Nehemia 5 - Mukanda Wa Zambi 1970

Nehemia yahakwila yiswale

¹ Amwe matangwa akwo kulutwe, atu anji, malunga ni mapwo, yaabutuka kulinyenyeta hali usoko wo Ayuda.

² Amwe yaamba ngwo: “Tuli ni ana anji, tunahono yakulia.”

³ Akwo ngwo: “Hitwatokesa minda yetu ya yakulia, ni ya vinyu, ni mazuwo jetu, hanga tumone yakulia.”

⁴ Akwo ngwo: “Hitwasondama mbongo ja kulambula mulambu wa wanangana, mumu ha minda yetu ya mbuto ni ya vinyu.

⁵ Alioze yetu eswe tuli Ayuda. Kuma ana jetu hi abema ko ngwe ana jo, nyi? Hindu hitwahana ana jetu mu undungo. Ana jetu a mapwo amwe haabwa ndungo. Mama lambe! Kutwahashile kulinga nichimwe mumu minda yetu ya yakulia ni ya vinyu haanayitambula.”

⁶ Muze hinevwa kulinyenyeta cho, yingutenuka,

⁷ yingubatula ngwami, mungubajila miata ni akwa kuyula akwo mumu kaakutambula mbwezo kuli usoko wo. Yingwatambika ku punga yinene ni kusopa mulonga wo,

⁸ yingwamba ngwami: “Ni tachi jeswe jize twabwile najo hitunakulu usoko wetu Ayuda waze abichiwile kuli yilambala. Kuma nunashinjika nawa akwenu alilanjise kuli usoko wo Ayuda, nyi?” Miata yaahola kuluu, kaanyingikine chize maamba.

⁹ Yingwamba nawa ngwami: “Chuma chino nwakulinga hi chibema ko. Chanutamba kuvwila Zambi woma ni kulinga chibema, mba kunuchi kuhana jila kuli mavungu akwo ha kutuchoka.

¹⁰ Yami, ni masepa jami, ni akwa milimo jami tunakasondamisa mbongo ni yakulia kuli atu. Ni haliabwila kanda tujikala.

¹¹ Jimunenu makongo jo: mbongo, ni yakulia, ni vinyu, ni maji a olive, ni mazuwo jo.”

¹² Miata ni akwa kuyula akwo yaakumbulula ngwo: “Ewa mwane, mutulinga ngwe chize nunambe. Mutuhilwisa yeswe, kutuchi kukala nawa makongo waze.” Yingutambika mahako, yingushingisa miata ku meso jo hanga afunge chilakenyo cho.

¹³ Mba yingulikukumuna hina lize te ngunazala mu zalilo yami ni kulizula. Yingwalweza ngwami: “Chenacho makalinga Zambi kuli yenu nyi kunuchi kufunga chilakenyo chenu. Zambi makatambula mazuwo jenu ni yuma yenu yeswe, makanukatwisa mokomoko.” Atu eswe waze te anamana ko yaamba ngwo: “Chibwe kama Chenacho!” Mba yachichimieka Mwene Zambi. Miata yaafunga yilakenyo yo.

Nehemia yabwa chilweza chibema

¹⁴ Chize ku tangwa lize angutongwele kubwa mukwa kuyula mu chifuchi cha Yuda, ha mwaka wa makumi aali wa kuyula cha mwanangana Artasherke ndoo ni ku miaka yenyi makumi atatu ni yaali, ha miaka yize yeswe yami chibwe usoko wami kutwalile ko yakulia ya mwanangana.

¹⁵ Alioze akwa kuyula waze aliangile te kaakutambula milambu kuli atu tangwa ha tangwa ya yakulia ni vinyu ya makumi awana a mbongo ja prata. Chibwe tuvumbi two yaabinjisa atu. Alioze yami chalingile ngwe chize, mumu nevwilile Zambi woma.

¹⁶ Chikwo nawa yingulihana ni kutungulula chipanga cha limbo lia Yerusaleme, chalanjile kwami minda, ni akwa milimo jami eswe yaalikunjika ni kutunga.

¹⁷ Ayuda ni miata jo 150 te kaakulia ku mesa yami, kuweza ho nawa atu waze te akwizaza ku mavungu waze akutujingilika.

¹⁸ Lieswe tangwa twalile ngombe umuwika ni mapanga asambano abema kuhiana, ni tusumbi anji, ni ha matangwa kumi yangululikila vinyu yaha. Alioze yami nanyingika yiteli yilemu ya atu, kashika chahulile kwami yakulia yize mukwa kuyula matambula.

¹⁹ Aa Zambi, ngunakulembe, ngwiwuluke kama ha yuma yeswe yize hinalingila atu wano.