Shimbi 16 - Mukanda Wa Zambi 1970

Chiwanyino cha Kubalika

¹ “Nukalemesa Mwene Zambi, Zambi yenu, ha kulinga chiwanyino cha Kubalika ha kakweji wa Abibe; mumu liabwile limwe tangwa lia kakweji yoze, ha ufuku, muze Mwene Zambi anutuhwishile mu chifuchi cha Egiptu.

² Nukaya homa hamuwika ha kuwayila haze Mwene Zambi makatongola, nukashihila ko chimwe chimuna cha chiwanyino cha Kubalika ha kulemesa Mwene Zambi, Zambi yenu.

³ Muze munukalia chiwanyino chino, nukalia mbolo yize kuyishi yitumbo, ndoo matangwa shimbiali, ngwe chize nwalingile muze nwatuhukile kapupushi mu Egiptu. Matangwa eswe a mwono wenu mbolo yino kumaakayivuluka ngwo, mbolo ya lamba, ha kunwiwulula tangwa lize nwatuhukile mu Egiptu, mu chifuchi cha lamba.

⁴ Ha matangwa shimbiali mutu niumwe mu chifuchi chenu kanda akabwa ni yitumbo ya mbolo mu zuwo lienyi. Yifwo ya chimuna chize maashiha ha chingoloshi cha tangwa lize litangu, chatamba kuyilia ufuku uzewene.

^5-6 “Yimuna ya chiwanyino cha Kubalika nukaashihila homa hamuwika ha kuwayila haze Mwene Zambi, Zambi yenu, makatongola, hi mu yihunda yikwo ko. Chilingenu ha kutoka cha tangwa ha ola yizeyene nwatuhukile mu Egiptu.

⁷ Nukayiteleka, nukayilila homa haze ha kuwayila; mba ha chichamene nukahiluka ku mahienu.

⁸ Ha matangwa a sambano nukalia mbolo yize kuyishi yitumbo. Mba ha tangwa lia muchishimbiali, hikungulukenu ha kuwayila Mwene Zambi, Zambi yenu, kanda nulinga ho mulimo.”

Chiwanyino cha Kubatula Mbuto

⁹ “Nukalula semane shimbiali chize ku tangwa lize munubutuka kubatula mbuto,

¹⁰ mba nukalinge chiwanyino cha Kubatula Mbuto, ha kulemesa Mwene Zambi, Zambi yenu, ni kumulambula mulambu wa kuzanga chenu nikulita ni chize hananuwahisa.

¹¹ Nukawahilila ku meso ja Mwene Zambi, Zambi yenu, hamwe ni ana ni akwa milimo jenu, ni Alevi, ni mapwo waze haanafwisa malu nga, ni shiwa, ni yilambala waze atwama mu membo jenu. Nukachilingila he homa hamuwika ha kuwayila.

¹² Nukewuluka chize nwabwile ndungo mu Egiptu; nukafunga Shimbi jino kanawa.”

Chiwanyino cha Yikulika

¹³ “Muze hinwakunga mbuto jenu jeswe ni kukama vinyu yenu yeswe, nukalinga chiwanyino cha Yikulika ha matangwa shimbiali.

¹⁴ Nukawahilila hamwe ni ana ni akwa milimo jenu, ni Alevi ni mapwo waze haanafwisa malunga, ni shiwa ni yilambala, waze atwama mu membo jenu.

¹⁵ Nukalemesa Mwene Zambi, Zambi yenu, ha chiwanyino chino ha matangwa shimbiali homa hamuwika ha kuwayila. Nukawahilila mumu Mwene Zambi hanawahisa kwoka cha mbuto yenu ni milimo yenu.

¹⁶ “Malunga eswe a ku mavungu jenu chaatamba kwiza yisuho yitatu ha mwaka ni mwaka homa ha kuwayila: ha chiwanyino cha Kubalika, ni ha chiwanyino cha Kubatula Mbuto, ni ha chiwanyino cha Yikulika. Lunga mweswe akaneha chawana,

¹⁷ nikulita ni chize mahasa, nikulita ni chize Mwene Zambi, Zambi yenu, hananuwahisa.”

Milimo ya ngaji

¹⁸ “Tongolenu ngaji ni amwe akwa kuyula mu membo eswe waze Mwene Zambi, Zambi yenu, ananwehe. Atu wano chaatamba kubatula ni ululi.

¹⁹ Mu ubatwilo wo kanda abwa akwa kuhengesa ha kubatula, kanda abatula ni katonde, kanda atambula mbongo ja mbenga, mumu mbongo ja mbenga kujakupupuchisa meso ja akwa mana ni chikuma cha mukwa ululi, kujakukoka ubatwilo wa uhenge.

²⁰ Matangwa eswe bwenu abema hanji akwa ululi, mba munuzuka chifuchi chize ananwehe Mwene Zambi, Zambi yenu, nutwame mo.

²¹ “Muze munulingila Mwene Zambi, Zambi yenu, chilumbilo, kanda nujika ko nawa hamba wa pwo Ashera,

²² chibwe kumika ko nawa hamba wa liwe, mumu Mwene Zambi kakwavutwokela.