Rute 4 - Mukanda Wa Zambi 1970

Boaze yambata Rute

¹ Mba Boaze yaya ku chikolo cha chipanga cha chihunda, yatwama homa haze akulitakanyina atu. Ha shimbu likepe, usoko wa Elimeleke yeza, yoze ambile Boaze ngwenyi, mukwo uliko yoze unanguhiana. Boaze yamutambika ngwenyi: “Yaya, tweyenu kuno mwane, twamenu.” Neye yatwama.

² Mba yatongola makulwana kumi a mu limbo, yaamba ngwenyi: “Twamenu hano.” No yaatwama.

³ Mba Boaze yambila usoko wa Elimeleke ngwenyi: “Naomi ku chifuchi cha Moabe ayile, hahiluka. Kanazange kulanjisa munda uze ahichikile usoko wetu Elimeleke.

⁴ Kashika ngunakamba ngwami, mungukunyingikisa. Haliabwila nyi unazange, uulande ku meso ja makulwana ni atu eswe anakunguluka hano. Nyi kunwazangile, ngulweze, mumu yena mwe mukulwana, uli ni chiyulo cha kuulanda, yami ngunakuhate.” Neye ngwenyi: “Munguulanda.”

⁵ Mba Boaze yamba ngwenyi: “Nyi walanda munda uno kuli Naomi Chakutamba kumbata nawa pwo mukwa Moabe, Rute, yoze ahichikile Malone. Ha chino jina lia mutu yoze hanafu kulichikutoka mukachi ka Aisraele. Chikwo nawa, munda wenyi chatamba kusala ku vungu lienyi.”

⁶ Mwe mutu yoze yakumbulula ngwenyi: “Nyi chocho chichi kuulanda, nyi ka, jina liami ni munda wami muyitoka. Ulande yena, yami chichi kuulanda.”

⁷ Ha matangwa waze Aisraele te ndako akwete yakulanda yuma hanji kusumbakenya, mweswawo wabwile ni yuma ya kulanjisa, chamutamba kuzula lusapato umuwika mba mahana kuli yoze unalande.

⁸ Kashika muze mutu yoze hambila Boaze ngwenyi: “Ulande yena mwene,” yazula lusapato wenyi, yahana kuli Boaze.

⁹ Mba Boaze yambila makulwana ni atu eswe waze akungulukile ko ngwenyi: “Yenu eswe nuli yela jami musono uno. Naomi hangulanjisa yuma yize yeswe yabwile ya Elimeleke ni ya Chilione ni Malone.

¹⁰ Ni Rute nawa, Kamoabe yoze ahichikile Malone, habwa pwo liami. Kashika yuma ya mutu yoze hanafu hiyabwa lume ya vungu lienyi. Ha chino jina lienyi kulichi katoka hakachi ka vungu lienyi ni limbo lienyi. Nuli yela ja yuma yino musono.”

¹¹ Makulwana ni waze te ali ku chikolo yaatayiza ngwo: “Ewa, tuli yela. Mwene Zambi apwise yono pwo lie ngwe Rashele ni Leya, asemene anji ni Yakoba. Akupwise nawa pichi mu vungu lia Efrata, ni mukwa lufuma mu Betleheme.

¹² Vungu lie likabwe ngwe vungu lia Pereze yoze Tamare asemene ni Yuda.”

Boaze ni vungu lienyi

¹³ Chenacho Boaze yalimona nenyi. Mwene Zambi yamuwahisa, mba Rute yaka ufumba, yasema mwana wa lunga.

¹⁴ Mapwo yaambila Naomi ngwo: “Mwene Zambi afumane! Musono uno hakwaha mujikulu yoze makukwasa. Mwana yono afumane mu Israele.

¹⁵ Tembwa mwane kanakuzange kuhiana ana a malunga shimbiali. Haliabwila hakwaha mujikulu wa lunga, yoze makakwaha mwono Waha, ni kukuhoka mu ushinakaji we.”

¹⁶ Naomi yatambula mwe mwana yamukangayika, yabutuka kumulela.

¹⁷ Mapwo waze te atwama hakamwihi ni Naomi yaaluka mwana jina ngwo: Obede. Obede mwe tato ya Jese yoze wasemene David.

^18-22 Lino lie vungu lia Pereze ndoo kuli David: Pereze, ni Hezrone, ni Arame, ni Aminadabe, ni Nasone, ni Salmone, ni Boaze, ni Obede, ni Jese, ni David.