Mika 7 - Mukanda Wa Zambi 1970

Uhenge wa Aisraele

¹ Mama lambee! Hinabwa ngwe mutu yoze hafwa zala, yoze keshi kuwana limwe wundu ku mitondo, hanji yimwe yichakata ku mitondo ya vinyu. Yichakata yeswe ya vinyu ni mihuko yeswe yiyema ya mikuyu haayihela kulu.

² Mu chifuchi kumwasalile nawa niumwe mukwa kutuwika mu mbunge, niumwe yoze wakulemesa Zambi. Atu eswe kaakufupa kushiha akwo, kaakuzomba enyembo jo hanga aashihe.

³ Eswe kaali ni mana anji a kulinga yibi. Akwa lutwe ni ngaji kaakwita mbongo ja mbenga. Mukwa mana kakwalweza chize akuzanga, mba maatwama punga hamuwika.

⁴ Chibwe waze akulimona ngwo, kaali abema hanji akwa kutuwika ku mbunge, hindu kaali amokomoko, kaali ngwe mikalale. Tangwa hiliakundama lize Zambi makamwesa atu lamba, nikulita ni maliji ja akwa munanyi. Ni haliabwila kaana binji kulu.

⁵ Kanda ufuliela mwenyembo we hanji kujikujila hali sepa lie. Ukanyama ha yize unahanjika chibwe kuli pwo lie.

⁶ Ha matangwa wano ana malunga kaakumona ngwe atato kaali yihepuke, ana mapwo kaakulimika ni anaye, akweze ja mapwo kaakuzwelesa atato pwo; akwa kole ja mutu kaali a ku jiko lienyi mwene.

⁷ Alioze yami mungutala kuli Mwene Zambi, mungushimbwila Zambi yoze mangulamwina. Zambi yami kumangwivwa.

Mwene Zambi makalamwina Aisraele

⁸ Akwa kole jetu kaahashile kutuyunga. Hitunalimbuka, alioze kumutuhinduka nawa. Haliabwila tuli mu milima, alioze Mwene Zambi makatutemwina.

⁹ Hitunavulumuna Mwene Zambi, kashika chatutamba kulihumikiza ni utenu wenyi. Alioze hakusula, makatuhakwila ni kutusambisa. Makatuhetesa mu Pangu; mutumona ubatwilo wenyi wa ululi.

¹⁰ Akwa kole jetu maakachimona, mba maakevwa sonyi, waze atulelesele ni kutuhula ngwo: “Mwene Zambi, Zambi yenu, yolihi?” Kumutwaamona chize anaakumbu ni kwaliachila hashi ngwe malowa mu majila.

¹¹ Yenu Aisraele, tangwa lia kutungulula chipanga cha limbo hiliakundama. Ha tangwa lize chifuchi chenu muchikatohwa kuhiana.

¹² Atu je maakakatuka ku yifuchi yeswe, ku Asuria ku chivumbuko, ni ku Egiptu ku sude, ni ku chifuchi hehi ni lwiji Ufrateze, ni ku kalunga lwiji ni milundu kusuku; maakahiluka ku mahio.

¹³ Alioze hashi muhakalumuka puya mumu ha ungulungulu wa atu waze atwama ho.

Kulemba: “Mwene Zambi vwila kama Aisraele keke”

¹⁴ Mwene Zambi bwako kama kafunga ka atu je, atu waze watongwele. Chibwe kaanatwama ukawo mu puya, chifuchi cha chinuno chakwajingilika. Atayize aye akalile mu chililo chibema cha Bashane ni Gileade, ngwe chize alingile ku shakulu.

¹⁵ Mwene Zambi, linga kama yilayi mumu hali yetu, ngwe chize walingile ha matangwa waze watuchijile mu Egiptu.

¹⁶ Mavungu maakachimona, mba maakevwa sonyi, chibwe kaali ni tachi jinji. Maakalishimwoka ni kusa moko ku makanwa jo ni kujika matwi jo.

¹⁷ Kumaakaasa fufuta ngwe manoka; kumaakatuhuka ku membo jo akukoleka nikuchikima ni woma. Mba maakatewulukila kuli Mwene Zambi, Zambi yetu, ni woma.

¹⁸ Aa Mwene Zambi, kukushi zambi mukwo walifwa ngwe yena. Wakukonekena milonga ya atu je waze asalile ni mwono. Kuushi kutenuka ku miaka yeswe, alioze wakuwahilila ni kutulweza zango lie lize kulishi kuhwa.

¹⁹ Kumuukatulweza nawa keke, muukaliachila milonga yetu kushi lia yiliato ye ni kuyishinjika ndoo kushi lia kalunga lwiji!

²⁰ Kumuukalweza utu we ni zango lie lize kulishi kuhwa kuli atu je, vungu lia Abrahama ni Yakoba, ngwe chize walakenyene tushakulu twetu ku shakulu.