Shimbi 15 - Mukanda Wa Zambi 1970

Mwaka wa muchishimbiali

¹ “Ku songo lia mwaka weswe wa muchishimbiali chatamba kujimuna makongo ja atu.

² Lingemu chino. Mutu mweswe yoze hahana kongo kuli mwenyembo wenyi Kaisraele, chatamba kujimuna kongo lize. Kuchatambile kumuketeka ha kulifweta, mumu Mwene Zambi halijimuna kulu.

³ Munuhasa kukala kongo kuli chilambala, alioze kuli enyembo jenu ka.

⁴ “Mwene Zambi, Zambi yenu, makanuwahisa mu chifuchi chize ananwehe. Niumwe wa kuli atu jenu kechi kabwa chiswale,

⁵ nyi nwamwononokena ni kufunga kanawa yeswe yize ngunanwambe musono.

⁶ Mwene Zambi, Zambi yenu, makanuwahisa ngwe chize alakenyene. Munukasondamisa mavungu anji, alioze yenu kunuchi kasondama nichimwe. Yenu munukayula mavungu anji, alioze yenu vungu nilimwe mulikanuyula.

⁷ “Nyi ngwe mu amwe membo a mu chifuchi chize Mwene Zambi ananwehe, muli umwe mwenyembo wenu Kaisraele kanahono Chuma, kanda numukalishila mbunge hanji kulituna ha kumukwasa.

⁸ Shinaho, bwenu akwa mbunge ja zango ni kumukwasa ku yeswe yize anahono.

⁹ Kanda nulituna ha kumusondamisa mumu mwaka wa kujimuna makongo hiwakundama. Kanda nubwa ni manyonga abi. Nyi ngwe nwalituna kumusondamisa, iye malila kuli Mwene Zambi ha kunufunda. Ha chino yenu munubwa ni chitela.

¹⁰ Mwehenu ni mbunge yibema kanda nwivwa kubiha, hanga Mwene Zambi, Zambi yenu, anuwahise mu yeswe yize munulinga.

¹¹ Mu chifuchi chenu kumuchi kuhona yiswale, kashika ngunanwambe ha kubwa ni mbunge jibema kuli ayo.”

Shimbi hakutwala kuli ndungo

¹² “Nyi ngwe umwe Kaisraele, lunga hanji pwo, halilanjisa iye mwene ngwe ndungo, akaulingila miaka yisambano, mba ha mwaka wa muchishimbiali ukamutusula.

¹³ Alioze kanda ukamutusula mokomoko.

¹⁴ Ukamwaha yuma yinji yize Mwene Zambi hanakuwahisa nayo, mapanga, ni mbuto, ni vinyu.

¹⁵ Iwulukenu chize ni yenu nawa nwabwile ndungo mu chifuchi cha Egiptu ni chize Mwene Zambi, Zambi yenu, anutuswile. Ha chikuma chino yami ngunanwehe Shimbi yino.

¹⁶ “Alioze nyi mwe ndungo kazangile kutusuka, kanakuzange yena ni akwa jiko lie, ni kanevu kuwaha ha kutwama ni yena,

¹⁷ ukamutwala ku chikolo cha zuwo lie, ukamulokwele ko twitwi, mba makabwa ndungo ye ndoo ku kufwa chenyi. Linga nawa chizechene kuli ndungo ye wa pwo.

¹⁸ Kanda wivwa kubiha ha kumutusula mumu hanakulingila miaka yisambano ngwe ndando ya akwa milimo aali. Linga chino, mba hanga Mwene Zambi, Zambi ye, akuwahise mu yeswe yize muulinga.”

Atangu kusemuka a ku yimuna

¹⁹ “Selenu Mwene Zambi, Zambi yenu, makuji eswe atangu kusemuka a ku ngombe ni a ku mapanga jenu; kanda nwanda umwe wa ku ngombe wano ha kulinga no milimo ni kanda nutewula amwe a kuli mapanga wano.

²⁰ Yenu ni akwa jiko lienu chatamba kwalila ku meso ja Mwene Zambi mwaka ha mwaka homa ha kuwayila haze Mwene Zambi matongola.

²¹ Alioze nyi ngwe yimwe yimuna yili ni kapalia, yitonji hanji afwa meso hanji mweswe kapalia, kuchatambile kumulambula mulambu kuli Mwene Zambi, Zambi yenu.

²² Nunahase kwalila ku mazuwo jenu, yenu eswe, chibwe atu abema hanji akwa luchisa, ngwe chize nwakulia kabaji hanji kai.

²³ Alioze manyinga jo kanda nwalia, shina kwamwangina hashi ngwe meya.”