Shimbi 10 - Mukanda Wa Zambi 1970

Mwene Zambi yahana je Shimbi kumi chisuho cha muchaali

¹ “Hohene Mwene Zambi yangwamba ngwenyi: ‘Sesa mawe aali a luhanda ngwe waze atangu; usonge mushete wa mabaya ha kwasamo, mba ukanduke kuli yami ha mulundu.

² Ha mawe mungusoneka ho Shimbi jize nasonekene ha mawe waze wabalwile, mba muwaasa mu mushete.’

³ “Chenacho nasongele mushete wa mabaya a mutondo akasia, yingusesa mawe aali ngwe waze atangu, yingukanduka no ha mulundu.

⁴ Hohene Mwene Zambi yasoneka ha mawe maliji waze ene asonekene hatangu, Shimbi kumi jize anuhele muze anuhanjikishile mu mulengi wa kahia muze nwakungulukile ku mulundu. Mba Mwene Zambi yangwaha e mawe waze aali.

⁵ Yingutewuluka ni kupalumuka ha mulundu. Yingusa e mawe mu mushete ngwe chize angwambile Mwene Zambi, mwenamo ali ndoo ni musono.”

⁶ (Aisraele yaakatuka ku mashima ja akwa Jakane, yaaheta ku Mosera. Kwenako afwilile Arone, yaamufunda ko. Mba mwanenyi Eleazare yamuhinga mu milimo ya uhako.

⁷ Katu kwekuze Aisraele yaaya ku Gudegoda, mba yaaya ku Jotebata, kuze kwabwile meya anji.

⁸ Ha mulundu Mwene Zambi yatongola Alevi ha kufunga mushete wa usendo wa Zambi ni atu ni kumulingila milimo ya uhako, ni kuwahisa atu mu jina lienyi. Yenayo akulinga ndoo ni musono.

⁹ Kashika Alevi kaatambwile ko chifuchi cha chihinga ngwe mavungu akwo, mumu chihinga cho kulingila Mwene Zambi milimo ya uhako nikulita ni chilakenyo chenyi.)

¹⁰ “Yingutwama ha mulundu matangwa makumi awana, ngwe hatangu. Mwene Zambi yangubanjika nawa, yatayiza ngwenyi: ‘Chichi kwanongesa.’

¹¹ Yangulweza ha kuya ni kunusongwela, hanga nukahinge chifuchi chize alakenyene kuli tushakulu twenu.”

Chize akuzanga Zambi

¹² “Yenu, Aisraele, banjikenu chize Mwene Zambi akuzanga: wayilenu Mwene Zambi, lingenu yeswe yize anazange. Muzangenu, mulingilenu ni mbunge jenu jeswe,

¹³ fungenu Shimbi jenyi jeswe, jize ngunanwehe musono ha kunukwasa.

¹⁴ Lilu hahiana lili lia mbala lia Mwene Zambi; ni he hashi nihenyi, ni yuma yeswe yize yiliho.

¹⁵ Alioze Mwene Zambi yazanga tushakulu twenu kuhiana. Kashika yatongola yenu hi atu akwo ko. Ndoo ni musono nuli atu jenyi.

¹⁶ Kashika chize musono, ononokenenu Mwene Zambi, litwaminenu uhulia.

¹⁷ Mwene Zambi kanahiana mazambi eswe akwo ni akwa ndundo eswe. Kali munene, mukwa ndundo, kola woma. Keshi katonde, keshi kutambula ubite wa mbenga.

¹⁸ Kakubatwila ana a shiwa ni waze haanafwisa malunga ni ululi. Kakuzanga yilambala waze atwama hamwe ni atu jenyi, kakwalisa ni kwajika.

¹⁹ Kashika, zangenu yilambala, mumu ni yenu nawa nwabwile yilambala mu chifuchi cha Egiptu.

²⁰ Ononokenenu Mwene Zambi, Zambi yenu, muwayilenu iye wika. Bwenu akwa kushishika, lishingenu ni jina lienyi wika.

²¹ Muhalisenu, kali Zambi yenu. Hinunalimwena ni meso jenu yuma yinene yakukomwesa yize hananulingila.

²² Muze tushakulu twenu ayile ku Egiptu, te makumi shimbiali wika. Alioze haliabwila Mwene Zambi, Zambi yenu, hanwokesa kuhiana ngwe matongonoshi a mwilu.”