Nahume 3 - Mukanda Wa Zambi 1970

¹ Lamba lie, limbo lia mahuza kanda lia manyinga, lize liabwile ni ubite uze atu maahasa kububa.

² Banjikenu, zungo lia shikote (fimbo), lundunjila wa yijingo, kutumbwoka cha tuvwalu, kulundumuka cha matemba a jita!

³ Akwa tuvwalu kaanasesumuka, mikwale yinabeyima, makunga kaanalejima! Mijimba ya afu haayilumbika yingina, afu keeshi kuhasa kwalula, atu kaanatalinga hali ayo!

⁴ Ninive, chitanji, kaanamumwesa lamba. Hasesumwisa atu, haashihisa ni ubeme wenyi, hapiangula mavungu ni kwanjisa mu undungo.

⁵ Mwene Zambi Mukwa Ndundo Jeswe ngwenyi: “Ninive, mungukumwesa lamba! Munguzula mahina je hanga mavungu akutale, akumone ni sonyi je jeswe.

⁶ Mungukulelesa, mungukupwisa mukwa majilo. Mungukupwisa chitaletale lume.

⁷ Eswe waze maakumona, maasuswamiana ni woma. Kumaamba ngwo: ‘Ayenu, kuma Ninive haamwenyeka! Iya mamulila kama? Iya mazanga kumulembejeka?’ ”

⁸ Ninive, kuma yena uli mubema kuhiana Tebese, limbo lia wanangana lia Egiptu, nyi? Neye te kakwete lwiji yoze wamufungile ngwe chipanga; lwiji Nile kabwile ngwe chipanga chenyi.

⁹ Te kakuyula Sudane ni Egiptu, tachi jinji abwile najo. Libia mwe wabwile sepa lienyi.

¹⁰ Hindu akwa Tebese yaatwala mu undungo mu chifuchi cha mbala. Yaashihila shihila ana jo ha makano eswe. Miata jo yaatwala akukasa ni ngoji ja utale, yaapiangula mukachi ka atu waze aakwachile.

¹¹ Ninive, ni yena nawa muuzengewa! Yena nawa muweseka kuchinyina kuli akwa kole je.

¹² Membo je eswe akukoleka kumaabwa ngwe mitondo ya mikuyu, mihuko yayo hiyahia. Nyikisa ye mitondo, mba mihuko yiholokele mu kanwa lie!

¹³ Tujita two kaali ngwe mapwo, chifuchi chenu haachijikinyina kuli akwa kole. Yikolo ya chipanga che hiyabwa yawashi. Yikungo ya yajilo ye muyikonyata ni kahia.

¹⁴ Tahenu meya, nululike mumu ha jita, kolekenu yipanga. Zambulenu uma hanga nulinge tujolo (briki), lulikenu mishete ya kulinga nayo e tujolo.

¹⁵ Yeswe yize munulinga muyibwa yamokomoko. Kumaanwocha kahia, hanji kunushiha mu jita; kumaanunongesa upu, ngwe mbuto yize hiyahwa kuli makumbi. Hinwoka ngwe makumbi!

¹⁶ Hinwokesa akwa kulanjisa ngwe matongonoshi a mwilu! Alioze haliabwila haaya ngwe makumbi waze haazazulula mapulwa jo, haahumuka.

¹⁷ Akwa lutwe je kaali ngwe yisaji ya makumbi waze akutwama ha yipanga ha matangwa a chishika. Alioze muze hikwabwa mwalwa, kaakuhumuka ni kuya, mutu niumwe wakunyingika kuze akuya.

¹⁸ Mwanangana wa Asuria, akwa kuyula je haafwa, alemu je kaali mu tulo liakulu. Atu je haamwanganyina ha milundu, kukushi niumwe yoze maahilwisa ku mahiahia jo.

¹⁹ Yilonda ye kaahashile kuyiwuka, kuyichikaya. Eswe waze meevwa sango ja kwonona che maasakwila koshi ni uwahililo! Iya kanda amona kama lamba lia uswii we?