Rute 1 - Mukanda Wa Zambi 1970

Elimeleke ni akwa jiko lienyi yaatunga mu chifuchi cha Moabe

^1-2 Sango ja Rute jabwile ngwe chino. Muze te akwa kuyula ayulile Aisraele, zala yinji yabwile mu chifuchi. Kashika umwe mutu wa ku Chikota cha Efrata, wa mu limbo lia Betleheme mu chifuchi cha Yuda, yaya ni kutwama mu chifuchi cha Moabe. Yaya hamwe ni mukwo pwo ni anenyi a malunga aali. Mutu yoze jina lienyi Elimeleke, jina lia mukwo pwo Naomi, majina ja ana jo: Malone ni Chilione.

³ Mwe Elimeleke yafwa, ni Naomi yasala ni ana jenyi aali.

⁴ Ana a malunga waze yaambata mapwo mu chifuchi cha Moabe, pwo umuwika jina lienyi Orpa, mukwo Rute. Yaatwama ko miaka kumi,

⁵ mba Malone ni Chilione no yaafwa. Naomi yasala ukawenyi, keshi lunga hanji ana.

Naomi ni Rute yaahiluka ku Betleheme

⁶ Muze Naomi hevwa ngwo, Mwene Zambi hawahisa atu jenyi, Aisraele, haaha yakulia, mba Naomi yalilulika hanga akatuke mu chifuchi cha Moabe, iye ni atembwa anenyi aali.

⁷ Yaakatuka ni kuhiluka ku chifuchi cha Yuda.

⁸ Mu jila, Naomi yambila atembwa anenyi ngwenyi: “Hilukenu kuli yisemi jenu. Mwene Zambi anukwase ngwe chize nwakwashile yami ni waze haanafu.

⁹ Anukwase nulimbate nawa ni malunga hanga nukabwe ni mazuwo jenu.” Mba Naomi yaashika, alioze ayo yaabutuka kulila mumu te kaazangile ko kumuhichika.

¹⁰ No yaamwamba ngwo: “Hi chocho ko! Tunazange kuya ne ndoo ku mahienu.”

¹¹ Alioze Naomi ngwenyi: “Atembwa anami, hilukenu. Kuchi kevwe nunazange kuya hamwe ni yami? Mungusema nawa ana a malunga waze maanumbata, nyi?

¹² Anami hilukenu. Hinabwa kulu kashinakaji, chahashile nawa kuya ku ulo. Ni mwene, chibwe lunga angumbate ufuku uno wene, mungusema e ana a malunga waze maanumbata, nyi!

¹³ Munuhasa kwatwaminyina ndoo muze maakola, nyi? Hanji munulituna kuya malo eka mumu hali ayo, nyi! Hi chocho ko, atembwa anami, kunushi kuhasa. Mwene Zambi hangumba nyima. Ngunanuvwila chinyengo kuhiana.”

¹⁴ Yaabutuka kulila nawa kuhiana, mba Orpa yashisa naye weno ni kumushika, yahiluka ku mahio. Alioze Rute yamulalaminya.

¹⁵ Mba Naomi yambila Rute ngwenyi: “Tala yayenu hahiluka ku mahio, kuli akwa jiko lienyi ni mazambi jenyi, yako hamwe nenyi.”

¹⁶ Alioze Rute ngwenyi: “Kanda ungushinjila ni kukuhichika, chibwe kungukanjisa kuya hamwe ni yena. Kweswako muuya ni yami munguya ko, kweswako muukabwa, ni yami mungukabwa ko. Akwa jiko lie maabwa akwa jiko liami, Zambi ye mabwa Zambi yami.

¹⁷ Kweswako muukafwila, ni yami kwe mungukafwila, kwenako maakangufunda. Mwene Zambi ye angumwese lamba nyi mungulihandununa ni yena shimbu kanda tufwa!”

¹⁸ Muze Naomi hanyingika ngwenyi, Rute kanazange nguye nenyi, kambile ko nawa nichimwe.

¹⁹ Mba eswe aali yaaya ndoo ku Betleheme. Muze haaheta, atu eswe mu limbo yaalishimwoka kuhiana. Mapwo yaahula ngwo: “Kuma yono mwe Naomi, nyi?”

²⁰ Naomi ngwenyi: “Kanda nukavuluka nawa ngwenu, Naomi, alioze ngwenu, Mara, Mwene Zambi Mukwa Ndundo Jeswe hangumwesa lamba liahiana.

²¹ Muze nanuhichikile te nguli ni yuma yinji, alioze haliabwila Mwene Zambi hanguhilwisa mokomoko. Mba kuchi mununguvuluka ngwenu, Naomi?” Alioze Mwene Zambi Mukwa Ndundo Jeswe hangumwesa lamba, hanguyindamisa.

²² Chenacho Naomi ni tembwa mwanenyi Rute, Kamoabe, akatukile ku Moabe, yaaheta ku Betleheme muze te anabutuka kumakuna mbuto.