Mika 6 - Mukanda Wa Zambi 1970

Mwene Zambi yahisa Aisraele

¹ Banjikenu chize Mwene Zambi anasumu Aisraele mulonga. Aa Mwene Zambi, katuka, waasume; chinalite milundu ni mundundena yibanjike yize unambe.

² Yenu milundu, yenu fundamentu jeswe ja hashi, banjikenu ku kusuma cha Mwene Zambi! Mwene Zambi kanasumu atu jenyi. Kumasuma Aisraele mulonga.

³ Mwene Zambi ngwenyi: “Ayenu atu jami, yika nanulinga? Yilemu yika nanutwika kama? Ngukumbululenu.

⁴ Nanutuhwishile mu chifuchi cha Egiptu; yingunuchiza mu undungo; yingunutumina Mose, ni Arone, ni Miriame hanga anusongwele.

⁵ Atu jami, iwulukenu kama chize mwanangana Balake wa ku Moabe anulingile, ni chize amukumbulwile kuli Balame mwana wa Beore. Iwulukenu yuma yize yabwile ha matangwa waze nwakatukile ku musumba wa Akasia ndoo ni muze nwahetele ku Gilgale. Iwulukenu yuma yize, mba mununyingika ngwenu, kuma nalulikile yize yeswe ha kunulamwina.”

Chize akuzanga Mwene Zambi

⁶ Chika mungunehena Mwene Zambi, Zambi ya mwilu, muze mungwiza ni kumuwayila? Ngumutwalile yimbembe a ngombe milambu ya kwocha, nyi?

⁷ Mwene Zambi kumawahilila nyi namutwalila tununu twa mapanga hanji tununu kumi twa njiji ja maji a olive, nyi? Ngumulambule mwanami mutangu kusemuka ha kujimuna milonga yami, nyi?

⁸ Kaa mata! Mwene Zambi hanatulweze chize akuzanga: kulinga chize chinalite, kulweza zango lize kulishi kuhwa, kuliendela ni Zambi yetu nikulikehesa.

⁹ Kuvwila Mwene Zambi woma chili mana abema. Kanakololoka kuli akwa limbo ngwenyi: “Yenu waze nwakunguluka mu limbo, banjikenu!

¹⁰ Mu mazuwo ja yingulungulu kumuli ubite uze atambwile ni uhenge. Kaakulinga ni yeseko ya mahuza, yuma ngwe yize nakuyivutwokela.

¹¹ Ngwe kuchi munguhasa kukonekena waze akulinga ni pezo ja mahuza?

¹² Pichi jenu kaakufumbwila hali yiswale, yenu eswe nuli akwa mahuza.

¹³ Hingunabutula kulu kunumwesa lamba ni kunwonona mumu ha milonga yenu.

¹⁴ Chibwe nulie, hindu kunuchi kukuta, munubwa lume akwa kufwa zala. Munukambata yuma yinji, alioze kunuchikahasa kuyifunga. Yuma yeswe yize nwakufunga, yami mungukayonona mu jita.

¹⁵ Munukakuwa mbuto, alioze kunuchi kabatula mihuko yayo. Munukama maji a olive, alioze kunuchi kayuka no. Munukakama vinyu, alioze kunuchi kayinwa nichimwe.

¹⁶ Yino yeswe muyikabwa mumu nwakawile ndako jibi ja mwanangana Omri, ni ja mwanenyi Ahabe. Nwembulwile ndako jo, kashika mungukanumwesa lamba, atu eswe maakanulelesa. Sali ni sali atu maakanusaula.”