Shimbi 1 - Mukanda Wa Zambi 1970

Maliji Atangu

¹ Mu mukanda uno muli maliji waze Mose ambilile Aisraele muze abwile mu puya ku chivumbuko cha lwiji Yordau. Te kaali mu chikulo cha Yordau hehi ni Sufe, hakachi ka limbo lia Parane sali limwe ni membo ja Tofele, ni Labane, ni Hazerote, ni Dizahabe sali likwo.

² (Ha kukatuka ku mulundu wa Sinai ni kuya ku Kadeshe Barnea kukuli wenyi wa matangwa kumi ni kashi, mu jila ya milundu ya Edome.)

³ Ha tangwa litangu lia kakweji wa kumi ni kashi lia mwaka wa makumi awana muze Aisraele atuhukile mu chifuchi cha Egiptu, Mose yalweza atu yuma yeswe yize Mwene Zambi amwambile.

⁴ Chino chabwile muze Mwene Zambi hakumba Sihone mwanangana wa Aamore, yoze te wakuyula akwa limbo lia Heshbone; ni Oge mwanangana wa chifuchi cha Bashane, yoze te wakuyula akwa membo ja Ashtarote ni Edrei.

⁵ Muze te atu abwile ku chivumbuko cha Yordau mu chifuchi cha Moabe, Mose yabutuka kulumbununa Shimbi ja Zambi ni longeso lienyi. Yamba ngwenyi:

⁶ “Muze twabwile ku mulundu wa Sinai, Mwene Zambi, Zambi yetu, yatwamba ngwenyi: ‘Nwashimbula chinji ha mulundu uno.

⁷ Bukukenu ha musumba, nuye. Yeenu ku chifuchi cha milundu ya Aamore ni ku yifuchi yeswe yaajingilika: ku chikulo cha Yordau, ni ku milundu, ni ku yana, ni ku chifuchi ku sali lia sude, ni ku mbumbulu ya kalunga lwiji Mediterane. Yeenu ku chifuchi cha Kanana, nuhiane milundu ya Libano ndoo ku lwiji munene Ufrateze.

⁸ Chino cheswe chili chifuchi chize yami Mwene Zambi nalakenyene tushakulu twenu Abrahama, ni Isake, ni Yakoba, ni kuli mavungu jo. Yeenu nukachihinge.’ ”

Mose yatongola ngaji

⁹ Mose yalweza atu ngwenyi: “Muze twabwile ku mulundu wa Sinai, nanwambile ngwami: ‘Milimo ya kunusongwela yinahiana. Chahashile kuyilinga ukawami.

¹⁰ Mwene Zambi, Zambi yenu, hananwokesa kuhiana ngwe matongonoshi a mwilu.

¹¹ Mwene Zambi, Zambi ya tushakulu twenu, akanwokese yisuho tununu, akanuwahise ngwe chize anulakenyene!

¹² Alioze ngwe kuchi yami ukawami munguhasa kumbata milimo ya kusopa milonga yenu?

¹³ Tongolenu amwe akwa mana, ni yinyingi, ni lufuma a ku vungu ni vungu, hanga angukwase ha kunuyula.’

¹⁴ Nwatayijile ngwenu, chibema.

¹⁵ Mba yingwanda miata akwa mana ni a lufuma waze nwatongwele ku mavungu jenu, yingwasa ha kunuyula. Amwe yaabwa miata a tununu, amwe a makulakaji, amwe a makumi atano, amwe a kumi. Yingutongola nawa amwe miata ha kuyula mavungu eswe.

¹⁶ “Ha tangwa lize yingwaaha Shimbi ngwami: ‘Banjikenu kulitachika chize chili mukachi ka atu jenu. Batulenu milonga yeswe ni ululi, chibwe yili milonga ya atu jenu hanji ya yilambala waze ali mukachi kenu.

¹⁷ Kanda nukabatula ni katonde, batwilenu mutu mweswe ni ubatwilo wa ululi. Kanda nuvwila woma niumwe, mumu ubatwilo wa mbala wa Zambi. Nyi Chuma chikwo chanukalila, chinehenu kuli yami, ulunguchibatula.’

¹⁸ Ha Tangwa lizeliene yingunulongesa yuma yeswe yikwo yize chanutamba kulinga.”

Mose yatuma ngendeshi ku Kadeshe Barnea

¹⁹ “Yitulinga ngwe chize Mwene Zambi, Zambi yetu, atuhele Shimbi. Yitukatuka ku mulundu wa Sinai yituya ndusu mu puya yinene, kole ni woma, mu jila ya kuya ku milundu ya Aamore. Muze hitwaheta ku Kadeshe Barnea,

^20-21 yingwamba ngwami: ‘Talenu, haliabwila hinweza ku chifuchi cha milundu ya Aamore, chize Mwene Zambi, Zambi yetu, Zambi ya tushakulu twetu, hatwaha. Chitalenu, chenachi. Yeenu nuchizuke ngwe chize ambile. Kanda nuyambashana, kanda nwivwa woma.’

²² “Alioze yinwiza kuli yami, ngwenu: ‘Tuma atu kulutwe lietu ni kwendesa chifuchi, hanga ahase kutwambulwila jila yibema yize chatutamba kuya, ni membo waze aliko ni chize abwa.’

²³ “Chino yichinuwahila, mba yingutongola malunga kumi ni aali, umuwika ku vungu ni vungu.

²⁴ No yaaya ku milundu ndoo ku chikulo cha Eshkole, yaachendesa.

²⁵ Yaatunehena yimwe mihuko yize awanyine ko, yaaneha sango ngwo, chifuchi chize Mwene Zambi, Zambi yetu, haatwaha chili ni chinuno chahiana.

²⁶ “Alioze yinukolema Shimbi ya Mwene Zambi, Zambi yenu, yinulituna ha kunjila mu chifuchi.

²⁷ Yinulinyenyeta ngwenu: ‘Mwene Zambi kanatuvwila kole. Hanatutuhwisa mu Egiptu ha kulukunjika mu moko ja Aamore, hanga atukuwise.

²⁸ Mumu yika chatutamba kuya? Akwetu haatulekumwisa liakulu nikwamba ngwo: Atu jako kaanatuhiana tachi, ni kusuhwa, kaatwama mu membo a kukoleka, yipanga yo kuyaheta ndoo mwilu. Yitumona nawa vungu lia Aanake, atu ataluka!’

²⁹ “Alioze yingwamba ngwami: ‘Kanda nuvwila atu wano woma.

³⁰ Mwene Zambi, Zambi yenu manutetekela, ni kunwashila jita, ngwe chize nwamwene mu Egiptu

³¹ ni mu puya. Nwamwene chize Mwene Zambi anumbachile kanawa ndoo kuno ngwe chize tata akumbata mwanenyi.’

³² Hindu kunwafulielele ko Mwene Zambi,

³³ chibwe matangwa eswe te kaakunutetekela ni kufupa haze munujika musumba wenu. Ha kunusongwela jila, te kakuya kulutwe lienu mu kahia kaze kalifwa ngwe nguji ha ufuku ni mu lelwa lize lialifwa ngwe nguji ha mwalwa.”

Mwene Zambi yamwesa Aisraele lamba

³⁴ “Mwene Zambi yevwa kulinyenyeta chenu, yatenuka, yalishinga ngwenyi:

³⁵ ‘Chamwenemwene niumwe wa kuli yenu wa mu Chisemuko chino chibi makanjila mu chifuchi cha chinuno chize nalakenyene kuhana kuli tushakulu twenu.

³⁶ Shina lume Kaleba mwana wa Jefune mwe makanjila mo. Mumu kali mukwa kushishika. Mungukamwaha chifuchi chize aliachile akatwame mo hamwe ni vungu lienyi.’

³⁷ Mwene Zambi yangutenukina mumu hali yenu, ngwenyi: ‘Chibwe yena Mose kuuchi kunjila mo.

³⁸ Alioze chikwashi che, Yoshua, mwana wa Nune, mwe makanjila mo. Mukolese, mumu mwe makasongwela Aisraele kuhinga che chifuchi.’

³⁹ “Mba Mwene Zambi yatwambila yetu eswe ngwenyi: ‘Ana jenu, waze te kanda anyingika chibi ni chibema, waze nwambile ngwenu maakabwa funge, eno maakachihinga, Mungukachihana kuli ayo.

⁴⁰ Alioze yenu tewulukenu, nuhiluke mu puya mu jila ya kuya ku kalunga lwiji Akaba.’

⁴¹ “Yinungukumbulula ngwenu: ‘Hitwavulumuna Mwene Zambi. Alioze mutwasa jita, ngwe chize Mwene Zambi, Zambi yetu, hanatwambe.’ Hohene yenu eswe yinulipakata ha kuya ku jita. Yinunyonga ngwenu, muchibwa chashi ha kukumba chifuchi cha milundu.

⁴² “Alioze Mwene Zambi yangwamba ngwenyi: ‘Alweze ngwe: Kanda asa jita mumu yami chichi kubwa hamwe no. Nyi ka, akwa kole jo maanongesa.’

⁴³ Yingunwambulwila yize Mwene Zambi angulwezele, alioze kunwayibanjikile ko. Mu kulengumuka chenu yinukandukila ku milundu.

⁴⁴ Chenacho Aamore waze te atwama ku milundu yeeza ni kulimika ni yenu. Yaanuhanga ndoo ni ku Horma ngwe chize puka akuhanga atu, yaanunongesa ku milundu ya Edome.

⁴⁵ Mba yinulila kuli Mwene Zambi ha kunukwasa, alioze kaanubanjikile ko, yanumba nyima.”

Miaka ya mu puya

⁴⁶ “Chenacho twatwamine ku Kadeshe matangwa anji.