Shimbi 11 - Mukanda Wa Zambi 1970

Unene wa Mwene Zambi

¹ “Zangenu Mwene Zambi, Zambi yenu, fungenu Shimbi jenyi jeswe matangwa eswe.

² Musono iwulukenu yize hinwalilongesa hakutwala kuli Mwene Zambi, Zambi yenu, mu wenyi wenu. Yenu ni ana jenu nwamwene unene wenyi, ni ndundo jenyi,

³ ni yilayi yenyi. Nwamwene chize alingile kuli mwanangana wa Egiptu ni ku chifuchi chenyi.

⁴ Hinunamono chize Mwene Zambi ashihile tujita twa Egiptu, hamwe ni tuvwalu two ni matemba jo mu kalunga lwiji Muchila muze anuhangile.

⁵ Nunanyingika chize Mwene Zambi anulingile mu puya shimbu te kanda nuchiheta kuno.

⁶ Iwulukenu chize alingile kuli Datane ni Abirame, ana ja Eliabe a malunga a ku vungu lia Rubene. Hashi yihabatuka yihafuka ayo hamwe ni akwa majiko jo, ni mazuwo jo ni tuvumbi two eswe ni yimuna yo.

⁷ Yenu kunwamwene yuma yino yeswe yinene yize Mwene Zambi alingile, nyi?”

Yiwape ya mu chifuchi cha chilakenyo

⁸ “Fungenu Shimbi jeswe jize hinanulongesa musono. Mba munuhasa kuzauka ni kuzuka chifuchi chize nunambe kunjila,

⁹ ni kutwama matangwa anji mu chifuchi cha chinuno chize Mwene Zambi hanalakenya kuhana kuli tushakulu twenu ni ku mavungu jo.

¹⁰ Chifuchi chize nunambe kuzuka kuchishi ngwe chifuchi cha Egiptu, kuze nwabwile hatangu. Kuze nwakuwile mbuto, nwahondanganyine milimo yikalu ya kulima minda ni kumwangina ho meya.

¹¹ Alioze chifuchi chize nunambe kunjila chili cha milundu ni yikulo, muze mwakunokanoka vula.

¹² Mwene Zambi, Zambi yenu, kakufunga chifuchi chino chize ku vula musazu ndoo ku mubatuko.

¹³ “Kashika, fungenu Shimbi jino nanulongesa musono; zangenu Mwene Zambi, Zambi yenu, mulingilenu ni mbunge jenu jeswe.

¹⁴ Nyi nwachilinga, makanutumina vula musazu ni vula wa mubatuko mu chifuchi chenu hanga nukabwe ni mbuto, ni vinyu, ni maji a olive,

¹⁵ ni yambu yibema ya ngombe jenu. Munukabwa ni yakulia yeswe yize munukazanga.

¹⁶ Kanyamenu, kanda nupianguka kuli Mwene Zambi yenu hakuwayila ni kulingila mazambi eka,

¹⁷ Nyi nwachilinga, Mwene Zambi makanutenukina ha kukanjisa vula. Mavu jenu maakoma chau ha kukeketesa mbuto jenu, hanga nukafwile ko ha shimbu likepe, chibwe chili chifuchi cha chinuno chize ananwehe.

¹⁸ “Iwulukenu Shimbi jino ni kujifunga. Jikashilenu ha moko jenu ni ha mahuma jenu ha kujiwuluka.

¹⁹ Jilongesenu ana jenu. Jitengenu pande muze munubwa mu mazuwo jenu hanji kweswako nuli, muze nunaname hanji muze nunalingi.

²⁰ Jisonekenu ha yikolo ya mazuwo jenu ni ha yajilo ya yipanga yenu.

²¹ Mba yenu ni ana jenu munukatwama matangwa anji mu chifuchi chize Mwene Zambi hanalakenya tushakulu twenu, ngwe chize lilu mulikatwama miaka yinji helu lia mavu.

²² “Fungenu kanawa Shimbi jeswe jize hinanulongesa: zangenu Mwene Zambi, Zambi yenu, lingenu yuma yeswe yize ananwambe, bwenu akwa kushishika.

²³ Hohene Mwene Zambi makahanga mavungu eswe waze ali kulutwe lienu, mba munukazuka chifuchi cha mavungu anene ni a tachi anuhiana yenu.

²⁴ Mavu eswe kuze munukaliata maakabwa nienu. Chifuchi chenu muchikabwa chize ku puya ku sude nikuheta ndoo ku milundu ya Libano ku norde, chize nawa ku lwiji Ufrateze ku chivumbuko ndoo ku kalunga lwiji Mediterane ku chitokelo.

²⁵ Kweswako munukaya mu chifuchi chize, atu jako Mwene Zambi, Zambi yenu, makeevwisa mwongo mumu hali yenu, ngwe chize hanalakenya. Niumwe kechi kanukwika.

²⁶ “Talenu, musono tongolenu hakachi ka yiwape ni Shingo.

²⁷ Yiwape, nyi munufunga Shimbi ja Mwene Zambi, Zambi yenu, jize ngunanulongesa musono;

²⁸ alioze Shingo, nyi munukolema Shimbi jino, nyi munutewuluka nawa ni kuwayila mazambi akwo waze te kanda nuchiwayila kama nilimwe tangwa.

²⁹ Muze Mwene Zambi manuhetesa mu chifuchi chize nunayi ni kuzuka, nukambujola kuwahisa ha mulundu wa Gerizime ni Shingo ha mulundu wa Ebale.

³⁰ (Milundu yino yaali yili musali lia Yordau mu chifuchi cha Akanana waze atwama mu chikulo cha Yordau ku chitokelo, hi kusuku ko ni mitondo ya More kuze te akuwayila, hehi ni limbo lia Gilgale.)

³¹ Nunambe kuzauka Yordau ni kuzuka chifuchi chize Mwene Zambi, Zambi yenu, ananwehe. Muze hinwachizuka ni hinwatwama mo,

³² nufunga Shimbi jeswe kanawa jize ngunanulongesa musono.”