Nehemia 1 - Mukanda Wa Zambi 1970

¹ Mukanda uno unalumbununa yitangu ya Nehemia, mwana wa Hakalia. Mu kakweji wa Kisleve ha mwaka makumi aali wa kuyula cha Artashede, mwanangana wa chifuchi cha Persia, yami Nehemia nabwile mu Shushane, limbo lia wanangana.

Nehemia yanenganyana hali akwa Yerusaleme

² Umwe mukwetu Hanani yakatuka ku chifuchi cha Yuda hamwe ni mbunga ya malunga akwo, yaanguheta. Mba yingwahula sango ja limbo lia Yerusaleme ni usoko wetu Ayuda waze atuhukile mu undungo nikuhiluka nawa ku Yerusaleme.

³ Yaangulweza ngwo: “Masalila waze atuhukile mu undungo kaakumona lamba linji, yilambala waze akutwama hakachi ko kaakwasaula. Chikwo nawa, chipanga cha mawe cha Yerusaleme hichinabuzuka ni ye yajilo yacho hiyinaweme.”

⁴ Muze hinevwa yize yeswe, yingutwama hashi ni kulila. Matangwa amwe yingunenganyana, chalile nichimwe, yingulemba Zambi ngwami:

⁵ “Mwene Zambi, Zambi ya mwilu! Yena uli munene, twakukuvwila woma. Yena wakufunga Usendo ni waze akukuzanga ni kulinga chize unapale.

⁶ Mwene Zambi ngutale kama, ubanjike kama kulemba chami muze ngunalembela tuvumbi twe Aisraele mwalwa ni ufuku. Ngunanyingika ngwami, yetu Aisraele hitwavulumuna. Tushakulu twami ni yami hitwavulumuna.

⁷ Hitwalinga ni ungulungulu kuli yena. Kutwafungile Shimbi ni yiyulo yize wahanyine kuli kavumbi ke Mose atulweze.

⁸ Iwuluka kama liji lize wambile kuli Moze ngwe: ‘Nyi yenu Aisraele mununguvulumuna, yami mungunumwangina mukachi ka mavungu eka.

⁹ Alioze nyi ngwe nwatewuluka nawa kuli yami, ni kufunga Shimbi jami, mba mungukanuhilwisa homa haze natongwele ha kunguwayila, chibwe hinunamwangashana hashi heswe.’

¹⁰ “Mwene Zambi, wano kaali tuvumbi twe, atu ja yena mwene. Yena waakulile ni kwoko lie lia ndundo.

¹¹ Haliabwila banjika kama kulemba chami ni cha tuvumbi twe akwo waze anazange kukulemesa. Musono nguwahise kama yami kavumbi ke, hanga mwanangana anguvwile kama keke.” Ha matangwa waze nabwile ni kutwalila mwanangana vinyu.