamwasa. Chenacho munuchiza chibi chize.

⁸ “Yisuho yikwo mukukabwa chimwe chikuma chikalu chize ngaji a mu yihunda kaahashile kubatula, ngwe chikuma cha yikumba, hanji cha kulemeka, hanji cha kushiha mutu. Nyi chabwa Chenacho, chanutamba kuya homa hamuwika ha kuwayila haze Mwene Zambi, Zambi yenu, makatongola,

⁹ nikukunjika mulonga kuli mahako ja Alevi ni kuli ngaji yoze te unasopo milonga ha matangwa waze, akabatule mulonga uze.

¹⁰ Makanulweza ubatwilo wo, ni yenu chanutamba kulinga ngwe chize ananwambe.

¹¹ Nutayiza ubatwilo wo ni kukaula longeso lio ku chikuma ni chikuma.

¹² Nyi ngwe umwe wahamuka ha kukolema ngaji hanji hako wa Zambi, chatamba kumushiha. Chenacho munukachiza yibi yize mu Israele.

¹³ Hohene eswe waze maachivwa mevwa woma, mba niumwe kechi kuhamuka kuchilinga nawa.”

Longeso hakutwala kuli Mwanangana

¹⁴ “Muze hinwatambula chihinga cha chifuchi chize Mwene Zambi, Zambi yenu, ananwehe ni kutwama mo, mununyonga ha kubwa ni mwanangana ngwe chize ali mavungu akwo.

¹⁵ Nukanyama hakutwala kuli mutu yoze munutongola kubwa mwanangana, chatamba kubwa yoze Mwene Zambi hanatongola kulu. Chatamba kubwa umwe wa kuli atu jenu, kanda abwa chilambala.

¹⁶ Mwe mwanangana kanda abwa ni tuvwalu anji a jita. Kanda atuma atu ku Egiptu ha kulanda tuvwalu, mumu Mwene Zambi hanambe ngwenyi, atu jenyi kanda akahiluka nichimwe ku Egiptu.

¹⁷ Mwanangana kanda ambata mapwo anji. Nyi ka, mapianguka mu jila ya Zambi. Kanda alipwisa pichi ni oru ni prata.

¹⁸ Muze habutuka kulinga milimo ya wanangana, akasoneka mukanda wa Shimbi ni longeso lia Zambi nikulita ni mukanda uze akufunga mahako ja Alevi.

¹⁹ Mukanda uze chatamba kuufunga nikubwa nawo hehi ha kuutanga matangwa eswe a mwono wenyi, mba malilongesa ha kulemesa Mwene Zambi nikwononoka kanawa ku yeswe yize yinasonewa mo.

²⁰ Nyi ka, malinyonga ngwenyi, nguli mubema kuhiana Aisraele akwo ni makolema Mwene Zambi ku Shimbi jenyi mu ndako yeswayo. Alioze nyi mafunga Shimbi jino, matangwa jenyi maakoka mu wanangana wenyi, ni vungu lienyi maakayula Aisraele mu yisemuko yinji.”