Nehemia 2 - Mukanda Wa Zambi 1970

Nehemia yaya ku Yerusaleme

¹ Ha kakweji wa Nisane ha mwaka wa makumi aali wa kuyula cha mwanangana Artasherke, ha shimbu lize te akunwa vinyu, yami yingumutwalila lio. Nilimwe tangwa te kanda nguchisoloka kama ni chinyengo ku meso jenyi.

² Kashika mwanangana yanguhula ngwenyi: “Kuchi mba yena Unevu chinyengo? Kuushi ni yikola, chili lume chinyengo cha mu mbunge.” Aho yingwivwa woma unji.

³ Yingukumbulula ngwami: “Vuliemwanangana! Ngwe kuchi chichi kwivwa chinyengo nyi limbo liami, kuze afunjile tushakulu twami, haalibuzula ni ye yajilo yalio haayocha yeswe upu?”

⁴ Mba mwanangana yanguhula ngwenyi: “Yika mba unazange?” Yingulemba kuli Zambi wa Mwilu,

⁵ mba yingukumbulula mwanangana ngwami: “Vulie mwanangana! Nyi hinawana vumbi ku meso jenu, ngutayizenu kama nguye ku chifuchi cha Yuda, ku limbo kuze afunjile tushakulu twami, ngulitungulule.”

⁶ Mwe mwanangana te kanatwama ni mwazovu wenyi, yatayiza liji liami. Mwanangana yanguhula ngwenyi: “Tangwa lika muuya, muukatwama ko matangwa angahi?” Yingumulweza.

⁷ Mba yingumuhula angwehe mikanda ya kutwala kuli akwa kuyula chifuchi cha ku chitokelo cha lwiji Ufrateze, hanga angutayize kuya ku chifuchi cha Yuda.

⁸ Yingumuhula nawa mukanda wa kuhana kuli Asafe, kafunga ka usaki wa wanangana, hanga angwehe mitondo mumu ha yajilo ya chipanga cha zuwo lia Zambi, ni chipanga cha limbo, ni zuwo lize te mungutwama. Mwanangana yangwaha yeswe yize namwichile, mumu Zambi wabwile hamwe ni yami.

⁹ Yatuma amwe miata ja tujita ni mbunga ya tujita waze te akwenda ha tuvwalu hamwe ni yami. Mba yinguya ku chitokelo cha Ufrateze, yinguhana ye mikanda ya mwanangana kuli akwa kuyula.

¹⁰ Alioze Sambalate, wa ku limbo lia Bete Horone, ni Tobia, umwe mwata wa mu chifuchi cha Amone, yeevwa ngwo, umwe lunga weza ko ni kukwasa Aisraele. No yeevwa wuli unji.

¹¹ Yinguya ku Yerusaleme, alioze ha matangwa atatu

¹² chalwezele mutu niumwe yuma yize Mwene Zambi angulwezele ngulinge mu limbo. Mba yingutuhuka ha muchima ufuku hamwe ni amwe malunga ni chimbulu chami hali yoze te nakwendela.

¹³ Te kuchili ufuku muze natuhukile mu limbo ku chikolo cha chikulo ku chitokelo. Yinguya ku sude nikubalika shima lia Dragone ndoo ku chikolo cha Pinga. Muze te ngunayi yingutala chipanga cha limbo chize hichabuzuka ni ye yajilo yize yawemene.

¹⁴ Mba ku sali lia chivumbuko lia limbo yinguya ku norde ndoo ku chikolo cha Shima ni ndoo ku chitende cha mwanangana. Alioze chimbulu hali yoze te ngunendela kamwene ko haze mabalikila.

¹⁵ Kashika yingupalumuka ku chikulo cha Kidrone, yingwendela hali chimbulu nikutala chipanga. Mba yingwalumuka, yinguhiluka ku jila yizeyene, yingunjila nawa mu limbo mu chikolo cha Chikulo.

¹⁶ Miata ja limbo kaanyingikine ko kuze nayile ni yize nalingile, mumu te kanda ngulweza usoko wami Ayuda: mahako, ni miata, ni akwa lutwe, chibwe atu akwo waze malinga milimo.

¹⁷ Alioze mba yingwalweza ngwami: “Achinyongenu lamba libwa haha, mumu Yerusaleme hanabuzuka, ni yajilo yenyi hiyinaweme, tuyenu tutungulule chipanga cha Yerusaleme, kanda twivwa nawa sonyi.”

¹⁸ Yingwalweza chize Mwene Zambi ali hamwe ni yami, ni chize hangukwasa, ni maliji waze mwanangana hangulweza. No yaangukumbulula ngwo: “Tukatukenu, tutungulule lie limbo.” Mba yaalitakamisa ni kubutula milimo.

¹⁹ Alioze muze Sambalate, ni Tobia, ni umwe Karabia Gesheme heevwa chize twalulikile, yaatuseha nikwamba ngwo: “Chika nunambe kulinga? Munuhamika ni mwanangana, nyi?”

²⁰ Yingukumbulula ngwami: “Zambi wa Mwilu kumatuwahisa. Tuli tuvumbi twenyi, kumutubutula kutungulula. Alioze yenu kunushi chihinga hanji chiyulo nichimwe mu Yerusaleme.”