Nehemia 8 - Mukanda Wa Zambi 1970

Ezra yatangila atu mukanda wa Shimbi

¹ Ha kakweji wa muchishimbiali Aisraele eswe te haatwama kulu mu membo jo. Mba ha tangwa litangu lia kakweji ayo eswe yakunguluka mu limbo lia Yerusaleme, mu lwaza hehi ni chikolo cha Meya. Yaahula hako Ezra anehe mukanda wa Shimbi jize Mwene Zambi ambilile Mose alweze Aisraele.

² Mba hako Ezra yawanda, yauneha ku meso ja atu eswe: malunga, ni mapwo, ni akweze waze haakola.

³ Kwe ku lwaze hehi ni chikolo Ezra yaatangila we mukanda wa Shimbi, chize ku chichamene ndoo ni tangwa ha muchima. Eswe yaabanjika kanawa.

⁴ Hako Ezra te kanamana ha chitamba cha mitondo chize alulikile mumu ha tangwa lize. Atu wano yaamanyina ku kwoko lia chindume: Matitia, ni Shema, ni Anaya, ni Uria, ni Hilkia, ni Maseya. Ku kwoko lienyi lia chimeso yikubwa: Pedaya, ni Mishaele, ni Malkija, ni Hashume, ni Hashbadana, ni Zakaria, ni Meshulame.

⁵ Muze te hako Ezra anamana ha chitamba chisuku ku meso ja atu, ayo eswe yaamuhulikila meso. Muze habakula mukanda, ayo eswe yaakatuka.

⁶ Hako Ezra yachichimieka Mwene Zambi, mwe Zambi munene. Atu eswe yaazundula moko jo helu, yaamba ngwo: “Chibwe kama Chenacho! Chibwe kama Chenacho!” Yaafulamana hashi, yaawayila Mwene Zambi.

⁷ Mba yaakatuka, yaamana kikilii homa lio. Alevi wano yaalumbunwina Shimbi ja Zambi: Yeshua, ni Bani, ni Sherebia, ni Jamine, ni Akube, ni Shabetai, ni Hodia, ni Maseya, ni Kelita, ni Azaria, ni Jozabade, ni Hanane, ni Pelia.

⁸ Yaatanga zwalala mukanda wa Shimbi ja Mwene Zambi, yaaulumbununa hanga atu evwe kanawa.

⁹ Muze atu heevwa ulumbunwiso wa mukanda wa Shimbi, eswe yaabutuka kulila. Kashika mwe mukwa kuyula Nehemia, ni hako Ezra kanda longeshi ya Shimbi, ni Alevi waze alumbunwine we mukanda yaamba ngwo: “Akwetu, lino lili tangwa lia chijila lia Mwene Zambi, kashika kuchanutambile kunenganyana ni kulila.

¹⁰ Haliabwila hiyeenu ku mazuwo jenu, nulie kanawa. Nulianyine yakulia ni vinyu ni waze keeshi nayo. Mumu musono lili tangwa lia chijila lia Mwene Zambi yetu, kashika kanda nunenganyana. Uwahililo uze Mwene Zambi ananwehe muunutakamisa.”

¹¹ Alevi yaaholesa atu ngwo: “Holenu, kanda nulinyenga, mumu tangwa lino lili lia chijila.”

¹² Mba atu eswe yaahilwoka ku mazuwo jo, yaahaha, yaanwanwa ni uwahililo, yaalianyino yakulia yo ni yiswale, mumu evwile kanawa ulumbunwiso wa maliji waze.

Chiwanyino cha Yikulika

¹³ Muze hikwacha, miata ja majimo, hamwe ni mahako ni Alevi, yaaya kuli hako Ezra ni kulilongesa je Shimbi.

¹⁴ Yaawana mu mukanda wa Shimbi, jize Mwene Zambi ambilile Mose alweze atu, ngwe, Aisraele chaatamba kutwama mu yikulika ha matangwa eswe a chiwanyino cha Yikulika.

¹⁵ Mba yaaha longeso lino ni yaalinyingikisa mu Yerusaleme mweswe ni mu membo akwo ni mu yihunda yikwo ngwo: “Yeenu ku milundu hanga nubatwole mitango ya pine, ni ya olive, ni ya mirte, ni mingaji, ni ya mitondo yikwo, nutunge yikulika nikulita ni longeso ha Shimbi.”

¹⁶ Chenacho atu ayile ni kubatwola mitango, yaatunga yikulika ha mafulumba ja mazuwo jo, ni mu maaze jo, ni mu yiize ya zuwo ha Zambi, ni mu malwaza hehi ni chikolo cha Meya ni chikolo cha Efraime.

¹⁷ Atu eswe waze akatukile mu undungo yaatunga yikulika, yaatwama mo. Chino chabwile chisuho chitangu afungile chiwanyino chize, chize ku matangwa ja Yoshua mwana wa Nune. Atu eswe yaawahilila kuhiana.

¹⁸ Chize ku tangwa litangu lia chiwanyino ndoo ku tangwa ha kusula te kaakutanga Chihanda cha Shimbi ja Zambi. Yaafunga chiwanyino matangwa shimbiali. Mba ha tangwa ha muchinake yaalikungulula ha kumanununa chiwanyino, ngwe chize chasonewene.