Shimbi 13 - Mukanda Wa Zambi 1970

¹ “Nyi umwe mukwa munanyi hanji mukwa kulumbununa yilota manulakenya chimwe chilayi hanji chikomokeso,

² ha kunushinjika ni kuwayila ni kulingila mazambi eka waze kanda nuwayila kama nilimwe tangwa, chibwe yize manulakenya muyisoloka,

³ kanda numubanjika nichimwe. Mumu Mwene Zambi, Zambi yenu, mwe unanweseka, ha kumona nyi nunazange Mwene Zambi, Zambi yenu, ni mbunge jenu jeswe, nyi ka.

⁴ Kaulenu Mwene Zambi, muvwilenu woma. Ononokenu kuli iye ni kufunga Shimbi jenyi. Muwayilenu, bwenu akwa kushishika.

⁵ Alioze shihenu mukwa kulumbununa yilota hanji mukwa munanyi yoze manulongesa ha kulimika ni Zambi yoze wanutuhwishile mu chifuchi cha Egiptu, muze nwabwile mu undungo. Mutu yoze kali mubi lume, kanazange kunupiangula mu jila yize Mwene Zambi anwambile ha kwenda mo. Chatamba kumushiha ha kuchiza yibi mukachi kenu.

⁶ “Tangwa likwo yayenu, hanji mwane wa lunga hanji wa pwo, hanji pwo yoze wakuzanga kuhiana, chibwe sepa lie yoze wakuzanga kuhiana, makutwala ku tenga ha kuwayila mazambi eka, waze yenu hanji tushakulu twenu kanda nuchiwayila kama.

⁷ Tangwa likwo umwe hakachi kenu manwonganga ha kuwayila mazambi ja atu waze nwasulangana no hanji ja waze atwama kusuku.

⁸ Kanda numutayiza anwonge, chibwe kanda numubanjika. Kanda numuvwila keke, chibwe kanda numusweka.

⁹ Mushihenu, bwenu yenu atangu ha kumwasa mawe, mba atu akwo maamwasa nawa mawe.

¹⁰ Mushihenu ni mawe! Mumu haneseka kunupiangula kuli Mwene Zambi, Zambi yenu, yoze wanutuhwishile mu Egiptu, kuze nwabwile ndungo.

¹¹ Muze Aisraele eswe maachivwa, meevwa woma. Ha chino niumwe kechi kalinga nawa chibi chize.

¹² “Muze munukatwama mu membo waze Mwene Zambi, Zambi yenu, ananwehe, tangwa likwo munukevwa

¹³ ngwo, amwe malunga amokomoko a ku vungu lienu hoonga atu a ku limbo lienu ha kuwayila mazambi waze kanda nuchiwayila kama.

¹⁴ Nyi nwevwa sango ngwe jino, jihengulenu kanawa nyi chili chamwenemwene,

¹⁵ hishihenu atu eswe a limbo lize ni e ngombe jo. Limbo lize nulionona liakulu.

¹⁶ Kungulenu yikumba yeswe ya waze atwama mu limbo, mba munwocha lie limbo ni yuma yalio yeswe ngwe mulambu kuli Mwene Zambi, Zambi yenu. Chatamba kubwa chingina ndoo ku miaka yeswe, kanda akalitungulula nawa nichimwe.

¹⁷ Ku yuma yize yeswe, kanda nukanda ho Chuma nichimwe, hanga Mwene Zambi alitwamine kunutenukina, anuvwile keke. Makanuvwila keke ni kunwokesa kuhiana, ngwe chize alakenyene tushakulu twenu,

¹⁸ nyi nwononoka ku Shimbi jenyi jize ngunanulongesa musono, ni kulinga chize chinalite ku meso jenyi.”