Shimbi 12 - Mukanda Wa Zambi 1970

Hamwe homa ha kuwayila

¹ “Jino je Shimbi jize chanutamba kufunga matangwa eswe muze munutwama mu chifuchi chize Mwene Zambi, Zambi ya tushakulu twenu, ananwehe!

² Mu chifuchi chize munukatambula, nukamwanga homa heswe haze akukombelela mahamba jo, ha milundu, ni ha mikandu, ni mushi lia mitondo ya wisu.

³ Nubuzula yilumbilo yo ni mahamba jo a mawe. Nwocha mahamba a zambi yo wa pwo Ashera ni kunungwina hashi mazambi jo akwo, hanga keechi kakombelela nawa nichimwe homa haze.

⁴ “Kanda nuwayila Mwene Zambi, Zambi yenu, ngwe chize akuwayila mazambi jo.

⁵ Mu chifuchi cha umwe wa ku mavungu jenu eswe Mwene Zambi makatongola homa haze chatamba kumuwayila.

⁶ Kwenako chatamba kulambwila milambu yenu ya kwocha, ni ya chakumi, ni yawana yize nwakulakenya Mwene Zambi, ni milambu ya kuzanga chenu, ni atangu kusemuka ku ngombe jenu ni ku mapanga jenu, ni milambu yeka ni yeka yikwo.

⁷ Kwenako ku meso ja Mwene Zambi, Zambi yenu, munukayilila, yenu ni akwa jiko lienu, ni kuwahilila ni yeswe yize Mwene Zambi hananuwahisa nayo.

⁸ “Muze tangwa lize mulikaheta, kuchatambile kuwayila ngwe chize nwakulinga haliabwila. Ndoo ni musono nwakuwayila ngwe chize nunazange,

⁹ mumu kanda nuchinjila mu uhwimino mu chifuchi chize Mwene Zambi ananwehe.

¹⁰ Muze munukazauka Yordau, Mwene Zambi, Zambi yenu, manukwasa kuzuka che chifuchi ni kutwama mo. Makanufunga kanawa hakutwala kuli akwa kole jenu, munukabwa mu uhwimino.

¹¹ Mba Mwene Zambi makatongola hamwe homa haze chatamba kumuwayila. Kwenako chatamba kumutwalila yeswe yize hinanwamba: milambu yenu ya kwocha, ni ya chakumi, ni yawana yize nwakulakenya Mwene Zambi, ni milambu yeka ni yeka yikwo.

¹² Kwenako munukawahilila ku meso jenyi, hamwe ni ana ni ngamba jenu, ni Alevi waze atwama mu membo jenu. Iwulukenu ngwenu, Alevi keechi kabwa ni chifuchi cho.

¹³ Kanyamenu kanda nukalambwila milambu yenu kweswako munukatongola yenwene,

¹⁴ shina kuyilambwila hamwe homa haze Mwene Zambi makatongola mu chifuchi cha umwe wa ku mavungu jenu. Kwenako lume chanutamba kulambwila milambu yenu ya kwocha ni kulinga yuma yeswe yikwo yize hinanwamba ha kuyilinga.

¹⁵ “Alioze munuhasa kushiha ni kulia tushitu twenu kweswako munukatwama. Munuhasa kulia eswe waze Mwene Zambi makanwaha. Eswe a kuli yenu, chibwe abema hanji akwa luchisa, maahasa kwaaha, ngwe chize nwakulia yifwo ya kabaji ni kai.

¹⁶ Alioze kuchatambile kulia manyinga jo, chatamba kwamwangina hashi ngwe meya.

¹⁷ Kanda nukalia ku mazuwo jenu Chuma nichimwe cha ku yuma yize munukalambula kuli Mwene Zambi: chibwe cha kumi cha mbuto, hanji vinyu, chibwe maji a olive, hanji atangu kusemuka a ku ngombe ni mapanga jenu, chibwe yawana yize munukalakenya kuli Mwene Zambi, hanji milambu ya kuzanga chenu, chibwe yimwe milambu yikwo.

¹⁸ Yenu ni ana jenu, hamwe ni tuvumbi twenu ni Alevi waze atwama mu membo jenu, chatamba kulila milambu yino shina ku meso ja Mwene Zambi, Zambi yenu, homa ha kuwayila haze atongwele kuli Mwene Zambi, Zambi yenu. Kwenako chatamba kuwahilila mu yeswe yize munukalinga.

¹⁹ Kanyamenu, kanda nukalelesa Alevi matangwa eswe waze munukatwama no mu chifuchi chenu.

²⁰ “Muze Mwene Zambi, Zambi yenu, makatohwesa chifuchi chenu, ngwe chize alakenyene, munuhasa kulia yifwo ha tangwa lize nunazange.

²¹ Nyi ngwe homa haze makatongola ha kumuwayila kwasuhwa naye, mba Heswe tangwa munuzanga munuhasa kushiha yimuna yenu yize Mwene Zambi manwaha, ni munuhasa kulila ye yifwo ku mazuwo jenu, ngwe chize hinanulweza.

²² Mutu mweswe, chibwe mubema hanji mukwa luchisa, mahasa kulila ko yifwo yize ngwe chize akulia yifwo ya kai hanji ya kabaji.

²³ Kanda nulia yifwo ya manyinga, mumu mwono uli mu manyinga, kuchatambile kulia mwono hamwe ni yifwo.

²⁴ Kanda nwalia, shina kwamwangina hashi ngwe meya.

²⁵ Nyi nwafunga Shimbi yino, Mwene Zambi makawahilila nenu. Yenu ni vungu lienu munukawaha.

²⁶ Milambu yize hinwalakenya, yitwalenu homa hamuwika ha kuwayila, haze Zambi matongola.

²⁷ Lambwilenu henaho milambu ya kwocha ha chilumbilo cha Mwene Zambi. Lambulenu nawa milambu yenu ya yifwo yize nunali ni kumwangina manyinga ha chilumbilo.

²⁸ Fungenu kanawa yeswe yize hinanwamba, mba yenu ni vungu lienu munukawaha ndoo ku miaka yeswe, mumu munubwa nikulinga chize chinalite ni chize chinabeme kuli Mwene Zambi, Zambi yenu.”

Mose yakanjisa Aisraele ha kuwayila mazambi akwo

²⁹ “Mwene Zambi, Zambi yenu, makanongesa akwo muze munukasa no jita, munukazuka chifuchi cho ni kutwama mo.

³⁰ Muze Mwene Zambi hanongesa mavungu waze, nukanyama, kanda nwimbulula kuwayila cho. Nyi ka, muchikabwa muheto kuli yenu, kanda nweseka kunyingika chize akukombelela, ni kanda nwembulula.

³¹ Kanda nuwayila Mwene Zambi, Zambi yenu, ngwe chize ayo akuwayila mazambi jo, mumu mu kuwayila cho kaakulinga yuma yakuzelwokesa yize Mwene Zambi akuvutwokela. Ni mwene kaakulambula ana jo ha kahia ha yilumbilo yo.

³² “Lingenu yuma yeswe yize hinanwamba. Kanda nuweza ho hanji kuchiza ho Chuma chikwo, ka.