Shimbi 14 - Mukanda Wa Zambi 1970

Aisraele kuchaatambile kulijilula ha tangwa lia kufwa

¹ “Yenu nuli a mbala a Mwene Zambi. Kashika muze nuli ni kufwa, kanda nulichata hanji kulitewula ha mahuma jenu, ngwe chize akulinga mavungu akwo.

² Nuli a mbala a Mwene Zambi, Zambi yenu, hananutongola ha kubwa atu jenyi mwene hakachi ka mavungu eswe waze atwama hano hashi.”

Tushitu abema ni a luchisa

³ “Kanda nulia Chuma nichimwe chize Mwene Zambi hanambe ngwenyi, chili cha luchisa.

⁴ Munuhasa kulia tushitu wano: ngombe, ni panga, ni pembe,

⁵ ni kabaji, ni panga wa mu yambu, ni chifwembe, ni pembe wa mu yambu, ni kai,

⁶ ni tushitu eswe waze akubikula, akwete sende ja kubula.

⁷ Alioze kanda nulia tushitu eswe, shina waze akubikula, akwete sende ja kubula. Tushitu waze kunuchi kulia kaali wano: kamelu, ni mbalu, ni sele. Kaali a luchisa kuli yenu, mumu kaakubikula alioze keeshi sende ja kubula.

⁸ Kanda nulia ngulu, kali wa luchisa. Chibwe kali ni sende ja kubula, alioze keshi kubikula. Kanda nulia tushitu wano niamwe chibwe kwakwata muze hafwa.

⁹ “Munuhasa kulia yishi eswe waze akwete yihehe ni mahalo,

¹⁰ alioze tushitu a mu meya waze keeshi yihehe ni mahalo kanda nwalia, kaali a luchisa.

¹¹ “Munuhasa kulia tujila eswe abema,

^12-18 alioze kanda nulia tujila wano: tela, ni chikungulu, ni chiselele, ni sasa, ni ngungu, ni hulayula, ni chikwakwalo, ni otrishe, ni chozo, ni chitwanjimbu, ni chitokola, ni toji, ni katovi, ni mbwembweto, ni kafukufuku.

¹⁹ “Tututu eswe waze akwete mapulwa kaali a luchisa, kanda nwalia.

²⁰ Munuhasa kulia tututu eswe abema.

²¹ “Kanda nulia kashitu walifwila. Yilambala waze atwama mukachi kenu maahasa kwaha hanji kwalanjisa kuli yilambala ni akwo. Alioze yenu nuli a mbala a Mwene Zambi; nuli atu jenyi. “Kanda nuteleka mwana panga hanji mwana pembe mu yamwa ya naye.”

Shimbi ja kulambula cha kumi

²² “Mwaka ha mwaka chatamba kulisela Chihanda cha kumi cha ku mbuto yenu yize muyima mu minda yenu.

²³ Mba yeenu homa haze Mwene Zambi, Zambi yenu, hanatongola ha kuwayila. Kwenako munukalila cha kumi cha ku mbuto, ni vinyu, ni maji a olive, ni atangu kusemuka a ku ngombe ni mapanga jenu. Lingenu chino mba hanga nuhase kulilongesa ha kulemesa Mwene Zambi, Zambi yenu, matangwa eswe.

²⁴ Nyi ngwe he homa ha kuwayila hasuhwa naye ha kutwala ho ye mihuko ya cha kumi yize Mwene Zambi hananuwahisa nayo, nukalinga chino:

²⁵ Lanjisenu ye mihuko yenu, twalenu je mbongo he homa ha kuwayila.

²⁶ Landenu yeswe yize munuzanga, ngombe, hanji mwana panga, hanji vinyu, hanji kunwa cheswe. Kwenako ku meso ja Mwene Zambi, Zambi yenu, yenu ni akwa majiko jenu munukayilila ni kuwahilila.

²⁷ “Kanda nulelesa Alevi waze atwama mu membo jenu, mumu ayo keeshi ni chihinga.

²⁸ Ku songo lia mwaka wa muchitatu nukanda che cha kumi cha mbuto yenu, nukayisweke mu yihunda yenu.

²⁹ Yakulia yino yikabwe ya Alevi, mumu ayo keeshi chihinga cho ene, ni mumu hali mapwo waze haanafwisa malunga, ni ana a shiwa, ni yilambala waze atwama mu membo jenu. Maahasa kwiza ni kutambula yeswe yize anahono. Lingenu Chenacho mba Mwene Zambi, Zambi yenu, akanuwahise mu yeswe yize munulinga.”