Obadia 1 - Mukanda Wa Zambi 1970

¹ Mukanda uno unalumbununa maliji waze Mwene Zambi alwezele Obadia hakutwala kuli akwa chifuchi cha Edome. Mwene Zambi yatuma tunganda twenyi kuli akwa mavungu, yitwivwa liji lienyi ngwo: “Tukatukenu! Tuyenu tukase jita ni Edome!”

Mwene Zambi mamwesa Aedome lamba

² Mwene Zambi yambila Edome ngwenyi: “Mungukulekumuna. Atu eswe kumaakulelesa.

³ Kulengumuka che hichakwonga. Limbo lie linene lili liakukoleka ni mawe akolo; zuwo lie kuliatwama ha mulundu usuku. Kashika wakwamba ngwe: ‘Iya mahasa kunguhulumuna hashi?’

⁴ Chibwe zuwo lie liatwama kwilu kusuku ngwe chaswa cha tela, chibwe kaakulimwena ngwe mukachi ka matongonoshi, hindu mungulihulumuna hashi.

⁵ “Muze eji akwiza ha ufuku, keeshi kwanda lume yize anazange, nyi? Muze atu akukunga mihuko ya vinyu, keeshi kuhichika yimwe, nyi? Alioze akwa kole jenu haanububa mweswe lukombo.

⁶ Yenu vungu lia Esau, ubite wenu weswe haaububa.

⁷ Enyembo jenu haanwonga; haanuhuma mu chifuchi chenu. Atu waze nwatwama no mu uhwimino haanukumba. Masepa waze te nwakulia no haanutela muheto; kaananwambe ngwo: ‘Mba mana jenu alihi?’

⁸ “Yami Mwene Zambi ngunambe ngwami, ha tangwa lize mungumwesa Aedome lamba, mungukonona malunga jenu a mana, mungukonona akwa malinjekela eswe.

⁹ Tujita a tachi a ku limbo lia Temane meevwa mwongo, tujita eswe a mu Edome kumaashiha.

Yikuma yize Zambi mamwesena Aedome lamba

¹⁰ “Mumu nweyile, nwashihile usoko wenu vungu lia Yakoba, kumaanwonona ni kunuvwisa sonyi ku miaka yeswe.

¹¹ Muze akwa kole anjilile ni tachi ku yikolo ya Yerusaleme, muze abubile ubite wa lie limbo, ni yenu te kwe nunamana, yinuchimona; ni yenu nwabwile ngwe ayo.

¹² Te kachi kunwevwile ko chiseke ha kumona lamba lia usoko wenu Ayuda. Ha tangwa lize lia kwenyeka cho kachi yenu kunwawahilile ko. Te kachi kunwaakekwine ko ha tangwa lia luyinda wo.

¹³ Te kachi kunwanjilile ko mu limbo lia atu jami, ni kwaseha ha tangwa lia kwonona, ni kwanda ubite wo, ha tangwa lia lamba lio.

¹⁴ Te kachi kunwaajikinyine ko ha makano ja majila ni kukwata waze ambile kushiha. Te kachi kunwaakunjikile ko ku moko ja akwa kole jo ha tangwa lia lamba lio.”

Zambi mabatwila mavungu eswe

¹⁵ Mwene Zambi kanambe ngwenyi: “Tangwa hiliakundama, mungubatwila mavungu eswe. Yenu Aedome, yize nwalingile akwenu, ni yenu maanulinga yo. Maanuhilwishila yize nwahanyine.

¹⁶ Atu jami haananu musenge usasu wa lamba ha mulundu wami wa chijila. Alioze mavungu eswe waze aajingilika kumaanwa musenge wa lamba Wahiana kusasa; ayo maanwa musenge weswe, mba maatoka lume.

Aisraele maakumba

¹⁷ “Ha mulundu wa Zione amwe kumaachina, muhabwa homa ha chijila. Alioze vungu lia Yakoba kumaazuka chifuchi cho cha chilakenyo.

¹⁸ Vungu lia Yakoba ni Yosefe kumaabwa ngwe kahia; kumoonona vungu lia Esau ngwe chize kahia kaakulesa mbamba jumu. Ku vungu lia Esau niumwe masala ni mwono. Yami Mwene Zambi nachamba.

¹⁹ “Ayuda a ku sude ya chifuchi cho maatambula chifuchi cha Edome maatwama mo. Waze a ku chitokelo, ku milundu, maatambula chifuchi cha Filistia; Aisraele maazuka yifuchi ya Efraime ni Samaria; akwa Benjamine maazuka Gileade.

²⁰ Mbunga ya njize a ku norde ya Israele maahiluka, maakumba chifuchi cha Fenishia ndoo ku limbo lia Zarefata ku norde. Njize a ku Yerusaleme waze atwama mu limbo lia Sardis no maakumba membo a ku sude ya Yuda.

²¹ Akwa kukumba a mu Yerusaleme kumaalwa vungu lia Edome ni kwayula. Mba Mwene Zambi iye mwene mabwa mwanangana.”