Nehemia 3 - Mukanda Wa Zambi 1970

Ayuda yatungulula chipanga cha Yerusaleme

¹ Chipanga cha mawe cha Yerusaleme yaachitungulula ngwe chino. Mwata wa mahako Eliashibe ni mahako akwo yaatungulula chikolo cha Mapanga, yaachikunjika; yaasako yajilo. Yaakunjika chipanga ndoo ku zuwo lisuku lia kukoleka lia Kulakaji ni lia Hananele.

² Malunga ja Yeriku yaatungulula Chipinji chize chasulile ko. Zakure mwana wa Imra neye yatunga chize chasulile ko.

³ Akwa jimo lia Hasena yaatunga chikolo cha Yishi. Yaasako manguji, ni yajilo, ni yikungo ya kukashila nayo yajilo.

⁴ Meremote, mwana wa Uria mujikulu wa Hakoze, yatunga Chipinji chize chasulile ko. Meshulame mwana wa Berekia mujikulu wa Meshezabele, yatunga Chipinji chize chasulile ko. Zadoke mwana wa Bana yatunga Chipinji chize chasulile ko.

⁵ Malunga ja Tekoa yaatunga Chipinji chize chasulile ko, alioze akwa lutwe ja limbo yaalituna milimo yize aahele kuli miata a milimo.

⁶ Joyada mwana wa Pasea, ni Meshulame mwana wa Besodeya yaatungulula chikolo cha Jeshana. Yaasako manguji ni yajilo ni yikungo ya kukashila nayo yajilo.

⁷ Melatia wa ku Gibeone, ni Jadone wa ku Meronote, ni malunga ja Gibeone ni Mizpa yaatunga Chipinji chize chasulile ko ndoo ku zuwo lia mukwa kuyula chifuchi cha ku chitokelo cha lwiji Ufrateze.

⁸ Uziele mwana wa Harhaya, fuli ya oru, yatunga Chipinji chize chasulile ko. Hanania, mukwa kulinga maji a vumba libema, yatunga Chipinji chize chasulile ko, ndoo ku chipanga chinene.

⁹ Refaya mwana wa Hure, mukwa kuyula wa Chihanda cha chota cha Yerusaleme, yatunga Chipinji chize chasulile ko.

¹⁰ Jedaya mwana wa Harumafe, yatunga Chipinji chize chasulile ko, hehi ni zuwo lienyi.

Hatushe mwana wa Hashabnia yatunga Chipinji chize chasulile ko.

¹¹ Malkija, mwana wa Harime, ni Hashube, mwana wa Pahate Moabe, yaatunga Chipinji chize chasulile ko ni zuwo lisuku lia kukoleka lia Lutengo.

¹² Shalume mwana wa Haloheshe, mukwa kuyula wa Chihanda chikwo cha chota cha Yerusaleme, yatunga Chipinji chize chasulile ko. (Ana jenyi a mapwo yaamukwasa.)

¹³ Hanune ni akwa limbo lia Zanoa yaatungulula chikolo cha Chikulo. Yaasako yajilo ni yikungo ya kukashila yajilo, yaatungulula nawa Chipinji cha chipanga metro 440, ndoo ku chikolo cha Pinga.

¹⁴ Malkija mwana wa Rekabe, mukwa kuyula chifuchi cha Bete Hakereme, yatungulula chikolo cha Pinga. Yaasako yajilo, ni yikungo ya kukashila yajilo.

¹⁵ Shalume mwana wa Kolhoze, mukwa kuyula chifuchi cha Mizpa, yatungulula chikolo cha Shima, yasako yajilo, ni yikungo ya kukashila yajilo. Ku chitende cha Shela yatungulula Chipinji cha chipanga chize ku munda wa mwanangana ndoo ku unyinyino uze watala ku Limbo lia David.

¹⁶ Nehemia mwana wa Azbuke, mukwa kuyula Chihanda cha chifuchi cha Betzure, yatunga Chipinji chize chasulile ko, ndoo ku fuka lia David, ni ku chitende, ni ku zuwo lia tujita.

Alevi waze atungile chipanga

¹⁷ Alevi wano yaatungulula yimwe yipinji ya chipanga cha mawe chize chasulile ko: Rehume mwana wa Bani yatunga Chipinji chize chasulile ko. Hashabia, mukwa kuyula wa Chihanda cha chota cha Keila, yatunga Chipinji chize chasulile ko mumu ha chifuchi chenyi.

¹⁸ Bavai mwana wa Henadade, mukwa kuyula wa Chihanda chikwo cha chota cha Keila, yatunga chize chasulile ko.

¹⁹ Ezere mwana wa Jeshua, mukwa kuyula Mizpa, yatunga chize chasulile ko kulutwe lia zuwo lia yitwa ya jita, ndoo ku mbango ja che chipanga.

²⁰ Baruke mwana wa Zabai, yatunga chize chasulile ko, ndoo ku chikolo cha zuwo lia mwata wa mahako Eliashibe.

²¹ Meremote, mwana wa Uria mujikulu wa Hakoze, yatunga chize chasulile ko, ndoo ku songo lia zuwo lia Eliashibe.

Mahako waze atungile chipanga

²² Mahako wano yaatungulula yimwe yipinji ya chipanga yize yasulile ko: Mahako waze akutwama hehi ni Yerusaleme yaatungulula chize chasulile ko.

²³ Benjamine ni Hashube yaatunga Chipinji chize chasulile ko, chize chabwile kulutwe lia mazuwo jo. Azaria, mwana wa Maseya mujikulu wa Anania, yatunga Chipinji chize chasulile ko, kulutwe lia zuwo lienyi.

²⁴ Binwi mwana wa Henadade yatunga chize chasulile ko, yachiza ku zuwo lia Azaria ndoo ni ku mbango ya chipanga.

^25-26 Palale mwana wa Uzai, yatunga chize chasulile ko, chize ku mbango ya chipanga ndoo ku zuwo lisuku lia kukoleka ku zuwo lia mwanangana hehi ni yiize ya tufunga. Pedaya mwana wa Paroshe yatunga chize chasulile ko, ndoo kuma kumwe ku chivumbuko hehi ni ku chikolo cha Meya ni zuwo lisuku lia kukoleka lize liakufunga zuwo lia Zambi. (Kwabwile hehi ni Chihanda cha limbo chize akuvuluka ngwo, Ofele, kuze te kwatwama akwa milimo ya mu zuwo lia Zambi.)

Tungi akwo

²⁷ Malunga ja ku Tekoa yaatunga Chipinji chize chasulile ko, Chipinji cho cha muchaali, chize ku zuwo lisuku lia kukoleka lize liakufunga zuwo lia Zambi ndoo ku chipanga hehi ni Ofele.

²⁸ Mbunga ya mahako yaatunga chize chasulile ko, chize ku chikolo cha Tuvwalu ku norde, mutu ni mutu yatungila kulutwe lia zuwo lienyi.

²⁹ Zadoke mwana wa Imere yatunga chize chasulile ko, kulutwe lia zuwo lienyi. Shemaya mwana wa Shekania, kafunga ka chikolo cha Chivumbuko, yatunga chize chasulile ko.

³⁰ Hanania mwana wa Shelemia, ni Hanune mwana wa muchisambano wa Zalafe, yaatunga chize chasulile ko, Chihanda cho cha muchaali. Meshulame mwana wa Berekia, yatunga chize chasulile ko, kulutwe lia zuwo lienyi.

³¹ Malkija, umwe fuli ya oru, yatunga chize chasulile ko, ndoo ku zuwo lia akwa milimo a mu zuwo lia Zambi ni lia akwa kulanjisa, ku chikolo cha Kutala, hehi ni chibatulo cha ha mbango ya che chipanga ku norde ku chivumbuko cha chipanga.

³² Fuli ja oru ni akwa kulanjisa yaatunga Chipinji cha kusula, chize ku chibatulo cha ha mbango ndoo ku chikolo cha Mapanga.