Nehemia 9 - Mukanda Wa Zambi 1970

Atu yaashikisa milonga yo

^1-2 Ha kakweji yoze mwene ha tangwa ha makumi aali ni awana, Aisraele yaakunguluka ni kulitwamina kulia nikusolola chinyengo cha milonga yo. Te haanalihandununa kulu kuli yilambala eswe. Yaazala mianji ni kulimwangina uto ha mitwe yo nikusolola yinyengo yo. Mba yaakatuka, yaabutuka kushikisa milonga yo ni yize ya tushakulu two.

³ Akwa lutwe yaatangila Aisraele Shimbi ja Mwene Zambi, Zambi yo, ola jitatu. Mba atu yaashikisa milonga yo ni kuwayila Mwene Zambi, Zambi yo, ola jikwo jitatu.

⁴ Kwabwile chitamba cha Alevi. Yeshua, ni Bani, ni Kadmiele, ni Shebania, ni Buni, ni Sherebia, ni Bani, ni Kenani yaamana ho, yaalemba kuli Mwene Zambi, Zambi yo, ni liji linene.

⁵ Alevi wano yaakatwisa atu hanga awayile: Yeshua, ni Kadmiele, ni Bani, ni Hashabneya, ni Sherebia, ni Hodia, ni Shebania, ni Petahia. Yaamba ngwo: “Katukenu nufumanyise Mwene Zambi, Zambi yenu; mufumanyisenu ndoo ku miaka yeswe ni miaka yeswe! Mutu mweswe afumanyise jina lienyi ha uhenya, chibwe uhaliso wetu kuwazukile.”

Aisraele yaashikisa milonga yo

⁶ Mba Aisraele eswe yaalemba ngwe chino: “Yena, Mwene Zambi, uli Mwene Zambi wika; yena watangile lilu ni e matongonoshi. Yena watangile hashi ni kalunga lwiji ni yuma yeswe yilimo; yeswe yiuyipwisa ni mwono. Akwa ndundo a mwilu kaakufukama ni kukuwayila.

⁷ Yena Mwene Zambi, watongwele Abrama Yiumutuhwisa ku Ure mu chifuchi cha Babilonia; Yiwalumuna jina lienyi, yilibwa Abrahama.

⁸ Yiumumona ngwe kali mukwa mbunge yibema, yiukolesa nenyi Usendo. Yiumulakenya kumwaha chifuchi cha Akanana, ni cha Ahite, ni cha Aamore, ni cha Aperize, ni cha Ajebuse, ni cha Agirgashe, chikabwe chifuchi cha vungu lienyi akatwame mo. Hiwalinga nikulita ni chilakenyo che, mumu uli mukwa kushishika.

⁹ “Yiumona chize tushakulu twetu amwene lamba mu Egiptu; yiwivwa muteto wo ku kalunga lwiji Muchila, yiwakwasa.

¹⁰ Yiulinga yilayi ya kukomwesa ulimike ni mwanangana wa Egiptu; ulimike ni akwa kuyula ni atu a mu chifuchi chenyi, mumu yiunyingika chize ahungumionene atu je. Jina lie yilifumana, kuliafumana ndoo ni musono.

¹¹ Yiumisa kalunga lwiji kulutwe lio yiwasongwela ndusu mu kalunga lwiji hashi homu. Yiukonga waze aakawile mu meya asuku ngwe liwe mu meya a tachi.

¹² Ha mwalwa yiwasongwela ni nguji lia lelwa ha ufuku yiwatemwina ni nguji lia kahia.

¹³ Yiuhulumuka ha mulundu wa Sinai; yiuhanjika kuli atu je, yiwaaha Shimbi jibema ni yiyulo yinalite.

¹⁴ Yiwaalweza ha kufunga matangwa je a kuhwima a chijila, yiwambila kavumbi ke Mose alweze atu Shimbi je.

¹⁵ “Muze evwile zala, yiwaaha mbolo ya mwilu, muze evwile pwila, yiwaaha meya a mu liwe. Yiwaalweza atambule chifuchi chize waalakenyene.

¹⁶ Alioze tushakulu twetu yaalengumuka, yaakwata pami, kaafungile ko Shimbi je.

¹⁷ Koononokene ko, keewulukile ko yilayi yeswe yize walingile hakachi ko. Mu kulengumuka cho yaatongola umwe tetekeli aahilwise nawa mu undungo mu Egiptu. Alioze yena uli Zambi yoze wakukonekena atu; uli mukwa utu ni zango, kuushi kutenuka nikawashi. Keke ye yili yinji, kuweehukile ko.

¹⁸ Yaalinga hamba wa kuji a ngombe, yaamba ngwo: ‘Yono kali zambi yoze watutuhwishile mu Egiptu!’ Mwene Zambi yaakusaula kuhiana!

¹⁹ Alioze chibwe chocho muze mu puya kuweehukile ko, mumu ha keke ye yinji. Lelwa ni kahia yize yalifwa ngwe nguji kuwayichijile ko, yiwaasongwela ha mwalwa ni ufuku.

²⁰ Mu utu ye yiwaalweza chize chaatamba kulinga; yiwalisa mana, yiwaaha meya a kunwa.

²¹ Ha miaka makumi awana mu puya yiwahoka, mahina jo kaafwile ko, molu jo kaajimbile ko.

²² “Yiwatayiza kukumba mavungu ni mawanangana, yifuchi yize waatetelele. Yaakumba chifuchi cha Heshbone, chize te akuyula Sihone, ni chifuchi cha Bashane, chize te akuyula Oge.

²³ Yiwaaha ana anji ngwe matongonoshi a mwilu, yiwaatayiza kukumba chifuchi ni kutwama mo, chize walakenyene tushakulu two akachihinge.

²⁴ Yaakumba chifuchi cha Kanana; yiuzeyesa atu waze abwile mo. Atu je yiwaaha tachi jakulinga ni atu ni mianangana a mu Kanana yize apalile.

²⁵ Atu je yaakumba membo akukoleka, chifuchi cha chinuno, ni mazuwo waze te haazala ni yikumba, ni mashima akutota, ni mitondo ya olive, ni ya vinyu, ni ya mihuko. Yaalia yeswe yize azangile, yaatohwa. Yaawahilila ni yuma yibema yize waahele.

²⁶ “Alioze atu je yaabwa ni pami, yaakukolema, yaalituna Shimbi je. Yaashihashiha akwa munanyi waze aakanyamishine, waze aalongesele hanga atewuluke kuli yena. Yaakushililika tangwa ha tangwa,

²⁷ kashika yiutayiza akwa kole jo kwakumba ni kwayula. Mu lamba lio yaateta kuli yena, yena mwilu yiwaakumbulula. Ni keke ye yinji yiwaatumina miata waze aalamwinyine kuli akwa kole jo.

²⁸ Muze haabwa ni uhwimino, yaavulumuna nawa, mba yiwaakunjika nawa mu moko ja akwa kole jo. Alioze muze haalumuka nawa ku mbunge ni yaateta kuli yena, yena mwilu yiwaabanjika, yiwaalamwina ni keke ye yinji nawa ni nawa.

²⁹ Yiwaakanyamisa ha kwononokena longeso lie, alioze mu kulengumuka cho yaalituna Shimbi je, chibwe Shimbi jize jakupwisa atu ni mwono. Akwa pami kanda akwa kukolema yaalituna kwoononoka.

³⁰ Yiulihumikiza no mwaka ha mwaka. Yiutuma akwa munanyi je aalongese, hindu kaabanjikile ko, mba yiwaakunjika mu moko ja yilambala.

³¹ Chibwe chocho mumu ha keke ye yinji, yena kuweehukile ko, chibwe kwoonona. Yena uli Zambi ya utu ni keke!

³² “Aa Zambi, Zambi yetu, yena uli munene! Uli kola woma, mukwa ndundo! Wakufunga yilakenyo ya Usendo we. Chize ku matangwa waze te akutuhungumiona kuli mianangana ja Asuria ndoo ni musono uno, twakumona lamba linji, mianangana jetu, ni miata jetu, ni mahako jetu, ni akwa munanyi jetu, ni tushakulu twetu, ni atu jetu eswe. Iwuluka kama lamba lize hitwamona!

³³ Yena walingile kanawa ha kutumwesa lamba. Yena uli mukwa ululi, chibwe yetu twavulumwine.

³⁴ Tushakulu twetu, ni mianangana jetu, ni miata jetu, ni mahako jetu, kaafungile ko Shimbi. Kaabanjikile ko ku yiyulo ye ni longeso lie.

³⁵ Yena yiuwahisa mianangana waze ayulile atu je, yiwaaha chifuchi chinene cha chinuno atwame mo, alioze keehukile ko yitanga yo yibi, kaakulingilile ko.

³⁶ Haliabwila tuli ndungo mu chifuchi chize watuhele, chifuchi cha chinuno chize chikwete yakulia.

³⁷ Chifuchi chakwima mbuto yinji. Twakuyilambula kuli mianangana a yilambala waze akutuyula mumu ha uhulia wetu. E mianangana kaakutuyula, ni ye yimuna yetu, nikulita ni chize anazange. Twaakumona lamba linji.”

Aisraele yaalakenya kufunga Shimbi ja Zambi

³⁸ Ha yuma yeswe yize yatuwanyine yetu Aisraele, tunakolesa Usendo ni Chisoneko. Miata, ni Alevi, ni mahako jetu kaanase yinyingi yo.