Nehemia 10 - Mukanda Wa Zambi 1970

^1-8 Atu waze asele chinyingi cho ku Usendo wano: Nehemia mwana wa Hakalia, mwe mukwa kuyula. Zedekia, Seraya, Azaria, Jeremia, Pashure, Amaria, Malkija, Hatushe, Shebania, Maluke, Harime, Meremote, Obadia, Daniele, Ginetone, Baruke, Meshulame, Abija, Mijamine, Mazia, Bilgai, Shemaya.

Mahako ja Zambi:

^9-13 Alevi: Yeshua, mwana wa Azania, Binwi wa ku jimo lia Henadade, Kadmiele, Shebania, Hodia, Kelita, Pelaya, Hanane, Mika, Rehobe, Hashabia, Zakure, Sherebia, Shebania, Hodia, Bani, Beninu.

^14-27 Miata: Paroshe, Pahate Moabe, Elame, Zatu, Bani, Buni, Azgade, Bebai, Adonija, Bigvai, Adine, Atere, Hezekia, Azure, Hodia, Hashume, Bezai, Harife, Anatote, Nebai, Magpiashe, Meshulame, Hazire, Mesezabele, Zadoke, Jadwa, Pelatia, Hanane, Anaya, Hoshea, Hanania, Hashube, Haolheshe, Pilha, Shobeke, Rehume, Hashabna, Maseya, Ahia, Hanane, Anane, Maluke, Harime, Bana.

Aisraele yaalitesa

²⁸ Yetu, Aisraele, ni mahako, ni Alevi, ni tufunga twa zuwo lia Zambi, ni njimba, ni akwa milimo a ku zuwo lia Zambi, ni akwo eswe waze akufunga Shimbi ja Zambi, hitwalihandununa ni yilambala waze atwama mu chifuchi chetu, hitwalichinga hamwe ni mapwo jetu ni akweze jetu eswe waze haakolakola,

²⁹ hitwalichinga hamwe ni miata jetu ha chikuma chino. Twalishinga ngwetu, mutufunga Shimbi ja Zambi, jize Zambi alwezele kavumbi kenyi Mose atulweze: Ngwetu: mutwononokena longeso lieswe lize Mwene Zambi, Zambi yetu matwamba: mutufunga Shimbi jenyi jeswe ni yiyulo yenyi yeswe.

³⁰ Kutuchi kulimbata nawa ni yilambala waze atwama mu chifuchi chetu.

³¹ Nyi yilambala maatunehena yimwe mbuto ni kutulanjisa yo ha tangwa lia kuhwima hanji ha tangwa lia chijila kutuchi kuyilanda. Ha mwaka weswe wa muchishimbiali kutuchi kulima minda yetu, ni mikuli kuyikala ka.

³² Mutubwa nikuhana grame jitano ja mbongo ja prata milambu ya mu zuwo lia Zambi mwaka ha mwaka.

³³ Ha kuwayila mu zuwo lia Zambi mutulambula yuma yino: mbolo ya kutumbieka, ni milambu ya mbuto ya tangwa ha tangwa, ni yimuna waze chatamba kwochela Mwene Zambi tangwa ha tangwa, ni milambu ya chijila ya ha tangwa lia kuhwima, ni ya chiwanyino cha Kakweji Mwaha, ni ya yiwanyino yikwo, ni milambu yikwo ya chijila, ni milambu ya kuchiza nayo milonga ya Aisraele, ni yuma yeswe yikwo ya ku zuwo lia Zambi.

³⁴ Yetu eswe, ni mahako, ni Alevi, mutubwa nikuta chela mwaka ha mwaka tunyingike jimo lika maakaneha kunyi ja milambu ya kwocha kuli Mwene Zambi, Zambi yetu, nikulita ni mukanda wa Shimbi.

³⁵ Mutuneha nawa ku zuwo lia Zambi mulambu wa mbuto yitangu yize mutubatula ni mihuko yitangu ya ku mitondo yetu.

³⁶ Mwana wa lunga mweswe mutangu kusemuka mutumuneha kuli mahako ku zuwo lia Zambi ni kumukunjika kuli Mwene Zambi nikulita ni Shimbi. Mutukunjika nawa mwana ngombe mweswe mutangu kusemuka, ni chibwe wa panga, hanji wa pembe.

³⁷ Mutuneha nawa kuli mahako mbolo ya kulinga ni mbuto yitangu mwaka ha mwaka, ni milambu yetu yikwo ya vinyu, ni maji a olive, ni ya mihuko yeka ni yeka. Mutuneha nawa kuli Alevi, milambu ya Chihanda chimuwika cha ku yihanda kumi ya mu minda yetu.

³⁸ Mahako a ku vungu lia Arone chaatamba kubwa hamwe ni Alevi muze atu maalambula cha kumi chize maalinga nacho mu zuwo lia Zambi. Alevi chaatamba kwanda cha kumi cha milambu ya cha kumi yeswe ayo maatambula ni kuchisweka mu yibatulo ya kutuliekela yuma mu zuwo lia Zambi.

³⁹ Aisraele ni Alevi chaatamba kuneha milambu ya mbuto, ni ya vinyu, ni ya maji a olive, ku yibatulo ya kutulikila yuma, muze akufungila yikashi ya mu zuwo lia Zambi, ni kuze mahako akualingila milimo yo, ni kuze tufunga twa zuwo lia Zambi, ni mbunga ya njimba akutwama. Kutuchi kwehuka nawa zuwo lia Zambi yetu.