Nehemia 11 - Mukanda Wa Zambi 1970

Atu waze te atwama mu Yerusaleme

¹ Miata te haatunga mu limbo lia Yerusaleme. Atu akwo yaata yela, yaatongola jiko limuwika mukachi ka majiko kumi waze maatunga mu Yerusaleme mu limbo lia Zambi, alioze atu akwo maatunga mu membo ni mu yihunda yikwo.

² Atu yaachichimieka mweswawo mabatula mu zango lienyi mwene kutwama mu Yerusaleme.

³ Mu membo akwo ni yihunda yikwo Aisraele ni mahako, ni Alevi, ni akwa milimo a ku zuwo lia Zambi, ni vungu lia tuvumbi twa Solomone yaatwama mu yihinga ni mu yihunda yo ene. Wano kaali majina ja atu alemu a mu chifuchi cha Yuda waze atwamine mu Yerusaleme.

⁴ Akwa vungu lia Yuda: Ataya, mwana wa Uzia, mujikulu wa Zakaria. Tushakulu twenyi akwo: Amaria, ni Shefatia, ni Mahalale a ku vungu lia Pereze mwana wa Yuda.

⁵ Maseya, mwana wa Baruke, mujikulu wa Kolhoze. Tushakulu twenyi akwo: Hazaya, ni Adaya, ni Joyaribe, ni Zakaria, a ku vungu lia Shela mwana wa Yuda.

⁶ Malunga alemu waze te atwama mu Yerusaleme a ku vungu lia Pereze eswe te 468.

⁷ Akwa vungu lia Benjamine: Salu, mwana wa Meshulame, mujikulu wa Joede. Tushakulu twenyi akwo: Pedaya, ni Kolaya, ni Maseya, ni Itele, ni Jeshaya.

⁸ Gabai ni Salai, yikusula usoko wa Salu. Akwa Benjamine waze te atwama mu Yerusaleme eswe te 928.

⁹ Joele mwana wa Zikri te mwata wo, ni Yuda mwana wa Hasenwa te mwe mulopo wa limbo.

¹⁰ Mahako: Jadaya mwana wa Joyaribe, ni Jakine.

¹¹ Seraya, mwana wa Hilkia, mujikulu wa Meshulame. Tushakulu twenyi akwo: Zadoke, ni Merayote, ni Ahitube, te mwe mwata wa mahako.

¹² Ayo eswe 822, waze te akulinga milimo mu zuwo lia Zambi. Adaya, mwana wa Jerohame, mujikulu wa Pelalia. Tushakulu twenyi: Amzi, ni Zakaria, ni Pashure, ni Malkija.

¹³ Mu jimo lize miata ja majiko eswe 242. Amasai, mwana wa Azarele, mujikulu wa Azai. Tushakulu twenyi Meshilemote ni Imere.

¹⁴ Mu jimo lino mwabwile tujita a tachi 128. Mwata wo Zabdiele, lunga wa ku limwe jiko lia lufuma.

¹⁵ Alevi: Shemaya, mwana wa Hashubi, mujikulu wa Azrikame. Tushakulu twenyi Ashabia ni Buni.

¹⁶ Shabetai ni Jozabade, Alevi a lufuma, akwa milimo ku zuwo lia Zambi.

¹⁷ Matania, mwana wa Mika, mujikulu wa Zabdi, te wa ku vungu lia Asafe. Te mwe mukwa lutwe wa mbunga ja njimba waze akwimba ha yilemba ya kusakwila Zambi. Bakbukia, te mwe mulopo wa Matania. Abda, mwana wa Shamwa, mujikulu wa Galale, te wa ku vungu lia Jedutune.

¹⁸ Alevi waze atwama mu limbo lia chijila lia Yerusaleme te 284.

¹⁹ Tufunga twa zuwo lia Zambi: Akube, ni Talmone, ni e usoko wo, eswe 172.

²⁰ Aisraele akwo ni mahako ni Alevi akwo te kaatwama mu yihunda yo ene ni mu membo jo ene a yihinga mu chifuchi cha Yuda.

²¹ Akwa milimo a ku zuwo lia Zambi te kaatwama mu chota cha Yerusaleme, chize te akuvuluka ngwo, Ofele. Akwa lutwe jo te Ziha ni Gishpa.

²² Uzi mwana wa Bani, mujikulu wa Hashabia, te mukwa lutwe wa Alevi waze te atwama mu Yerusaleme. Tushakulu twenyi Matania ni Mika. Te kali nawa wa ku jimo lia Asafe, akwa jimo waze te kaali ni milimo ya miaso mu zuwo lia Zambi.

²³ Kwabwile Shimbi jize mwanangana ahanyine ha kulumbununa chize akwa majiko memba miaso tangwa ha tangwa mu zuwo lia Zambi.

²⁴ Petahia mwana wa Meshezabele, wa ku jimo lia Zera ni vungu lia Yuda, mwenawo wabwile kafufuchi wa Aisraele ku meso ja mwanangana wa chifuchi cha Persia.

Atu ja mu membo akwo ni yihunda yikwo

²⁵ Atu anji te atwama mu yihunda hehi ni minda yo. Ayuda te kaatwama mu Kiriate Arba, ni Dibone, ni Jakabzele, ni mu yihunda yize yili hehi ni membo waze.

²⁶ Te kaatwama nawa mu membo ja Yeshua, ni Molada, ni Bete Pelete,

²⁷ ni Hazarshuale, ni Bersheba, ni mu yihunda yize yajingilika,

²⁸ ni mu limbo lia Ziklage, ni Mekona, ni ye yihunda yalio,

²⁹ ni Enrimone, ni Zora, ni Jarmute,

³⁰ ni Zanoa, ni Adulame, ni yihunda yakusulangana, ni Lakishi, ni mu minda yize yili hakamwihi, ni Azeka ni yihunda yalio. Kafwa ngwe, Ayuda te kaatwama mu chifuchi hakachi ka Bersheba ku sude ni ku chikulo cha Hinome ku norde.

³¹ Abenjamine te kaatwama mu Geba, ni Mikmashe, ni Ayi, ni Betele, ni yihunda yakusulangana,

³² ni Anatote, ni Nobe, ni Anania,

³³ ni Hazore, ni Rama, ni Gitaime,

³⁴ ni Hadide, ni Zeboime, ni Bcnalate,

³⁵ ni Lode, ni Ono, ni mu chikulo cha Akwa Utotombo.

³⁶ Amwe a ku mbunga ya Alevi yaalikunda atwame ni Abenjamine.