Rute 3 - Mukanda Wa Zambi 1970

Naomi yafupila Rute lunga

¹ Naomi yambila Rute ngwenyi: “Mwanami, ngunazange kukufupila lunga hanga ubwe ni zuwo lie.

² Boaze yoze ukwete atu waze te wakulinga no, hi usoko wetu ko, nyi? Tala, chingoloshi maazungula mbuto.

³ Kashika, yako usane, waya maji a vumba libema, zala mahina abema. Mba yako kuze anazungwila mbuto, alioze kanda ulisolola ku meso jenyi ndoo haamanununa kulia ni kunwa.

⁴ Muze himaya ni kubomba, tala kanawa muhela uze anabombo, ufukule hina lize analifuku ku molu, ubombe ko. Mba makulweza chize muulinga.”

⁵ Rute yakumbulula ngwenyi: “Mwane mama, mungulinga yeswe yize hiwamba.”

⁶ Chenacho Rute ayile kuze te akuzungwila mbuto, yalinga yize yeswe anwambile naye weno.

⁷ Muze Boaze hamanununa kulia ni kunwa, yawahilila. Yaya nikubomba hehi ni masangu waze te haazungula. Rute neye yakatuka, yaya ko hakepe hakepe, yafukula hina ku molu ja Boaze, yabomba ko

⁸ Ha muchima ufuku, susumuku Boaze halaula mu tulo, yatewuluka, yalishimwoka ha kumona pwo yoze te unabombo ku molu jenyi!

⁹ Boaze yahula ngwenyi: “Ayanwe, yena iya?” Rute ngwenyi: “Yami mutu we Rute Unalite ni kungumbata mumu uli usoko wetu.”

¹⁰ Boaze ngwenyi: “Mwanami, Mwene Zambi akuwahise, unakalweza ubeme wa mbunge ye ku yeswe yize walingilile noko weno. Alioze yize hiwalinga haliabwila yinahiana yize yitangu. Mumu kuwakawile ana malunga, chibwe kaali pichi hanji yiswale.

¹¹ Haliabwila kanda wivwa woma mwanami. Mungulinga yeswe yize unazange.

¹² Chamwenemwene nguli usoko we, ngunahase kukumbata, alioze kwali yoze wanguhiana yami.

¹³ Kuheshi Chuma, muuhasa kubomba muno ndoo ha chichamene. Hamene mutukatala nyi mutu yoze matayiza kukumbata. Nyi chocho muchibema, nyi ka, ni mwe Zambi ya mwono, ulungukumbata.”

¹⁴ Chenacho Rute abombele ku molu ja Boaze ndoo chichamene. Alioze yalimeneka kufwambuka, mumu Boaze kazangile ko niumwe kuchinyingika ngwo, pwo wabombanga ko.

¹⁵ Muze Rute te himaya, Boaze yamulweza ngwenyi: “Zula hina lie lia helu uliale.” Rute yaliala. Boaze yamwaha kilo makumi aali a masangu, yamutwika. Mba Rute yahiluka ku limbo.

¹⁶ Muze haheta ku zuwo, naye weno yahula ngwenyi: “Mwanami, akuwayanga kuchi?” Rute yamulumbunwina yeswe yize Boaze amulingilile.

¹⁷ Yamba nawa ngwenyi: “Boaze mwe wangwaha ngu wano, mumu kazangile nguhiluke kuli yena mokomoko.”

¹⁸ Naomi ngwenyi: “Lihumikize mama, tumone yuma yino chize muyibwa. Mutu yono kechi kulihumikiza ndoo mamanununa yino yeswe musono.”