Nehemia 4 - Mukanda Wa Zambi 1970

Nehemia yasa tufunga hanga akinde akwa kole

¹ Muze Sambalate hevwa ngwo, Ayuda haabutuka kutungulula chipanga cha mawe, yevwa ufwatulo unji, yabutuka kwachoka.

² Yahanjika ku meso ja masepa jenyi ni ja tujita twa Samaria ngwenyi: “Wano Ayuda kaali amokomoko, yika anambe kulinga? Kaananyongo ngwo, maahasa kutungulula limbo, nyi? Hanji ha kulambula milambu kuli Zambi maahasa kumanununa milimo yize ha tangwa limuwika, nyi? Kuma mahasa kuvumbula mawe ku yiswaswa ya yuma yize yawemene kulu, nyi?”

³ Tobia te kanamana hehi nenyi, neye yaweza ho maliji ngwenyi: “Che chipanga chize anazange kutungulula cha mulali uka? Ngwami, chibwe mukuza mahasa kuchibuzula!”

⁴ Mba yami Nehemia yingulemba ngwami: “Aa Zambi yami, banjika kama chize anatuchoko! Hilwisa kama luchoko yono hali ayo ene. Yuma yize yeswe anabichi ayiye kama kuli eji, apwise kama funge mu chifuchi cha yilambala.

⁵ Kanda wakonekena uhenge wo, kanda ujimuna milonga yo, mumu haatuchoka ha yize tunalingi.”

⁶ Alioze chibwe chocho yetu yitunyongonona kutungulula chipanga. Mba ha kashimbu lume chipanga hichaheta hakachi ka chizundamo chacho, mumu atu yaalihana ku milimo.

⁷ Muze Sambalate ni Tobia, ni atu a ku Arabia, ni Amone, ni akwa Ashdode heevwa ngwo, milimo ya kutungulula chipanga cha Yerusaleme yinayi kulutwe, ni yituwa haayijikajika, yeevwa ufwatulo.

⁸ Mba yaatwama punga ya kwasa jita ni yetu akwa Yerusaleme hanga atubinjise.

⁹ Alioze yetu yitulemba kuli Mwene Zambi, yitusa tufunga a mwalwa ni a ufuku.

¹⁰ Ayuda te kaanembi mwaso uno ngwo: “Hitwalekumuka ni kumbata yiteli; yiswaswa yinji yiliko ya kuchiza. Ngwe kuchi mutuhasa kutunga chipanga musono?”

¹¹ Akwa kole jetu te kaananyongo ngwo, kutuchi kwamona hanji kunyingika manyonga jo ndoo haatuheta atushihe, ni kukinda milimo yetu.

¹² Alioze Ayuda waze abwile hakachi ka akwa kole jetu te kaakwiza ni kutukanyamisa muze akwa kole jetu akululika kulimika ni yetu.

¹³ Mba yingulonga atu ni mikwale, ni makunga, ni mata a kwasa, yingwaasa nikulita ni majimo jo kunyima lia che chipanga, kuze te kanda achimanununa kutunga.

¹⁴ Yingumona ngwami, atu haalekumuka, mba yingwalweza hamwe ni miata ni akwa lutwe jo ngwami: “Kanda nuvwila akwa kole jetu woma. Iwulukenu Mwene Zambi kali munene, kali kola woma. Asenu jita, nulamwine usoko wenu, ni ana jenu, ni mapwo jenu, ni majiko jenu.”

¹⁵ Akwa kole jetu yeevwa ngwo, hitwanyingika kulu punga yize atwamine, yaanyingika nawa ngwo, Zambi hamwanga punga yo. Mba yetu eswe yituhiluka ni kutungulula che chipanga.

^16-17 Chize ku tangwa lize mbunga yimuwika ya malunga yaalinga milimo. Mbunga yikwo yaabwa tufunga, yaazala mahina a utale a jita, yaakwata makunga, ni kebwe, ni mata a kwasa. Ni e miata jetu yaatakamisa atu waze te anatungu che chipanga. Chibwe waze te anambata yuma ya kutunga nayo, yaachilinga ni kwoko limuwika, ni kwoko likwo anakwata chitwa cha jita.

¹⁸ Tungi mweswe te kanaswelela mukwale mu zalilo yenyi. Mutu yoze te uli ni chitavwi yamana hamwe ni yami.

¹⁹ Yingwambila atu ni miata, ni akwa lutwe ngwami: “Milimo hiyoka, tuli kusuku amwe ni akwo ha chipanga.

²⁰ Nyi ngwe nwevwa chitavwi, nukunguluka kuli yami. Zambi yetu matwashila jita.”

²¹ Tangwa ha tangwa, chize ku kuvumbuka cha tangwa ndoo ku kusoloka cha matongonoshi ha ufuku, mbunga ya ha muchima ya kuli yetu yaatunga chipanga, ni mbunga yikwo yaafunga chipanga ni makunga.

²² Ha matangwa waze yingwambila akwa lutwe ja milimo ngwami, ayo ni yikwashi jo eswe chaatamba kutwama mu Yerusaleme ha ufuku, hanga tuhase kufunga limbo ha ufuku ni kulinga milimo ha mwalwa.

²³ Chazulile ko mahina jami ha ufuku, chibwe akwetu, chibwe tuvumbi twami, chibwe tufunga twami. Yetu eswe yitukwata yitwa ya jita ku moko.