Rute 2 - Mukanda Wa Zambi 1970

Rute yaya ku munda wa Boaze

¹ Umwe pichi wabwile mu Betleheme, jina lienyi Boaze, wa ku vungu limuwika ni Elimeleke, lunga lia Naomi.

² Mba Rute yambila Naomi ngwenyi: “Mama, ngutayize kama nguye ni kuhuhujola mbuto yize yakusala muze akwa minda akumakwona masangu. Mungumona yoze mangutayiza ni vumbi.” Naomi ngwenyi: “Yako kwe, mwanami.”

³ Chenacho Rute ayile ku minda ni kuhuhujola mbuto yize akuhichika akwa milimo. Kuma te kuuli munda wa Boaze, usoko wa Elimeleke.

⁴ Mba ha tangwa lizeliene, mwe Boaze yakatuka ku Betleheme, yahianyina ku munda wenyi. Yameneka akwa milimo jenyi ngwenyi: “Mwene Zambi abwe hamwe ni yenu.” Ayo ngwo: “Vulie mwane, Mwene Zambi anuwahise.”

⁵ Boaze yahula mukwa lutwe wa milimo ngwenyi: “Pwo yoze wa kulihi?”

⁶ Neye ngwenyi: “Kali wa ku chifuchi cha Moabe, kanakeza hamwe ni Naomi.

⁷ Kahulanga ngwenyi: ‘Nalemba, ngutayizenu kama nguye ni kuhuhujola mbuto yize yinasala mukachi ka yichita mu munda muze akwa milimo anamakuna mbuto.’ Kalinga ni tachi chize ku chichamene. Haliabwila kanahwimi hakepe mu chisambwe.”

⁸ Mba Boaze yambila Rute ngwenyi: “Banjika yena mwana pwo. Kanda uya ni kuhuhujola mbuto mu munda wa mutu mukwo. Bwako lume mu munda uno hamwe ni mapwo waze akungulingila.

⁹ Utala kanawa muma muze anayi ni kubatula mbuto, mba muwakaula kunyima. Hinalweza ana malunga jami a milimo ngwami, kanda akubinjisa. Nyi wevwa pwila ya meya, yako kuze anase milondo ya meya, unwe meya waze haataha.”

¹⁰ Rute yafulamana hashi ku meso ja Boaze, ngwenyi: “Kuchi hinwangulweza utu ubwa haha? Chibwe nguli chilambala hindu hiwangukwasa.”

¹¹ Boaze ngwenyi: “Haanangulumbunwina yiwape yeswe yize hiunalingila noko weno chize kuze afwilile lunga lienyi. Ngunanyingika chize wahichikile tatenu ni noko, ni chize wahichikile chifuchi che yiwiza ni kutwama ni atu waze kuwanyingikine.

¹² Mwene Zambi akukundulule mumu ha yize hiwalinga. Mwene Zambi, Zambi ya Aisraele, akukundulule kuhiana, mumu hiwachinyina kuli iye hanga akufunge mu mapulwa jenyi.”

¹³ Rute yakumbulula ngwenyi: “Aa mwata, uli mutu mubema. Hiwangulweza utu kuhiana. Maliji waze wahanjika kuli yami haanguwahisa. Wahanjika kuli yami ngwe nguli mukwa mulimo we, alioze kuma ka!”

¹⁴ Ha ola ya kulia, Boaze yatambika Rute ngwenyi: “Tweya kuno, ulie.” Rute yatwama hamwe ni akwa milimo, mba Boaze yamwaha mbuto ya kwanyika. Yayilia ndoo yakuta, yikwo yiisala ho.

^15-16 Muze Rute haya nawa ni kuhuhujola masangu, Boaze yalweza akwa milimo ngwenyi: “Numwecha ahuhujole chibwe hakachi ka yichita, kanda numuzwelesa, chizenu yimwe ya ku yichita hanga ahuhujole.”

¹⁷ Mba Rute yahuhujola mu munda uze ndoo ku chingoloshi. Yayizungula, yabwa ni kilo kumi lia masangu.

¹⁸ Mba yaanda, yaatwala ku chihunda, yalweza naye weno unji uze ahuhujola, yamwaha nawa yakulia yize yalisalile ho muze te halia ku munda.

¹⁹ Naomi yamuhula ngwenyi: “Kulihi wayanga ni kuhuhujola yeswe ayi? Mu munda waya walingilanga? Zambi abwe hamwe ni mutu yoze wakukwasanga!” Mba Rute yamulweza ngwenyi: “Nalingilanga mu munda wa umwe mutu, jina lienyi Boaze.”

²⁰ Naomi ngwenyi: “Mwene Zambi awahise Boaze! Matangwa eswe Zambi kakufunga yilakenyo kuli amwono ni waze haanafu.” Yamba nawa ngwenyi: “Mutu yoze kali usoko wetu, kali ni chiyulo cha kukukwasa.”

²¹ Mba Rute yamba ngwenyi: “Kangulwezanga nawa ngwenyi, mungulinga ni atu jenyi ndoo kuze milimo yakubatula mbuto muyihwa.”

²² Naomi yambila Rute ngwenyi: “Chibema, mwanami. Nyi waya mu munda wa mutu weka, maakumwesa tuhu lamba. Chinalite kubwa ni mapwo waze akumulingila.”

²³ Chenacho Rute yalinga hamwe ni akwa milimo ja Boaze, yahuhujola mbuto ndoo ku tangwa lize amanunwine milimo. Ha matangwa waze eswe Rute te kakutwama ni naye weno.