Nehemia 6 - Mukanda Wa Zambi 1970

Akwa kole yaatwama Nehemia punga amushihe

¹ Sambalate, ni Tobia, ni Gesheme, ni akwa kole jetu akwo yeevwa ngwo, hitwamanununa kutungulula chipanga cha mawe, nawa ngwo, kukwasalile chituwa nichimwe. Alioze kanda te luchisa yajilo.

² Kashika Sambalate ni Gesheme yaangutumina liji ngwo: “Tweya tulitakane mu chimwe chihunda mu chana cha Ono.” Chabwile lume kalimbalimba ko hanga angushihe.

³ Yingwatumina tunganda, yingwalweza ngwami: “Mala, mulimo unene nguli nawo, chahashile kwiza. Milimo yeswe muyifwa nyi neza koko.”

⁴ Yaangutumina nawa liji lizeliene yisuho yiwana, ni yami yisuho yeswe yingwakumbulula ni liji limuwika.

⁵ Mba ha chisuho cha muchitano, mwe Sambalate yangutumina kavumbi kenyi ni mukanda uze te kuushi kukasa.

⁶ Yasoneka ngwenyi: “Gesheme hangulweza ngwenyi, sango hijamwangana mukachi ka mavungu waze tunasulangana no ngwo, yena ni Ayuda nuneseka kulimika ni mwanangana, kashika hinwatungulula chipanga. Nawa ngwenyi, unambe kulipwisa mwanangana yena mwene.

⁷ Hiwalulika kulu hanga amwe akwa munanyi ja Zambi ambujole mu Yerusaleme ngwo, yena uli mwanangana wa Ayuda. Tala, Chuma chino mwanangana machivwa. Kashika nanyonga ngwami, yena ni yami tweya tulitakane hanga tululike Chuma chino.”

⁸ Yingumukumbulula ngwami: “Yeswe yize unambe hi yamwenemwene ko. Yena mwene wayitomba.”

⁹ Ayo eswe yeeseka kutuvwisa woma, hanga tulekumuke tulitwamine kulinga milimo. Alioze yingulemba ngwami: “Aa Zambi! Haliabwila ngutakamise kama!”

¹⁰ Ha tangwa lize yinguya ni kunangisa Shemaya, mwana wa Delaya mujikulu wa Mehetabele. Te kahashile kutuhuka mu zuwo lienyi. Yangulweza ngwenyi: “Yena ni yami chatutamba kuya ni kuswama muma mwa chijila mu zuwo lia Zambi, mutwajila yajilo, mumu kaanambe kukushiha. Ha umwe ufuku kumeza ni kukushiha.”

¹¹ Yingukumbulula ngwami: “Mutu ngwe yami munguhasa kuchina, nyi? Kuma Unanyongo mutu ngwe yami mungweseka kulilamwina nguswame mu zuwo lia Zambi, nyi? Chayile ko.”

¹² Muze hinanyonga hakutwala ku Chuma chize, yingunyingika ngwami, Zambi kahanjikile ko kuli Shemaya, alioze ngwami, Tobia ni Sambalate enoo haamwaha mbongo angwambe maliji wano.

¹³ Haamwaha mbongo hanga anguvwise mwongo hanga nguvulumune, abihise lufuma wami, anguvwise sonyi.

¹⁴ Yingulemba ngwami: “Aa Zambi, iwuluka chize Tobia ni Sambalate haalinga, amwese kama lamba. Iwuluka nawa pwo yoze mukwa munanyi Nodia ni akwa munanyi akwo eswe waze anakazanga kunguvwisa woma.”

Aisraele yaamanununa milimo

¹⁵ Milimo ya chipanga cha mawe yichihwa ha tangwa makumi aali ni lia muchitano lia kakweji wa Elule, muze te hitwalinga kulu milimo matangwa makumi atano ni aali.

¹⁶ Muze akwa kole jetu waze atujingilika haachivwa, yaanyingika ngwo, mana kaasula, mumu mutu mweswe yanyingika ngwenyi, milimo yino twayilinga ni ndundo ja Zambi.

¹⁷ Ha matangwa waze eswe miata ja Ayuda yaalisonekena mikanda ni Tobia.

¹⁸ Ayuda anji abwile ku sali lienyi mumu Ukwe wenyi Shekania mwana wa Ara te Kayuda. Nawa, Jehonane, mwanenyi wa lunga te hambata mwana wa Meshulame mwana wa Berekia.

¹⁹ Atu yaangulweza yitanga yibema yeswe yize Tobia alingile, yaamulweza nawa yeswe yize nahanjekele. Kashika yanyongonona kungusonekena mikanda yakunguvwisa woma.